Halloween party ideas 2015

Tuithaphai:  February 15, 2013, Hmar Inpui (Hmar Supreme House) General Assembly, Muolvaiphei Club Hall a nei mek a chun palai fekhawm haiin kum 2013-15 sunga thuoitu thar ding thlangna an nei a, ahnuoia hai hi thlangtling an nih.

President: Dr. John H Pulamte

Vice President:

i) Hmangzalien
ii) Lalawilien

General Secretary: David Buhril 

Joint Secretary: F Doliensung

Joint Secretary, Region:
1. Dr. Immanuel Zarzosang
2. Thangsang Songate
3. Lalchawisang

Finance Secretary: Jousanghlei Joute

Treasurer: Rev. Ruolhlei Pakhuongte

Ziektu: Pu L.K. Varte, Guwahati

Hmar Kohran hi Krista tuolto kohran chanchintha chi a hung kak dawk chu a nih. Kum1910 khan Pathien tir mipakhatin Johan bumal hnuoi thatna hmun ah hung the lutin, Hmar nauhai sutpuiah van rangkachak Krista kohran chu Senvon khuoah a hung inder suok ta anih. Krista kohran, Pathien thlarau meichawkin a hung sun eng Hmar tuolto kohranhai chu ei ni hi ei nih. Ei mihriem invetna popohai chu the thlak peka umin, Pathien thlarau varna a inthuom le a neitu, a changtuhai chu ei hung ni ta a nih. Suol inhliem in um hlak inla khawm, inthla lova Krista cheltlattu kohran Hmar nauhai chu ei nih.

En hman ta u? Tuia le Thlaraua piengtharna, ei Lalpa Isun a ngai pawimaw bekbek, ngainatu, ngaisang hle kohran hi an tam bek le, ei ni chu Krista tuolto kohranhai sandamna ngainatu le chu changtuhai chu ei nih. Hi Krista tuolto kohranin a kang zapna chile`kuonghai hrim hrim sandamna, tuia le thlarauva piengtharna ngainatu, pawimawsaktu kohran an hung ni zat zat pei anih.

Vanhnuoi mihriemhai hi tu hnam khawm, tu chi khawm misuol turu taktak hnam vawng, siemtu insir vawng vawngna khawp suol thawthei vawng hnam ei nih. A suol seng seng laiah Israel hnamhai vangnei bikna chu Pathien hnam thlang, a nauhai anni lei a nih. Hmar nauhai vangnei bikna khawm Pathien-Krista zawngsuok hnam, a kohran phun le a kut suokhai a nauva inbuk hai chu ei nih. I lo sui hlak am? pasie, hausa, a thiem, a mawl thu hril lovin, hmar-nau lai ruol banlo, ruollaia hmusit um, mi hnuoi sie, apawk! ku khi van, ku hi hnuoi! ti khum el ding hi ei um am aw?. An lo um pal chun ama chu suol leia hliem tuor ning a ta, sukdamin um nawk a ta, a tho nawk ngei ding a nih. Var nauhai eini si a.

Isun, Nikodem a kuomah, i piengthar ding ka ti che hi mak ti naw rawh!, tiin a dawn a, mi a piengthar tlat chun, ieng am hril tang i ta?, hihi Thlarau Thienghlim sinthaw ana, Nikodem i hrietthiem le thiemnaw thua innghat an ta nawh. Chuongang bawkin, mi thlarauah a piengthara, Krista tuolto kohranah a piengthar bawk si chun theinghil dinga hang intu rak dan ding khawm a um chuong naw a, hotu Nikodem ang thovin buoi i tih. Krista hmangainaa inthawk chun tuin am mi theng ata ?, rinumnan amanih, lungngainan amanih, suknawmnatnan amanih, tamin amanih, saruoknan amanih, tiumin amanih, kawlhnamin amanih ami the ding am a nih?, hung ti thla zungzung an ta, Rom 8:39 ah ... mi the naw nih, tiin an suk tawp el ding a nih. Krista tuolto kohran haia piengthar ta chu iengkhawmin the naw nih; lu`bawng, ban`bawng, martar chen ngam deu vawng ei ni`el thei a nih; a khel chu vandumpawl ruoi kheltieng, vanram ni el tang a tih. Kristaa le kohran pawl bika piengthar hi Hmar nauhai insukchiengna ding tak chu a ni el nawm a nih, ei ni tlangpui ang hin.

Ei kohran bulpuihai, parent churches tukhawmin ei maksan theinaw ding an leiin, Krista zara mani kohranhai thlawpa, inhriepawa, inrawntlang diel diela Lalpa rama rawngbawl tlanga, khawpuihai ah ei renga eiin leng vawngna ding puonin zau lien hi Hmar Christian Fellowship haiin ei thaw ding tak chu ani el naw dim a nih?. Inkhuongruolna le Lalpa zanbu kil tlang pei theina ning a ti ie!. Kristan an din kohranhai sin hi suk le tung tamtak a um anih; tlaksietna, thatna dan, sietna dan chi dang dang, hliem tuorhai tuom damna sin, Lalram rawngbawlna sin hienghai popo hi Kristan an din ei tuolto kohran bulpui haiin indei le indeilova anphur suok hlak anih, ei nin ei them theilo ding tamtak khawm a um anih. Hieng lei hin, eini sawrkar sin le sin dang dang thawa, sumhnar neituhai le studenthai hin apar ei tlan chau nilovin, ei support a ngai a nih. Kristaa ei tuolto kohranhai popo khi ei ta vawng an nia, an hmalakna haiah thlawp ei tiu! Lal David anga, Lalpa hrieknalhai ei inza zing phawt chun Hmar Christian Fellowship ei i duot em em hi chuoi ngainaw ni a, vul zing lem a tih. Ngaidan ka hung thawlawm ve ani ie.


L.K. Varte,

Date: 09.02.2013

Pillangkatta, Guwahati-29

Email: lkvarte@yahoo.com

By Prof. Lal Dena 

            India ramah hin Protestant mission society tam takin rong an hung bawl a.  Anni inkarah inhrietthiemna thra lem a umna dingin inzatuona dan tlangpui (principle of the comity of Protestant missions working in India) an lo zam a. Chu dân dungzui chun India ram sŭng khaw lai hmuna khom mission pakhatin rong a lo bawl tah chun, rong lo bawl hmasatuhai le inbiek remna nei hmasa zet naw chun mission society dangin missionary thar dang tir lo ding ti a nih. Hi dân hi hmangin abikin India hmar sak ram chu hieng ang hin BIEL an lo insem a: Assam phaizawl, Garo Hills, Nagaland le Manipur chu American Baptist Mission (ABM) chan; Khasi Hills le Mizoram chu Welsh Presbyterian Mission (WPM) chan; Tripura chu New Zealand Baptist Mission (NZBM) chan.          

            Abikin eini Zohnathlakhai chengna Mizoram le Manipur tieng thlir bing inla. Rev.William Williams, Shella, Khasi Hills-a rongbawl lai mêkin kum 1890-khan Mizoram a hang sir a. Rev Williams rotna angin WPM chun kum 1892-a  Machynleth Inkhawmpui chun an mission field dingin an namdet nghal a. WPM chun Rev David Evan Jones (Zosaphlui) chu an missionary dingin an ruot a; a fe suok hmain D. E. Jones chun kum thum trening a la nei hri a. Kha hmaa Arthington Mission tirh J. H. Lorrain (Pu Buanga)  le F. W. Savidge (Sap Upa) hai ruolcham khan Mizoram chu WPM ramhuol a nih ti an hriet lawk ngei niin an lang. Aizawla umhmun khuora bangla an bawl thu kha hieng ang hin Lorrain-in W. Thomas, Liverpool, kuomah lekha a ziek a: “From the very beginning of building (the bangalow) we had in our mind the coming of your missionaries…”(J.H.Lorrain to W.Thomas, 1 October,1898). 

            Trening zovin D. E. Jones chu 31 August, 1897 khan Aizawl a hung chuong kai ve tah a. Thu khervei thaw nuom hai sien chu sulsutu le kum thum chuong hiel rongbawla lo um tah Lorrain-hai ruolcham khan hril ding an hau awm khop el. Kum thum tawp rong lo bawl tah an ni leiin Mizoram suoksan khom an rin hle. Mizorama um song theina ding a ni phot chun WPM-a inpêk khom an rin nawh. Amiruokchu, anni ruolcham kha Baptist kohrana mi an ni leiin, WPM-in a lâk nuom nawh.

            Hi lai thu hi Lorrain-in hieng ang hin a lo ziek a: “W. Savidge and I are very sorry to hear that your committee feel unable to accept us for your work in Lushai. We shall always follow the work of your agents in that land with the keenest interest and we trust that God’s richest blessing may rest upon their labours”(Lorrain to Thomas, ibid.). Thra taka inbein, mission le mission inkăra inzatuona dan ngir lai chu hre zingin, D.E.Jones kutah iengkim an inhlân vong a, thla ruk nêka tam an la umpui sungin an mawphurnaa ngaiin Lusei trong an inchuktir a, thil thaw pei dan ding le hma lak pei dan ding an hril a, D.E.Jones ta dingin zirtirtu, keihruoitu, thrangpuitu le sulsutu trangkai tak an lo ni ta lem a nih.

            Lorrain hai ruolcham chun Mizoram an suoksan a, Abor ram (Arunachal Pradesh), tu khomin rong an la bawl nawna rama chun an fe a. Kum thum an um sungin Abor trong an inchuk a, lekhabu khom an siem hman a nih. Pathien remtinain Mizoram sim tieng chu Baptist Mission chana inhlăn fel a hung ni phing leh, anni ruolcham bok kha Lusei trong thiem ta sa an ni bok leiin, Mizoram sim tieng biela rongbawl dingin an ko a, rongbawlna tran dinga  an suok khomin malsawmna’n D.E.Jones-in a’n thla a, malsawmna tam lem leh hlawk takin an hun tawp chenin Mizo rama bok rawng an bawl nawk ta lem a nih.

            Mission le mission inkâra inzatuona dan hi bawsiet a ni zen zen nawh. Amiruokchu, kum 1934 khan Mizoram chu WPM field a nih ti hre zingin Salvation Army chun hmun khuor ve tumin, a ram mi threnkhat le inthu kopin hma an lak a. WPM hotuhai lu an sukhai hman hle. Chuong laia misawnari um Rev Lewis Evans chun Borsap A.G.McCall kuomah a zuolkova, lekha sei tak el a ziek a.  Chutaka a ziek uor tak chu WPM ni lo, mission dang hrim hrim Mizorama lut phalna pek lo ding; pek an ni chun Mizo hnam lai inthrena le inkeibingna a ra suok ding a nih ti a nih. Amiruokchu, Mizo threnkhat le Salvation Army hotuhai lo inthuhmu tah le Calcutta inthoka an lo tran tah a ni leiin, WPM hotuhai chun an dang zo chuong ta nawh. Buoina tam tak nêr thlengin Salvation Army khomin Mizoramah hmun det a hung khuor ve ta tho a nih.

             Watkin Roberts khom khan mission society inkara inzatuona dan ngir lai chu a bawsiet tiin Manipur Biela A.B. Mission misawnari hmasa tak William Pettigrew chun a hêk nghé nghè a ni kha. “Manipur Simthlanga Chanchin hung lut dan le A.B.Mission lo dodal dan, 1910-1933” Thukna Ropui, 2010 –ah khan chieng takin ei tarlang ta a, chik nawkzuola sui nuom chun tiem dingin ka ditpui. Manipur sorkar khoma Watkin Roberts kha Manipur-a um a phal nawh a, a hnungin Mission Society-a inthok khoma muolpho taka hnotsuok a ni nghe nghe.

             Thil tlung tah (historical events) hai hi historian-haiin an sui hrim hrim chun, thil tlung kha ieng leia tlung am a na? Ieng leia khâng kher kher khan a tlung am a a na? Kha thil tlung khan a hnung peiah ieng am kakhawk a nei a? ti hai hi tukver hrang hranga inthoka thlirin, sir tina biin an chǐk hlak a nih. Histawri ziek dan kalhmang (trend of historical writing) khom hi a hung inthlâk pei a. Africa le Asia rama kha hmaa ram dang op dea umhai an hung suok zalena (decolonizing process) inthok lem khan chu ramper hlutsaktu pawl (colonial officials) le missionary-hai thilthaw dan chen khom fîp taka bi non (reassess) a hung ni tah a. Black theologian-hai lem chun, “Our Jesus is Black” an ti ta chu! Setan lim an ziek pha khom mingo hmêl an inputtir bok.

            A tu khom, Western missionary-hai khom ni hai sien, an thilthaw thrat le an thilthaw suolhai inhmai bik um lova a ni dan ang taka bi a, objective assessment thaw hi historian-hai sin a nih. Voisun chen hin mi tam takin Pathien ang thawthanga mingohai ngaina le biekna (colonized mentality) lungril ei la nei a, Saphai, abikin missionary-hai lem chu soisĕl thieng lo anga ngaina ei la nei a hoi. A poi khop el.  Hi ripa inthoka ei intăl suok a hun tah.

            Dr Fraser khan India rama Watkin Roberts hung thruoi phalna Liverpool-a WPM hotu lienhai kuomah a hni a. Hi lai thu hi original source hmangin ka tupa Jonathan Pudaite chun hieng hin a lo ziek a; “In reply to the letter, the secretary of the WCMFMS asked Fraser to inform Roberts to delay his travel and go out the usual way”, (Jonathan Pudaite; The Legacy of Watkin Roberts, 2009:14). Hotu lienhai thu awiin missionary intir pangngaiin, training zo thlapin Roberts kha WPM tira hung suok ni sien chu thil a danglam hle thei. Historian-hai chun thil tlung hrim hrim, a sie le a thra, hi hnung peia kakhawk an nei dan lung nona thrang loa objective assessment thaw hi an sin tak a nih.

(Canchipur, 8th February, 2013).

Ziektu: Pu Zarzolien Keivom, Greater Noida

A hming hang hril ringot khoma naupang hmulthi sukngir suou thei laia pakhat chu ramhuoi hi ni ta veng a tih. A san chu ei pi le puihai khan ramhuoi hi ramhnuoia khawsa hlak khawhri chi khat, thilthawthei tak le huoisâr deu el, mihriem sukna hlaktu ni ngei dingin an ring a, tlon lungawi tumin ran thisenin a kuomah an lo inthawi hlak lei a nih.  Tulai chen khom hin ramhuoi trina hi a la rè naw a, mi thaidawp deuhai chun ram pilril deua makhâta invâk an la ngampa nawh. 

Mi tam takin ramhuoi chanchin ei hung hriet chieng tak takna chu Pathien thu ei hung awi hnung le Baibul dam ei hung tiem thei hnung a ni el thei. A bik taka ramhuoi khawsak dan le a thilthaw nuom zawng a ngiel a ngana Baibula a hrilna chu Chanchinthra bu lihai hi niin a’n lang.   Ramhuoi chu mihriem sunga lutin a nuom ang angin mi a thunun hlak a nih ti ei hmu a, ei pi le puhaiiin an lo ring dan nêk dai khan tri a lo um lem hman hman niin an lang. Ramhuoi inzawlpui taphot chu a nuom ang angin a thuhne a,  an thu le hla ni loin a nuom dan le thra a ti dan taphot chu a’n thawtir a, awm lo baksak hiel damin hratna thahrui khom a pek hlak.  Khawhri amanih ramhuoi lai khom hin a suol bik, mi suknat zawng le poi tawk zawnga che hlak, inthup thiem si, an um. Chuonghai chu voisun chen khom hin ei ni lai thiem takin, a rûk a rălin, a la che zing hlak niin an lang bok. 

Marka 5:1-5 ei tiem chun Gerasin rama thlarau tirdakum, a ‘Nuoia’ pai, thlan hmuna inthoka hung suok le Isu an intuok thu ei hmuh.  Chu mipa chu thlan hmunah a khawsa hlak a, tu khoma an thuhnè thei ta nawh. Thirkhaidieta an thlung khomin a suktan pei, thirkol an in buntir leh a suksiet pei bok.  A sŭn a zănin thlan hmun le tlanga hai a khêk tuor tuor a, lung sǐr ngeiin a’n ăt thi neng nung hlak.  Chuleiin, a hrăngna hmuna hin mi an fe ngam zen zen nawh. Mathai chun, “..ramhuoi man pasal pahniin an hung pan a, an kol ĕm leiin chu lampui chu tu khomin an hraw ngam nawh” tiin a ziek (8:28).

Senvona kan um lai mi pakhat hlimsuol kan ti el hi a um a, chu pa chu a nina tak chu ramhuoi zawl ni lem mei a tih. Ramhnuoiah a tlan hmang a, thingkung insang tak taka kaiin mi dam a enthlak hlak a. A chang leh loa tru trâwpa dam riekin, raw fei ngei deu deu dam a maksan hlak a. Chuonga thil poi a tawk lem chu hriet ni naw sien khom, nuhmei naupang a sukthlabăr a, ngaingam taka mmakhata tui chawi le thing phura fe ngam khom an um ngai nawh. 

Ei hril ramhuoi zawlpa ruok hi chu nuhmei naupang chu hril lo, patling inti ngiel ngielhai ta ding khoma pangzatum, inhnawm inzuna fe khom sukhoi lo chi a nih. A sung le kuohai ta ding lem chun, a trium el chu hril lo, khuo le veng laka khom nghatna ding vang pêk ngot a tih.  Chu mi pa chu ama thu chu ni sien, thlan hmunah chun khawsa naw ni a, ama le ama khom insukna bok naw nih. A zawltuin thrangpui naw sien chu khaidiet le thir kolhai khom chu kei tanin sukse zo kher naw nih. A thlarau tirdakum pai chun a’n thawtir a nih. Hi ramhuoi zawlpa khawsak dan le chet dan anga râpum le maksak hi Pathien ringtu intihai lai hin hmu ding ei la um zing niin an lang.

Johan 10:10-a chun, rukru chun inru ding dam, sukhlum ding dam le sukse ding dam chauin a hung tiin Isu’n a hril a.  Ramhuoi ei ti khom hi tu dang ni loin rûkrupa,  mi that hmang, thil um trok trok suksetu, Setan ei ti pa tho a na, an chet dan zirin an hming ei phuok danglam mei mei a ni lem.  Chu thlarau suol le tirdakum ramhuoihai chu tu lai khom hin ei ni lai hin mizie dang dang putin an inlar zing a, thawhla an um em em.  Ei thralaihai lai khom an inlar nasa em em a, zu le sa le damdawi ngawlveinain a man de tlat a, thirkhaidiet le thirkol khoma thlung hnè thei an ni naw a, mani hringna chen khom iengma loah a’n ngaitir hlak a nih. Insungin a tlakran pha a, kohran le khawtlang chen a kakhawkin a dĕng phak a, ama hringtu a nu le pa nun khom thirlinga dep ang elin a trawl hlak. Chu nawa khom chun thralaihai an hmasawn ding anga hma sawn thei lo dinga siemin, inchukna tieng thabona le mani sina depdena tinrêngin a thruoi kawi a, imu thlâkhlăna inneiitirin, internet dam hmangainain a sung sip a, hlawsamna lampui tieng a fen leng hlak. A’n thawtirtu tak chu sukhlum ding le sukse dinga hung pa bok kha a nih. 

Hi ei hang hril, ramhuoi a ‘Nuoia’ tamin zawla an manpa hang vangnei dan hi a ropuiin a mak a nih. Ieng leiin am? Lungril pangngai a hung put nawk el hih a nih.  Lal Isu intuokpui kher kher naw sien chu a hmabak ding chu mihai ta dinga sietna rapthlak intluntu le a tawpah ama le ama inthat ni ngei a tih. Eini rawi khom Lal Isu intuokpui tawl inla nuom a um ngei, ei thlarau tirdakum kolhai ku hi mi hnotdok peka, lungril pangngai puta Lal Isu hnung zuitu ei hung ni theina dingin.

Tu kohran le pawl hneng zawnga kil neia ei hril ni loin eini hnam sunga kohran le hnamin inthuruolna ei tlaksam dan le ei inrem nawzie enin, ei mizie le khawsak danhai hi Pathien ringtuhai um dan ding chu a ni nawh ti ei hriet seng ring um.  Isu hun laia mihai ramhuoi inzawltirtu le an sunga umhmun khuora sin thaw hlaktu kha tulai kum za lawm tah Pathien kohran intihai lai khom hin thiem taka inthup zing pumin, thudik chenve hmangin an lar zing niin an lang. 1Timothe 4 a chun, ni nuhnunga hai chun mihaiin ringna thu hi bansanin, hlemtu thlarau le ramhuoia inthoka suok zirtirna indik naw chu la zui an tih ti chieng takin Thlarauin a hril a, chuong ang zirtirna thu thedartuhai chu khêla mi lemder thiem an ni a, an sie le thra hrietna khom thirlinga dep angin a kang chăr tah ti ei hmuh.

Hi thu hin ringna tum le inchuktirna dang danghai leia inlakhrangnahai chauh a kawk naw a, chi khat, hnam khat, inchuktirna thuhmun, thlarau hmun khat, baptisma hmun khat ni bok si, biekbukin a mi keng ta nawa ti khom ni bok lo, pawl hran hrana inthre dar tumna thlarau khom hi ramhuoi nungchang le thlarau tirdakum thilthaw a ni nawh ti ngam ruol a ni nawh. Sum ngainatna hi suol tingrêng trobul a na, chapona le thu neitu ni nuomna lungril khom hi Lusifar tlak sietna bul a nih ti a hre lo Hmar nauhai lai hin ei um ring a um nawh, a la hre naw dam ei lo um pal a ni chun Pathien ringtu inti sia Baibul tiem ngai thrak lo ni mei an tih.  Mani thlarau chang infuk naw leia Kaina anga unau that nuom tlatna lungril put kohran lai khom hin ei bang nawh. Mani kohran thilthaw chauh thra le indika ngai tlatna lungril nei dam hi Pathiena suok ni loin ramhuoia inthoka suok ni lem dingin ring a um.  Ei Pathien thuin ringtuhai hi Krista taksa ei ni thu le pumkhat ei ni thu ami hril hre zing sia ei ringtu chanpuihai suknat zawng le sukdar le keihek zawnga hma lak ei ching vet khom ku hih ramhuoi zawl, lung sir ngeia in ât thi neng nung le khan a danglamna a um chuong nawh.  Ramhuoi zawlpa khom khan Isu hi Pathien Chunghnungtak naupa a nih ti a’n hmai bik le! Eini tulai ringtu intihai lai khom hin ramhuoi zawlpa nungchang put, Pathien hming sâm inzing ut sia unauhai sietna ding thaw rop ching ei tam.

Ei kohrana Setan kut rolna ra suok ei hnamin a tuor mekhai chu kohran le kohran inhârlakna dam, ei hnam politiks laia inkeichenna le hnam sipai intihai laia innghirinnghona le thisen insuona hai hi niin an lang. Ei khawsak dan le ei nungchang po po hi ramhuoi nungchang le thaw dan char ni lo am a ni?  Mathai 7:17-20 ei tiem chun thing thra chu a ra a thra hlak a, thing sie hlak a ra a thra thei bok nawh. Thing thra chun ra sie a’n suo thei naw a, thing thra naw chun ra thra a’n suo thei bok nawh, Thing tin ra thraa ra naw taphot chu meiah an pei hlak ti ei hmuh. Tipaimuk biela ei hnamin trăm a tuorna hi kum iengzat rau am an ta leh? Ei nunghakhai chalranghaiin an pawngsuol dan hai, sikul le damdawi in tlak siet dan hai, infepawna lam siet dan hai, N.C Hills-a ei mi le sahaiin iengmaloa ei ngaihai kut an tuor nasatzie hai le tu chena khuo hluo thei ta loa rausana um hai hi Pathien ram le hnam invoitu ta ding chun inngaituo chieng a hun takzet tah.

Chu bak chu an le! Mizorama ei hnamin a del chinhai tlakbalzie le an khawsakna inhnuoizie le mihai entleu ei nizie dam hi a hmutu le hretu ei nih. Ei hnamin Autonomous Council a ngenna le inzoma hringna lo chan tahai, fahra lo ding fahraa, hmeithai lo ding hmeithai tahai tuorna hai enin kum sawmhni panga veng vong ei tlangvalhaiin hringna thâpa an lo suol tah le tu chena ei ngirhmun enin lung lai a dam naw hle a nih. Hieng ei hang inzawt kuolhai po poa hin thing thra ei ni le ni naw hriet theina ding um ngei a tih. Hnar hnuoiah inphatna a bo nawh ti ang ziezanga ei thaw suol hriet tum loa ei thaw thrat tlawmte chauh hril vung rak khom ku hih ramhuoi tektik a nih.

Inthuruol hi hratna a nih ti hi taksa le thlaraua dingin thudik tlang, ieng khom pol lo a nih ti ngaituo chiengin, ei thlarau tirdakum pai mi hnotdok pek dinga Lal Isu intuokpui ve dingin ke pên ei tiu. Ramhuoi zawlpa anga lungril pangngai putin, Lal Isu mi tuomna silfenin ei rengin inthuom tum ei tiu. Chu chu ei thratna ding a na, khawvel hmuah mawi ei ta, ei Pathien chawimawiin um a tih. ‘Nuoia’ thuoma ei inthuom sung chun buoi nuoi nuoi le mani le mani innuoi innuoi chauh ei chan ni zing a nih.

KEIVOM RUN (Greater NOIDA)
February 1 2013.

Powered by Blogger.