INPUI: Hmar News & Info

By Prof Lal Dena

Hla phuok hi thiemfin (art) chi khat a nih a, mi nazawng thaw thei a ni nawh. Inchuk sang le hriet rawn leia thaw thei a nih bawk nawh. Hla tienga piengpui thiemna nei hai chauh thaw thei a nih. Dannaranin, hla phuok thiemhai hi hlasak thiem le khawsawt thei an ni nuom vieu. Tulaia pop song sak thiem hai lem hi chu, song winter (hla siemtu/phuoktu) an ni deuh vawng. Eini lai khawm hla sak thiemhai hi a phuok khawm an thiem nghal vawng. Chulaia laia pakhat chu Pu Sawnglienthuom hi a nih.

Eini Zohnathlakhai laia SAI HLA phuok thiem thungna hmatawnga thung ngei dinga ka ingai chu Pu Sawnglienthuom hi a nih. Hla a phuok tlawma chu, a phuok sunhai, a hun lai le vawisun chena sak hlaw pawl tak laia mi an la ni zing. Hla hi a phuok le sak a thiem kawp tlat hi mi tam tak neka a chungchuong bikna a nih.

Ama hi Zawlkhawpui (Pherzawl)-ah May,1943-in a pieng a. (Late) Lalmanlien le (late) Sawmvel nau pasal upa tak a nih. A unauhai chu Lalramlien, Lalhuoplien, Sakhawlal, Laltanlien, Rinpui, Ruthi, Hlira le Lalhlunsiem an nih. Anni sungkuo hi Pherzawla inthawkin Saidanah kum 1944 khan an inpem. A Hmar tawng hmang hi (tu theida lo di'n) 'Zawlkhawpui Hmar Oxford Tawng' a nih. Ama hi lekha inchukna tieng chu Churachandpur Govt High Schoolah pawl thum chen an chuk a. Sielmat Christian High Schoolah pawl ruk chen a zo nawk a. Bethany High Schoolah pawl sawm a pasi. A naupang lai hun le tlangval hun sung po po Saidanah a hmang a nih. Pi Mannieng leh kum 1972 khan an innei a, nau pasal pahni le nau nuhmei 'Thangthar Tuonpui Hmeltha' ti khawpa hmeltha an neih. Anni nupa hi tu mawng benin tuhin Saidanah an khawsa mek.

Pu Sawnglienthuom hi pa khawsawt thei tak ani zie chu a hlaphuokhai hin an sukchieng hle. Hla a phuok tam nawh a, a phuok sun hai hi a hun laia lar em em le vawisun chena sak hlaw tak laia mi an la ni zing. Lenruol Hlabuah(LH) hin a hlaphuokhai pali a chuong a. A hlaphuokhai hi kum 1967 lai vela a phuok deuh vawng an nih. Khang lai hun khan Vai Hla thluk hmanga SAI HLA phuok an ching zuol lai a nih. Pu Laltlansang, Pu (Upa) Darkamlo, Pu Lalruotthang le mi dang iemani zat zetin SAI HLA tha tak tak Vai Hla thluk hmangin an mi lo phuok pek a, vawisun chena sak hlaw tak an la ni zing. Pu Darkamlo-in "Aw di, aw di, lungrunpui" (LH.214) ti a phuok lem hin chu Zoram khawvel a fang suok a nih tak. Ka Pu L.Keivom meuh khawmin "Dawn ve la, nunhlui thamral hnung"(LH.158) ti hi Vai Hla thluka a phuok ve ngat a nih. Ti ema chu Mizorama SAI HLA phuoktu hmasa Pu Lalzova, Pu Vankhama le mi dang dang hai khawm khan Sap hla thluk an lo hmang ve nasa hle.

Zoram khawvela hlaphuoktuhai laia Pu Sawnglienthuom danglam bik rieuna a um a. Mi dangin an ching ngai lo, Vai Hla thluk hmanga a phuok po po deuh thaw hi pasal le nuhmei insaksawk le sak ruol dinga a phuok hi a nih. Mi dang Vai hla thluk hmang hai chun nuhmei-pasal sak ding ti an thlier bik nawh. Pu Sawnglienthuom hlahai hi chu HSA inkhawmpui changa lemchangna (drama)-ah hai khawm sak an hlaw nasa hle. A hlaphuokhai a hmatiemin hei belchieng ei tih leh.

"Dawn tam suihlunglengin ka thlir che hi"(LH.166) hi a phuoktu L.Kiemlo tiin ziek a nih a, sienkhawm Pu Sawnglienthuom chun ama phuok a nih thu a mi hril. A chunga ei hril tah angin a hla thu le chang, pasal le nuhmei sak insawk le sak ruol ding a siem diem a, a thumal hmanghai khawm hi ama kamsuok ngei an nih. A hla chang thenkhat chauh zuk tarlang ei tih,

P.-- I hlim thla ka pawm kawp lai di angin,

N--Chantawk hi chu! PN--Aw ka tuor zo nawh!

P-- I dawn lungrukah kimten dawn la,

N-- Nang ngei khawm thiem inchang ka ring nawh!

PN-Ka lungriem mitthli leh ka ko che!

Nunghak le tlangval hlasak thiem ve vein Vaitingtang deuha video-ah insaih puma an hei sak hei en lem chun, mit a tlaih a,.Bollywood hran ei ngai tah nawh.

Lenruol Hlabu 173: 'Sangpui ka ko che' ti hi Pu Sawnglienthuom chun a phuok a nih naw thu a mi hril. LH.175: "Ka ngai em che" hi Pu Sawnglienthuom-in kum 1967-a a phuok a nih. Hi khawm hi Vai hla thluk hmanga nuhmei le pasal sak insawk le sak ruol dinga siem a nih. A hla thuhai hi chang khatna inthawka a tawp chen ei en chun, lo inngaizawng le inhmangai em em, Lal Solomon tawngkam, tawng khuoizu inhlanin, nau anga tanglaiah a pawm hnung le 'biethu ti'n tiema a tuoremsa, an thepui nawk, a ngai zie a phuokna a ni tak. Chang thumna chauh hi zuk la sawng ei tih:

P--Nun hlui ka ko, kir rengin mawi nawh,

N--Aw, ei lawm lai nia i sakhmel hlim;

PN-Vawikhat bek dar ang tawng nawk thei chang sien,

PN-Aw, ka ngai em che a nih, Parte.

Pu Sawnglienthuom hin "Hril le tawngkam thiem ka ni si nawh a" ti de sienkhawm, a. hla thuhai hi a tha thei em em. "Sakhmel tuokin singmit luoithli nula", "Et ram tuonnahai ka fang chang ni hin, Singmit luoithli nulin ka um hlak a" tiin a hang insam a, "Mitthla'n innui hieua dar ang tawngin, Nau ang ka pawm che tanglaiah" a hang ti dam hi a mawiin ngaituona a suksei.

"Vawitam biethu ei tiem" (LH.183) hi Pu Lalruotthang phuoka zieka um hi Pu Sawnglienthuom-in kum 1967 laia a phuok a nih. Hi hlaah hin chu nuhmei le pasal sak bik ding a the naw tlat. A thu umzie enin hi hla hi chu a phuoktupa'n leng dang sai a nuom naw zie, hmangai dang a nei naw zie le a ngaizawngnu the tum naw zie a hrilna a ni tak.

Aw! Nunkhuo ei nuom lai,

Aw! Sam ang inthe zai;

Aw rel loin par ang,

Vul zai rel nawk ei tih.

LH.211: "Ka ngai em che" ti hi Pu Sawnglienthuom-in kum 1970 laia a phuok a nih. A hlaphuok danghai ang bawkin nuhmei-pasal sak ding a the diem a. Ama hril dan chun hi hla hi a ngaizawngnu a phuokna, hmangaina par an tlan lai, inthe lo dinga thu tiema, vanglai hun an chen laia a phuok a nih. Tum khat Delhi tlanga insukhlimna ruoi nei tuma Pu Zaituokung-in felhet lukhumpar khuma, rawl thum huma, "Lungdi" ti'n a hei insam a, Pi Rosylin-in a mit khu hmiei a, "Lungrun"ti'n a hei dawn let a, an pahni'n: "Aw di-i-i ka ngai em che, Nang naw chu lunglai hnemtu an um nawh, Ka di, ka ngai em che" ti a ruola an hang sak zo zet chun, tu khawm a thung thei an um ta nawh. Hi hla zet hin chu atar azur chen khawm a sukhlim a, mani umna sengah an lo insawi duol duol el a nih. A chang danghai:

Nangma ngaiin sunni kan tawi hlak a,

Dawntu um loin i hming ka ko hlak;

Aw hmangai mi zuk en la, mi hnem rawh,

Dawntu um loin i hming ka ko hlak.

Hril mei an nawh, ka ngai em che a nih,

Neisun hmangaina le ka hung pan che;

Ngai naw lai i um nawh, lawmna Parte,

Neisun hmangaina leh ka hung pan che.

Oriflame nalbuong chi hran hran nal le Paris rimtui inchulin, a kawppuipa liengkoah a nghei a pha hnepa, a kawppuipa'n "I sakhmel enchimlo a mi run ngei" a zuk tia, an pahni'n a ruolin, "Nang naw mi suklawm thei reng an um nawh" ti'n an heih insep sawi a. A thunawna:

Aw di-i-i, ka ngai em che,

Nang naw chu lung lai hnemtu an um nawh;

Ka di! ka ngai em che.

I sakhmel en chim lo a mi run ngei,

Nang naw mi suklawm thei reng an um nawh;

Leng dang thlir naw ning nang chauh en ka che,

Nang naw mi suklawm thei reng an um nawh-

Hmel hlim suoua, insuh duol duola heih lam dam kha, a man hisap seng a nih nawh. Hi hla hi chu a bula inthawkin a tawp chen a tha tluon suok par ringawt a nih. Ei thu le hla kungpui Pu Thangsawihmang Sawngate chun hieng hin a lo ziek a: "A hlaphuokhai hi Hindi film hla angin nunghak le tlangval intukna (insaina) hla deuh vawng an nih. Chuleiin an chuoi thei nawh. Tulai chen khawm hin TV local channel ei en chun, nunghak le tlangval ama hlaphuok sakin an intuk a, a hla thu zir ang peiin an inkuo vak, a inthe nawk vak, a en an hawih a, mit khawm  a tlaih a nih. Chuleiin ama hlaphuokhai hi Hindi film ei ngainat sung chu, chuoi ni nei ngai naw ni hai. Chun, a hlahai hi TV local channel-a sai hla (lengzem hla) suklartu le sukhausatu niin ei hriet".

Ei hriet seng angin, mi tin deuh thawin ei dittak le ei hmangai tak nuhmei/pasal ei innei kher nawh. Heih intiem chie inla chu, "Luahlo Lungdi" nei pawl hi a tam lem an ni el thei. Pu Sawnglienthuom khawm hi a ngaizawng hmasa tak leh khum hmun khatah salin dam lai nun hi a hmang ve nawh niin an lang. A tuolto thlukin hla pakhat char "Dawntam I suksei vawng vawng"ti a phuok hin a sukfie. A chang tawp taka hieng hin an sam a,"Ka pawm lai di nek khawmin ka ngai che" tiin. Kei chun hieng hin Pu Sawnglienthuom hmai sana kan dawn a,"A thu umzie enin, nuhmei i nei hnunga i phuok a ang bak a," ka tih a. Ama chun, hi hla a phuok lai hin nuhmei a la nei naw thu le a phuok khumnu Saikawt nunghak hming chen a mi hril a.(Mi nuhai an ni ta leiin a hming ei ziek lang naw a nih). Hi nu leh hin "tangnema inpawma thu tin lo inhril ta si, hnungkir ta hnung chu "Nau ang mi pawm nawk el rawh" tia inrieng taka a kona hla a nih. Hi nu a the hnunga, a ngaizawngnu a pawm lai mek nek khawmin, ama nu bawk hi a lungdumtu tak a ni zie "Ka thlang tak chu nang chauh i nih, Lam ang hung letin nau ang mi pawm nawk rawh" ti hin a sukchieng hle. Hi hla hi LH-ah a chuong ve naw leiin a hla pumpui zuk tarlang ei tih:

Nunhlui muol liem hnung ka hang dawnkir che chun,

Ka ngaina che dawn lungrukah a hung zuol;

Dawn tam i suksei vawng vawng ngei,

Sulhnung ka fang lem chun, ka ngai zuol ngei che.

    Bawite! Bawite! Ka ngai em che,

    Lenruol le tlangrel chena hlim lai ni;

    Riel ang an ral el ding chu, ka ngai ngam naw,

    Dawn tam i suksei vawng vawng ngei;

    Dawn tam i suksei vawng vawng.

Mitthlain ram tuonnahai ka thlir lem chun,

I dang chuong nawh, ngai nekin ka hmangaih che;

Tangnemah pawm lai biethu tin,

Riel ang an ral nawh, nang ka hmangaih zuol che.

Zan lungmawl le ei Lalpa niah hlim le,

Indi suihlungruola leng lai thu tin di;

Kimten lungrukah dawn kirin,

Ka the naw che, nau ang lengtuo rel ei tih.

Ka pawm lai di nek khawmin ka ngai che,

Kei chun ka ni tin el hin ka ngai zing che;

Ka thlang tak chu nang chauh i nih,

Lam ang hung letin nau ang mi pawm nawk rawh.

    Bawite! Bawite! Ka ngai em che,

    Lenruol le tlangrel chena hlim lai ni;

    Riel ang an ral el ding chu, ka ngai ngam nawh,

    Dawn tam i suksei vawng vawng ngei;

    Nau ang mi pawm nawk el rawh.

Hi hla hi Pu Lalbieklien Saikawt valin fawn hlep hlepa, video-a a sak lai enin I lo ngaithlak tam? Lo ngaithla ve reng ta; a thluk le a thuhai hi an chawi tawk bawk a, thu le hla khawvelah Pu Sawnglienthuom-in hmun insang tak a hluo ve zie hriet chieng pha ngei i tih. Hla a thluk that leia tha amani, a thu that leia tha amani khawm hriet an tak. Hi hla hi chu a thluk a tha bawk, a thu a tha bawk. Hi hla chauh hi lo phuok sien khawm, Pu Sawnglienthuomhin chawimawina nopui dawm a phu hrim hrim.

Pu Sawnglienthuom hlaphuokhai reng reng hi ei bi chieng a, thumal harsa pakhat khawm a hmang ve nawh. Thumal tlanglawnhai hi thiem tak le fie takin a hmang el a nih. Ama hi daktawr mi at thiem (surgeon) le tekhi rem takin ka hriet. Surgeon chun chemte le sakawrbakchep ngei tak hmangin, phingpui, lung, thin le kal chen a nuom dan danin a at hlak. Chuong ang deuh chun Pu Sawnglienthuom khawmin thlarau le lungril, zung le zam fang thei khawpin thumal tlanglawn tak tak hai a zuk rem khawm el a nih. Chuleiin, thu le hla khawvelah hin Pu Sawnglienthuom-in hlaro, rohlu chuoi thei ngai ta ngai ta lo ding a mi maksan pek a. Pathienin a hringnun suksei pei sien, hla dang khawm mi la phuok belsapek sien ei va nuom de!. Pu Sawnglienthuom dam sawt raw se.

(Canchipur, 10 September,2015)

By Ramthienghlim Varte

Mihriem hi rannung anga a ruol ruol a inpawl (social animal) le khawsa a khawtlang dan le dun mumal tak leh chengna le umna hmunbik neiin khawvel hmun hrang hrangah Sungkuo bing bingin ei um tlang a. Ei ni khawm ei khuo le veng-ah Hnam-khat tawng hmunkhat khawm ni inla Sungkuo bik neiin ei khawsa a. Chuleiin, Sungkuo le Kristien Sungkuo a pawimawna Kum 2007 khan ziekin Khawnvar Le Thuhriltu Journal/Magazine-a insuo ani tah nghe nghe. Tuta tum ruok chuh Mihriem Nunphung hung intan dan le bulthut, chutaka inthawka Sungkuo hungsuok danhai hi hrietchieng a pawimaw hle’n ka hriet a, Mihriem tobul le insiemdan mithiemhai tlirna tukver ah tanin tawite te’n hei suklang tum ei tih.

EVOLUTION THEORY :

Scientist-hai chun leihnuoi hi Kum Makteduoi 400 B.C. neka upa ni dingin an zeldin a. Kum Makteduoi 300 B.C. laivel khan khawvel hi hringna nei pakhat khawm um lova re thuop anga ngaiin chuhnung kum iemani chen a thilhring chite a hung inlang a, chu Bacteria tiin an inbuk a; Mit lawnga hmutheilo, Enlenna (Microscope) hmanga hmuthei hringna nei an nih. Chu thilhrik chite inthlapung peiin umna/chengna boruok angin piengphung hrang hrang nei a chi intlasawngpei ni dingin an ring. Chu hung inthlakdanglam pei chun thilhring danglam le mak tak tak an hungsuok a chuonghai lai a Ransa ke pali nei le piengpui varna nei Mihriem le inhnai hrietthei hmasatak chuh Mammals hi a nih. Hieng rannung-hai lai a nau pai a hringve chi, Nu nenetui a chawmlien Kut, Ke, Lu, Thluokbawm, Thin, Chuop, Thisen lum nei Ransahai chuh ani leiin Animal (Ransa) tiin an inbuk tah a nih. Mammal eiti a khawm hin piengzie in-ang naw, Sungkuo chi tum tum an hungsuok nawk pei a.

Hieng Ransa ( Animal) eiti hai hih Kum Makteduoi 64 B.C. laivel khan khawvel an hluo tan a, an ni lai a var tak chu Zawng chi hi a nih. Zawng hi chi hrang hranghai hi a huhouva (Group)/Sungkuo a khawsa chuh an nih ti vawisun chen khawm hin hmutheiin an um reng a nih. Hun iemani chen hnunga Zawng lien chi thenkhat Chimpanzee, Gorilla le dang danghai chuh Thinglera khawsa talovin hnuoia fak zawngin, Ke pali-in an lawn phawt a, chu hnungah Ke pahni-in an hung lawn tan nawk a, an Ke hnungtieng chuh lawnnaa hmangin, an hmatieng ruok chuh nuom nuom thawtheina le hmangruo siemna Kut-in an hung hmang ta pei a, a tawp a chun Mihriem angin an hung ngir-tlun at thei tah a. Chuh, Mihriem hmasa HOMO ERECTUS (Homo-Mihriem, Erectus-Ngil)/APE MAN tiin chuonglaia a var le hriet lar deua ngai an Ru hieng- Luru, Malpuiru, Khakru, Kut le Ke ru-hai an hmu/chosuokna hmun dungzuiin an hming an siem pekin hieng- Java Man, Peking Man, Nebraska Man, Piltdown Man, Neanderthal Man le dang dang ti a hung nih.

Chuleiin, Zawng Sungkuo hi Kum Makteduoi 27 B.C.vela um ni dingin an ring a. Hun a liempei a, kum 40,000 B.C.vel liemta khan an khawsak le nun a changkang ta vieu a. Chu inthlasawngpei chuh Mihriem nun intanna a hung ni a. Kum 12,000 B.C. hnungtieng lem khan chu Lo neina chang hrein Wheat, Barley, Maize dam chingin Beram dam Kel dam vaiin an khawsa ve ta a. Chuleiin, Baibul puotieng suinaa inthawka tlir chun Mihriem nunphung le Sungkuo intanna hi Kum 8000-7000 B.C. vel khah ni dinga ring a nih. Mihriem chanchin suitu (Anthropologist) hai khawmin Mihriem nunphung le Sungkuo (Family) a hung intanna le hungsuok dan hi chipchier deuvin an sui dawk thei bik chuong nawa chuh khawvel inthlakdanglam peiin a hung relsuok ngei chuh an ringdan a nih. Sungkuoa inenkawlna bik a um hma chun ransahai ang bawkin mumal umlo takin nuhmeiin nau an nei khawma Pa bik umlova nun inpher neinuoia um hlak khah, nuhmei-pasal bik neia nauhai le khawsakna ding ngaituo’n Puk le hmun remchang zawngin Ransa dang laka invenghim nachang le mumal nei taka Sungkuo siema khawsak relna chang an hung hriet ta pei a nih. Hi Evolution Theory-a Mihriem hung intan dan le Sungkuo suok dan an ring le hmu dan tlangpui a tawi thei anga ei hei tarlang chuh a nih.

CREATION THEORY :

Mihriem Zawng thla nia suisuoktu Charles Darwin le mithiem dang danghaiin an pawm thei derlo chuh Baibul-a ei hmu ‘A tirin Pathienin hnuoi le van le a sunga um po po a siem a, Nikhat a inthawk Ninga sung khawvela thil um po po a siem zo vawng hnungin ama angpui Mihriem Adam le Evi (pasal le nuhmei) nupa a siem’ ti hi a nih. Chun, Mihriem a siem ruol ruolin Sungkuo hmasatak an din pek nghal bawk a. Mihriem a siemhai umna dingin Eden huon a buotsai pek a; Chutaka chun inhawi takin an khawsa a, theira chitinreng hnieng-in-hnar taka an fakding a buotsai pek bawk. An sungkhuo khawsak danding chenin a rel pek a, thaw ding le dingnaw, fak ding le ding naw, chu chau nilovin khawvel a Ransa le thil dang danghai chunga thuneina khawm a pek a, mal a sawm a, a Mihriem siem Adam le Evi-hai nupa chuh an chetdan le an Sungkuo khawsak dan chuh a hmuin a lung a awi a, tha a ti bek bek a, a en nghawk nawh a, an kuoma um zing a nuomin, a kan hlak ti a nih.

Amiruokchu, khawvel mithiemhai tlirna tukver hi Baibul thiem tamtak haiin tlawp naw hai sienkhawm a tirin Pathienin Hnuoi le Van a siem a (Gen.1:1) ti hi an ring naw lei ni lovin Gen. 1: 1na le Gen. 1: 2na inkar hih kum zabi zawng a sui khawma hun sawt tak ni dinga ngaidan an nei ve tho. A san chuh, a thilsiem duthusam le thafamkima a ngai chuh Setan (Lucifar) suktlawmna dingin Hnuoi le Van a siem chuh suksiet vawngin a um a, hremna namenlo tuokin Zingtieng naupa lei chun Hnuoi le Van ruok huoiin a hun sawt tak a sie hnung a Gen.1:2 hin a sunzawm anga ngaidan an nei a, chuh, GAP THEORY ti a nih. Chun, mithiem haiin DAY AGE THEORY an ti Niruk sung a thilsiem khawm hih “Nang a ngai chun Kum sangkhat hi zan vengkhat ( Nikhat) sung ang chau a nih (Sam No. 90 : 4) “ ti le “ Lalpa ngaia chun Nikhat khawm Kum sangkhat ang a na, Kum sangkhat hi nikhat ang chau a nih” (II Peter 3:8 ) ti a ni si chun hi theory nikhat a ti hih Kum sangkhat sung pei khawm a ni thei leiin Niruk ati hih Kum 6,000 vel khawm thil ni thei dinga ringna nei pawl khawm an um ve tho.

Chun, kum thua hin Scientist-hai sui anga Kum upat dan sui thei dingin Baibul hi ziek a ni ve naw tlat leiin ‘a tirin’ tihi innghatna ding chu ni’l a ta. Ei chengna khawvel upatzie ei mithiem (Scientist) haiin Mihriem le Sungkuo insiem tanna hi Kum Vaibelse tamtakin suisuok hai sienkhawm ‘a tir’ ti neka upa hi a ni thei chuongnaw leiin khawvel mithiemhai suidan le khaikhin dingchun ‘a tirin’ ti chu an bul lem hrim hrim a, mithiemhai tlirna le ringdan po po a pei/hnawl tlak vawng ni’n an lang.

Iengkhawm nisien Mihriem nun intanna le Sungkuo insiemdan a chunga Theory pahni tlawmte te ei hei tarlanga inthawk Creation Theory Baibul-a ei hmu neka inril le chieng fek fawka inziekna chuh khawvel mithiem haiin ramtin ramtang kei fanin thaw hai sienkhawm belchieng dawl, hmu theia ziek le zawm ding Evolution Theory-a hin a um nawh a. An suia an ziek rawn po leh pawm dan, ngaidan le inselna a tam a, a buorchuorin a dal deu deu el. Chuleiin, Mihriem nun le Sungkuo chanchin sui ding chun Creation Theory/Creation hi ei pawm ding le Sakhuonaa khawm Christien-hai thuring bulpui chuh a nih.

SUNGKUO (FAMILY)

A chunga ei thu inbuonpui le inzawm hin Mihriem hi khawvel hluobit tuding le a chunga rorel dinga Pathienin alo ruot ei ni leiin Sungkuo bik nei a mumal um taka khawsa ding le cheng dinga ami siemhai ei nih. Chuong nilovin ka Nu, ka Pa, ka Nau ti bik umlovin mani tlat tlatin mumal um der lovin khawsa/tla ta mur mur inla Ransa-hai ang mei meiin inditsakna, hmangaina, lunginsietna umlovin ‘A ru no no suok’ thaw’n insuol, inhal, invuokhlumna/inthatna tam a ta, pung hratnaw hleng ei tih. Entirnan – India rama khawm Andaman and Nicobar-a Jarwa, Shampen hnam hnufuol, Sawrkar thangpuina khawm hmang tangkai nuomlova ning ninga khawsahai hi an population pung nekin tlawm tieng a panpei a, Jarwa hai lem chuh an rengin 600-700 bawrvel chauva ngai an ni tah.

Chubakah, mani a fak zawng theilo Pitar, Putar damnaw natna khirkhan nei le piengsuolhai tading lem chun thi nghak seng seng rin a um zuol hle ding ning a tih. Chuleiin, Mihriem hi khawvela thilsiem po po chunga rorel dinga ruot, ama (Pathien) angna neia siem, a hringna intawmpui eini leiin rorelna mumal tak nei a inrem tlang diel diela Sungkuo indin a inhawi taka nun chen a van nun intem-lawkna ding a Pathien thuruk inthup le a thiltum chuh a nih.

Chuongangin, nunphung umzie nei, nundan mawi, khawtlang rorelna tha le thildang Mihriemin ei mamaw zuolhai chu Sungkuo inchuktirna ah an tan phawt a tul leiin khawtlang nun inchukna (Sociology) tienga mithiemhai chun ‘Mihriem Ransa-hai neka ei hlutna chuh hieng- Nundan tha le mawi, Inza umna, Hlutna, le dang danghai hih ana, chu Inchukna School pawimaw hmasatak chuh Sungkuo hi a ni a; khawvel hi Mihriem chengna dinga siem a, chengna tlak a inbuotsaina hmun/institution pawimaw tak chu Sungkuo (family) hi a nih’ an tih. Chuongangin, “Sungkuo eiti chu a bika in-enkawlna Buzawl nei, chengna hmun bik um a, hotu pakhat rorelna hnuoia mi iemanizat um khawm hi a nih”.

SUNGKUO ( FAMILY) CHI HRANG HRANGHAI :

Anrian Wilson chun ‘Thisena inzawmna nei le khawtlang dan siemin a phuor tang tlat, hmunkhata cheng, fak le dawn a sem sem dam dam thaw a, in khata inlawi hlakhai hi Sungkuo’ (family) a ti bawk a. Chuongang chun Sungkuo ro-in-rel dan hi khawvela hnam chi hrang hrangin ei hmangdan an angnaw a, hieng a hnuoia anghin.

i) Hnamkhat, thlatu hming chawia suon thumna chen Sungkuo pakhata tiem pawl an um a, chuh Sungkuo huopzau/lien (Extended family) ti a nih.

ii) Sungkuo Nu-pa le nau hai chau chengna insung a um a, chuh Sungkuo hlang/inhlir (Nuclear family) an tih.

iii) Sungkuo Pa lutak ni a, nuhmei nau le insung thuomhnaw pasal thuneina pahai hnam nuhmei le nauhai intawmpui a um a, chuh Pa thuneina Sungkuo (Patriarchal family) an tih.

iv) Sungkuo Nu lutak pasal le nau le insung thuomhnaw nuhmei thuneina le Nu hnam pasal le nauhai intawmpui a um nawk a, chuh Nu thuneina Sungkuo (Matriarchal family) ti a ni nawk a.

v) Sungkuo nau pasal upatakin nulepa chanvo changa rorelna insung a um nawk a, chuh Nau Lutir thuneina Sungkuo (Fratriarchal family) ti a nih a.

vi) Sungkuo memberhai thuneitu bik um chuonglo, pa ruokchu nu neka thuneina insang lem nei patriarchal family ni si lo a um a, chuh Thuneina intawm Sungkuo (Egalitarian family) ti ani nawk a,

vii) chun Sungkuo memberhai mimal zalenna nei a um bawk a, chuh Mimal zalenna Sungkuo (Atomistic family) ti a nih.

Hienghai naw khawm tamtak a um. Eini ruokchuh Sungkuo Pa lutak ni a nuhmei nau, ro thil le insung thuomhnaw Pasal thuneina le pahai hnam nuhmei le nauhai intawmpuia um, Pa thuneina Sungkuo (patriarchal family) chu ei na, Baibul-a ei hmu angin khawtlang le Sakhuo thil kawng iengkima roreltu ding le hmathuoitu ding chuh Pasal ei nih.

PATHIEN SUNGKUO :

Sun hun a hmun hrang hrangah sinthawin ei fe khawm a, zantieng mani chengna hmun sengah Sungkuo bikin ei inlawikhawm nawk diel hlak hin vantlang le khawtlangnun a suk thienghlimin nun venghimtu thatak a nih. Chuleiin, Thutlunghlui hun a, Biekin ala um hma lem khan chuh Sungkuo nuna inthawk Kohran hung piengsuok a ni leiin Sungkuo le Kohran hi Pafa anga pumkhat an nih an ti hiel.

Pathienin Sungkuo a lo remkhawm dan hi an thuk em leiin insung khawsak relfello chun Kohran le khawtlang nun an fuk thei tak tak ngai nawh. Sungkuo neilo Ransahai chuh an hung piengsuok a, hun sawtnawtea inthe darin, an nuom nuom an inse-khek hlak. Mihriem ruok chu ei hung piengsuok a, Nu mal chunga Kumli vengvawng hmangai le duot takin nundan mawi, nungchang tha le thiltha an hriet taphawt an min chuktir a, ei chengna khawtlang, nundan le chetdan ang dungzuiin ei hung inthanglien hlak. Chuleichun, Sungkuo Skul (Family Institution)-a Zirtirtu pawimaw le naupang ta dinga an Inchuk Bu le Nun Robu pawimaw tak chuh Nu le Pa anni leiin ei Baibul khawm hi Sungkuoah a tan a Sungkuo bawkin khar a nih.

Nunghak-Tlangval inditna hi suol a ni nawh a, Pathien remruot a ni lem. Chuleiin, Pa thuneina Sungkuo (patriarchal family) ei nih a, Pathien remruotna a Nuhmei-Pasal innei a Pasal chu alu tak le roreltu (Head of the family) ni’n Sungkuo hi indin a nih. Pasal le Nuhmei mihrang dai Nupa pumkhata siem, man le muol inpek lei el khawm nilo inhmangai le indit em em, Pathien hming lama kut insuina, Pathien Thutlung SA-Ui ei tanna ang a ni leiin ‘Pathien Sungkuo’ ei nina dinga thuruk inthup, hmu theia Lal remruot le vanram hawl phak a Pathienin a nina an puongsuokna tak tak a nih tihi hre a, Lalpa ditdan anga Sungkuo ditum ni dingin ei inbuotsai a pawimaw. Pathien Sungkuo ni dinga a naua inbuk ei ni si a.

By Prof Lal Dena

Switzerland map ei en chun Zurich khawpui chu hmar tawp tienga um a nih a. Geneva khawpui ruok chu sim thlang rawta um a nih. Zurich Airport-a inthawka Geneva ei pan chun Switzerland ram zatve hmawk ei paltlang ang a nih. Switzerland-ah hin a tuolbawm ram France le Germany hai angin phaizawl incham dei duoi hmu ding a um nawh. Lampui intluonin muol insang rak lo deuha lam lien a fe a. Chun, Geneva-ah ka um sungin ni li zet chawl a um leiin, Strasbourg (France)-ah Good Friday le Easter Sunday hmang dingin ka va fe a. France le Geneva inkarah vel thum kan lawn hman hiel. Tlang le muol kar deuh ruoka rail lam khawm a fe a, hmun iemani zata tlangver a um bawk.

France le Switzerland ramri taka Basel khawpui a um a. Khawpui hlui ve tak a ni lei amani ding museum a tam a, 'land of museum' ti hiela hriet a nih. Kunstmuseum, Dolihouse Museum, Museum Tinguely, Basel Minister le Swiss Architechture ropui tak tak hmu ding a um. Basel hi Geneva le Zurich dawttu a nih. Reformation hun lai le a hnung tieng peiah khawm Christian sakhuo hmun pawimaw le World Church leader-han "Basel thupuong" tia ro an relna hmun a nih.

Basela nek hmanin Geneva-ah museum a tam lem a hawih; museum sawmthum le art galleries iemani zat zet a um. Khawpui sungah hin park inhawih tak tak pangnga a um a. Gare Cornavin (Rail Station) hmun laili taka a um a, khaw tieng fena ding khawma a remchang leiin sin nei naw chang ka leng deuh zing. Tum hni zet direction kan hmanga, nisa a chang leh ka hmasuona, a chang leh ka hnungpuoka, ka nuom lei ni der loin France ramri bula Airport chen tum hni zet ka fe. Nupui bus khaltu motor bawk ka zui nawk a, UN building bulah ka tuma, chutaka inthawk chun ka tlungna chu ka zawngsuok thei hram.

Ni khat chu sun ni thlaka lengna ding ticket ka lak a. Bus stop tina ticket lakna khawl a um vawng a. English channel ei khika, ei fena ding option a man leh a hung inzieka, pawisa'n ei pek nuom leh pawisa ei thun a, a bang po a mi let a, credit card-in ei pek nuom khawma, a remchang hleih hleih. Ni khat chu tum bik nei loin tram pakhatah kan chawmlut a, a tawp rawt chen ka chuong a, mi po po an tum vawng tah a. Driver-in iemani a hung hril, ka tum ve chawt a. Ka tum hrim ni lo, Korean le Thai tourist-hai leh ni khata ei hril Univers de particles ka en pha ta a nih.

Geneva hi 'a tak'nina hi iemani zat a nei a. Ni khata Geneva Lake ei hriiah khan khawvela tui inkhawdawk insang tak a um a. Holiday hmangna le entertrainment tienga

World class top rank a lak bawk a. UN palaihai le international organization-hai palaihai fe khawmna a ni leiin khawpui sengso (most expensive cities) pathum laia pakhat a ni ve. World Happiness Report tum thum thaw a ni tah a, tum thumnaah khawm Switzerland hin 'happiest country' ti title a la lak. Hma an sawn tawngkhawng tah a, hi neka hmasawn nawk dan ding hi a um chuong ta nawh ning a tih. An buoi pui tak chu hringna hlutna chawisang ni'n an lang tak. Hi kawngah khawm hin Zurich le Geneva chu an sang tak (topper) an ni ve ve (cities with the highest quality of life of the world). Anni pahni inkarah khawm Geneva hi a la chunghnung lem rawp.

Mi an ringum ning a tih. Bus stand-ah ticket la hman naw hai khawmin, bus lut chara driver hnung taka computer khawl ticket katna uma, ticket lak a ni nawk hlak. Hieng hi mania thaw vawng a nih. Mi an chek zen zen nawh a, chek pala ticket nei naw chu muolphona a ni bak a, inchawitir an ni hlak. Tum khat Basel le Strasbourg inkara ka rail ticket an chek nawh a. Geneva ka sucksan ding tumin ka hmang nawk heuh heuh. Keia suksuol ni lo a.

Switzerland hi European Union-ah member a la ni nawh a. Amiruokchu, Schengen European country- hai laia inzawmna Schengen Treaty dungzuiin member pakhat a nih.

Chuleiin, Schengen country pakhat phawt phawta visa i hmu chun, a dangah khawm visa hran ngai ta loin i lut thei vawng tina a nih. UK ruok chu European Union- ah member a la ni naw el baka, Schenghen inzawmnaah khawm hin a la thang nawh. Tuta tuma parliamentary election- ah khan Conservative party an hrat leiin European Union-ah chu member an la ni vak ring a um nawh.

Ngaisang um em em zawm ve thei inla chu hun an hmang dik hi a nih. Bus, tram annawleh rail a ni khawma, an hung hun ding bus stand/rail station-a an ziek ang thlapin a minute chenin an hmang dik a nih. Biekin inkhawma le vantlang inkhawma hai hun hmang dik ve ta inla chu hmasawnna pakhat chu ni ngei a tih. 

Hnam dang dan thahai la veng ei tah,

An dan suol thik loin;

Ei ram lung  mawl indar hi,

Keikhawm tuma varna tha zawngin;

Hmatieng ke pen ei tiu.

(Tawnmang Mawl )

Ramthienghlim Varte

Nunghak Andy Rose le kan inhmelhriet hnunghin inngaina takin kan inbiek zeu zeu hlak a. A nungchang le a lungril ka hriet vawng nawa chuh, a hmel, a piengphung, a tawngkam inhmisal le innem riei ka hriet hnung hin chuh sawiselna ding reng reng ka hriet naw a, ka ta ding chun a tlingzo a nih. Chun le zuo nunrawng thlipuiin a nuoivel leiin a hmangai em em le an karah buoina sumpui a zing a; a hmangai tak leh nuom anga leng hmun khat thei lo, chu hmangaina Tupui-a inhlieu, pil vang vanga nun rinum tak hmang mek, lungril pangai khawm put thei lova um, nu lungsietum a nih.

Ama hi damlai lampuia lo tlusil tah hmangaina kuta kei tho tum nekin tlangram khuo kawtsuo bula Inkhieng thing a nuom nuomin an khaw, an deng, an sat, chilsak khum le sawisak ang; an khawtlang zanthima leng, mi sirde tlawk tlawk, chek ek le khiksaw a nih ti ka hriet hnunglem hin chuh a nun hih ka tuor puiin ka hrietthiem pui nawk zuol a. A chanchin a min zawt khum rawn po leh ka hmangaiin ka lunginsietna a zuol hlak. Nuhmei thenkhat mizie hi a mak bek a, bau le mit inro der lo, Beram anga nunnem lungril ruok chuh Malaria damdawi anga kha lo tawng tah ka ni leiin fimkhurna’n ka sip naw thei ngai naw a. Amiruokchu, keikhawm ama ang bawka damlai chirdum lo palve hrep tah, hmangaina no thlum tak khawm tur kha em ema hung inchang dan lo hrechieng tah ka ni leiin Andy vangduoina nopui hi dawmpui theitu ni dinga inngaina ka nei lei nin ka hriet hieng em ema kan inngainat hi. Kan thusep nuom an ang a, kan hei inbiek chang hin phurrik a zang huoi huoi hlak an nawm. Chuleiin, a lak a hin chuh ka khawnghat a tawiin ka mit an del a, ka fimkhur seng naw nih.

Vawikhat chuh zan Dar 12:00 velin a hung phone a, ieng thil am a ni ding tiin ngaipawimaw takin Mobile/Phone chuh ka pick up nghal a. A pa hi mi zaidam, tawng tam lo le mi inngaitlawm tak nisienkhawm an khawtlang nuhmei rorelna insunga khawsa, lungril intar taka um hlak a ni leiin a beidawng chang chuh a dawmve zeu zeu hlak a ni awm a. Hi zan hin chuh a lem rawn deu hlek lei ni mei a tih a nu le an inhal buoi thu a mi hril nuom leia mihung phone a lo ni zing a.

NU rorelna insung hi buoithlak deu el a na, an hnam innei danah nuhmeiin pasal an thuoilut lem a ni tlat leiin, Pa’n insungah thuneina changphaklo, thiltha thawding hre sienkhawm nu ngaidan an naw chun thawthei ni lo, insung thil le thuomhnaw reng reng nuhmei hminga um vawng a nih. Chuleiin, PA hin insungah thuneina an nei tlawm em em a, khawtlang le puotienga thawding a um ruok chun hmathuoitu pasal ni hlak ang reng si hi Kristien thuring bulpui leh khawm an kal tlata a ngai leiin a pa khawm an khawtlang nun hi a ngaidan a ni naw bakah a pawmzam thei lo tam tak a um a. Andy khawmin a dit naw leia pasal nei naw pha reng a nih.

Chuonga a nulepa insel ri a hriet chun room-a inthawk hung suokin tha taka um dingin a hril a. Lungawi naw deuvin a pa chun “I rorel dan indik naw le mumal naw leiin ei naunu khawm vawisun chen hin pasal khawm nei lo a ni hi “tiin chier pumin room tieng a pan a. A nu hi nu naran chung, ro rum tak el, an insunga ding chun Sakeibaknei ang a nih. An hnam nunphung hi nuhmei inlalna a ni leiin a tlangpuiin nuhmei hi an hrohrang a na em em a, pasal ngirhmun hi an hnuoi a, an rimsi em leiin an hringnun a tawiin Putar hmu ding an tam naw em em el hih hieng lei khawm ku hi ani’l awm de aw ti dam ka ngaituo a.

Chuongchun, a nu khawm chuh an room-ah lutin a pasal chuh rau pumin a riek khawm phal lovin, a hung nam suok a, an insungah buoina sumpui a zing a nih. Andy Rose chun a pa a lunginsiet em leiin a room-a inriek tir a tum hlak chun a nuom bawk si nawh. Common room-a khawvar nghaka um, a beidawng thu a mi hung hril a nih. A pa ti ang chun Andy hi a nu thu hrat leia a hmangai tak nei lo a ni leiin apa hin a khawvel nun hi a hriet puiin a lunginsiet a, thawi dam tumin kawng hrang hrang dapin a hnem hlak. Insung nei nung, hausa, chang kang, nuom nuoma in-vilik le dit dit nei thei ni inla khawm a sunga chenghai thu le hla an vuok fuk naw chun Tingtang her mil lo angin a ri a sie a, nun hi rin a um a, bei a dawngin hremhmun intem lawk ei ni zing hlak ti dam ka ngaituo neu neuvin a pawi kati pui em em a, keikhawm ka in thei bik nawh.

TAWNMANG MAWL:

Hun a liem pei a, keikhawm Ofis thil le inzawmin Kolkata, Nagpur le Mysore-a inzinin ka thang hmang nawk a, hi sunghin chuh chanchin kan inhrietpaw bek naw a. Ka sinthaw dinghai ka thaw fel vawng ta leiin vengtienga hung dingin kan siem a, hi zan hin mang mak tak el ka nei a.

Ka mang chun “Ka farm kan dingin ka lo suok a, lampui ka fe lai chun Andy Rose’n ka Farm hi hmu nuoma fe dingin a mi fiel hlak vei leh, vawisun hin hungve sienla chu an hawi awm de aw ! tia ngaituo neu neu pumin ka tlan pei a. Ka Farm Gate ka tlung chun nuhmei pakhat a lo ngir a, a sam thla hrep-hrupin a hnungtieng a min nghat tlat a, ka Jeep khal chuh chawlin ka en ta zing a, hun iemani chen hnungah a hung ngha a, mi lungsietum Andy Rose a lo ni zing el. Motor-a inthawk ka tum a, Gate ka hei hawng tum chun tawng lovin a mi lo hawng pek a ‘Hung lut rawh’ ti ni awm takin kut a hung vai a. Ka hei biek hlak chun a mi dawn nuom der nawh. A hmel chuh thil ngaituo rik tak nei angin a hlim naw hlea chuh a hmelthatna hi ka mita ding chun a chuoi chuong naw a, ka tading chun Rose parmawi tak ang a ni zing a. A rawlmawi le innem rieiin inphisala a mi hei biek changhin ka dam sawng sawng hlak a nih.

Ka hmaa chun a ngir a, a mi en vawng vawng a, a biengah mitthli hung luongsuokin a tap ta ngawi ngawi el a. Andy iem! ieng dinga i tap am, a san mi hril rawh ka ti a, chungtieng a khik ringawt a, chun vantieng ngha’n a kut a phar a, a tap sunzawm pei a, ka lunginsiet taluo leiin kan sumzo hlawl naw a, a beidawngna hnem tumin ka kuo vawng vawng a, ka tangnemah an bei a, an hniek fat fat a. Iem harsatna i nei, iengdinga hi lai hin ilo um ringawt ? tiin kan dawn nawk khawm chun mi sang lovin an hniek fat fat zing a, thla invaiin a mi kuo tawt tawt a. Lungngai der naw rawh, Andy, I harsatna po po phurpuitu ding kei ka um, hadam takin inbei rawh tiin ka thei ang angin ka thlamuong a. Hun iemani chen hnung chun a thuok le pangsa a hung re a, bo riei rieiin a chat thla tah a. Andy ! Andy ! Andy ! mi maksan naw “ tiin a ka khek suok a.

Chun, ka thanghar a Andy Rose hi nu vangduoi tak el a ni leiin a ringkawl bat hi rik a ti em a, a nun nghawkin a phurzo ta ngang naw a, khawvel var hmua dam zing khawm pei ta lovin beidawng-mangangna khel pielral rammawiah a thlarau chawl hadam rawng rawng lem ta dingin a hringnan khawvel a lo suoksan el tah dinga ringna lien tak ka nei tlat a; annawleh, keiin chu ngirhmun chuh chang lem dinga a mi lo hmu lawk pek lem am an ta ding ti dam ngaituo’n ka in thei tah reng reng nawh.

Bengaluru International Airport-a inthawk ka hung vuong ding khawm chuh um inden lo tutin ka um pha a, ka Ticket cancel hiel khawm ka nuoma chuh an hnu velvawng tah bawk si. Lungril sawl le ngaituona mumal nei thei mang lovin Guwahati himtakin ka hung tlung hram a, chun kan tuok huoi a. Airport-a inthawk Shillong tieng panin kan hung tlan ta vang vang a, Nongpoh-a thingpui kan dawn a, chuzova muongchangin kan hung pei a. Umiam (Barapani) kan tlungin Barapani Nga an lo khai fer-fur rek a, Andy Rose kan chawk pek khah kala hrietzing leiin kan chawl a, Andy Rose biek hmasa phawt nuomin ka Mobile ka hei zawnga ka hmuzo ta reng reng nawh. Nongpoh-a sunghai ka phone khah ka hmang tawpna nin ka hriet a, midang hei intum dingin Driver pa le chau kan ni bawk si. A number bek khah lo inchik lang tha ding a na. Ka biek thei naw phingin Nga khawm inchaw ta lovin kan hung tlan ta pei el a nih.

In ka tlungin ka Mobile sukhmang ka hril a, ka thuomhnaw phurhai kan hei phawrdar vawng a, fiemthua an hril vet Hmeithai khuoa Sertan ding zawng ang el a nih, kan hmuzo der nawh, an hmang tak tak chuh a ni el. Ka ruolhai biek thei pakhat khawm ka nei ta naw leiin lung indenlo tuta zal tumin room ka pan a, in thei lovin khum chungah kan tal kan tal a, beidawngin ka thova ka in thei tak duoiin tin zal pumin ka hla dittak “I am sailing…. Across the sea..!!” ti Rod Steward sak ni lo lem Nk. Tracy Huang-in zun thanga innem rieia awmbawra inthawka sipliem a hung mut suok hem hem ngei khah damte ten ka ngaithlak ta lem a. Ka taksa khum chungah zalin ka thla ruok chuh a hla i zirin van boruok le tuipui chungah an leng vel a.

“Tuifawn insawk bur bur chungah, Damlai Lawngin kan tawl ,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,

Mu anga vuongin, luoithli leh lungngaina sumpuihai ner tlengin,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,

Nun Thlaphang khek le inrumna khel rammawi chu ngaiin,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,” Andy Rose

tiin suongtuona’n ramtin a dap kuol vel a, ka hriet naw kar zanmu chuh kan tuorem thei tah hram a nih.

RISANG MUOL LIEM :

Ka taksa bunga pawimawna nei le mi suk hrattu tak ni naw sienkhawm ka ngaipawimaw laia mi Andy Rose ka biek thei naw hin ka umdan a mi suk khawrin kan khawnghat khawm an mit sel sulin ka hriet a. Ofis-a khawm muong matin kan thung hlei thei naw a, a ruolnu Kong Anita number hlak ka lo inchik bawk nawh. Number pangai an rang thei anga buoipui el naw chuh thawdan ding a um nawh. Ka buoipui sunghin karkhat zet a liem hman nawk tah a. Ka mang khah ka ngaituoin ka lung hi a kap zuol a, mi hrietpui lovin ka chung hi rik tupin helhawl invawiin ka nun hi ka hmang a, phone call ka nghakhla tak nisi’n ka huphur ruk hle bawk a. A hmaa kan inbiek chang in-a leng dingin a mi fiel hlak a, a nu le pa lakah a Hembawk inchang lem pal kan lau leia kalo nuom naw hlak khah pawi kati thar ta em em el a.

Kalo tung em em ka huphur bawk Kong Anita’n a mi hung phone ta ngei a, “Iem i chang a, Andy chanchin i hriet am, Inzin kar a pa a boral ti hung hril che ka tuma chuh ka phone thei der naw che a, Andy khawmin a phone thei bawk naw che ni khah. A pa ruong an vuiliem hma po keikhawm kava um a, ka ruolnu lungsiet umzie hi chu aw ! A pa hi a lungngai-beidawngna le harsatna iengkim an tlunna a na, ata ding chun vanpui chim ang a nih“ tiin. Chuphingleh, ka Mobile sukhmang le ka beidawngzie ka hei hril mawl mawl bakah ka manga ka hmu dan iemani tak a tuok ni ka ring reng thu ka hril mawl mawl a, Andy number a mi hung hril nghal a. A pa hi ka manga Andy ka hmu zan char khah a nih Risang muol a liem ni chuh. … Andy Rose -III ( Luahlo Lungdi ) - Next.

30^th June 2015.