New Year Resolution (Kumthar Thusukthlukna)

By LRS Puruolte

“I van I kutsuokhai, thla le arasi I ruothai khi ka ngaituo chang chun, mihriem hi ieng am anih a I hrietzing hlak ana? Mihriem Naupa khawm hi iengam anih a I kan hlak ana? Ka ti hlak.” – Sam 8: 3-6

Pathien lunginsietna zarin Kum Thar 2015 hmel chu hmu theiin ei lo um nawk el tah a. Hi hun mi thuoitlungtu hin iemani tak chu a mi la ditna le ei thaw dinga dit a la nei lei ni gei a tih, ti hi ring a um.

Kumtinin kum thar hmu nuom ve em em, ei ruolthahai dam, ei sunghai dam, Pathien rama mi thangkai tak tak hai dam, mi hrat le hmeltha tak tak dam, lekhathiem thei tak tak dam, eini neka hrisel lem hlakhai dam, nau enkawl ding tul em em lai dam, nupa inngai ngawi ngawi lai dam, nunghak le tlangval dam, naupang le tarhai dam, thidinga lan ring derlo dam, plan le programme nasatak siemtu dam, kumhlui sung khan thlan muolah ei lo vuiliem teu el tah a! Einihai hi iengleia kum thar hmu phak bika um hlak am ei ni aw?! Ei hrat bik lei le ei phu hrim hrim lei ni theiin I ring am? Ni love! Pathienin zangaina nasatak ei chunga an langtir lei chauva hring le dama kum thar hmu thei ei nih.

Ei Lalpa thatna le zangaina ropuitak leia kum thar lawmum tak hmu thei bika ami siemna san hi um ngei dingin I ring am leh? Ei nundan thanawhai le ei suolnahai popo la sunzawm rawp dingin Pathien-in ami la dit lei, ei thabonahai hun tawk a la ti naw lei ni dingin I ring am? A teu hlawl naw ie! Nang le kei thang derlo khawmin Pathien chu a khawsa thei taluo tho awm em el! Pathienin ei la hung that, thangkai thei takduoiin, beiseiin, ama tadinga thiltha thaw dingin, ram le hnam, kohran, insung tadinga Pathien-in talent a mi’n kawltirhai la hei hmang dingin a mi dit leiin, ei chungah zangaina a la nei ni ngei a tih! Ei Bible khawma hiengang hin a mi’nfui a nih: -

1. “Thiltha thaw dingin, thiltha thaw hau dingin, tiktlaia thawlawm pe pei dingin…” –II Tim 6:18
2. “Invet nuom naw unla. Lalpa ditzawng iengam ana ti lo hre lem ro…” –Eph 5:17
3. “Inthimna thilthawhai chu pei unla, var thuomin inthuom ei tiu khai, Suna um angin mawitakin um ei tiu, Zu dawn buoi le inruia um lovin, hur le indit hmanga um lovin, insuol le itthika um lovin Lal Isu Krista chun inthuom lem unla, intaksa inhawkna puitling dingin iengkhawm insiem naw ro.” –Rom 13:12-14

Office kaitu , Zirtirtu, Student, Loneitu, Sakhuo rawngbawltu, Ram le hnam rawngbawltu, Sumdawngtu, Sungkuo tin, Nu le pa, Thalai, Mimal tinin theitawpa insiemtha a, Pathien le ram le hnam le kohran, mani insung tadinga thiltha thaw ngei tumin kum bul ei hmang tan mek lai hin kumthar thusukthlukna siem seng tum ei tiu le.