HSA le HYA in Khangbor khuo an kan

-LRS Puruolte, Spl. Correspondent, HT Daily|Photo: Alan Famhoite

Khangbor|Jan. 24, 2015: Jiribam khawpui a inthawka 36 KMs le ti vela hla, Khangbor khuo khawtlang thuoituhai le H.S.A. Hmar Cultural Troupe hai chun vawisun khan Pu, Dr. John H. Pulamte Gen. President, Pu, Lalhmingthang Hmar Jt. Secretary, Hmar Inpui (Hmar Supreme House) le Pu, Upa Laldawnlien Varte President, HYA GHQ le an hnungzuituhai chu Tripura rama Manmasi Suopui Inkhawmpui 2015 le inzawma Agartala ni khat hun an hmang hnungin, an ni hai hi a hran pa taka fielin an khuo hmun ngei ah in pawlpuina le bufakpuina hun an nei. Hi hun a Pu Lalhmingthang Hmar Jt. Secreatry, HI in thuhrilna a nei hun a chun Jan. 21-22, 2015 a nei zo a lo um tah, Manmasi Suopui Inkhawmpui 2015 chu President, HI le President, HYA GHQ hmalakna le inpekzona leia puitling thei a ni thu, hi hun a Khangbor thalaihaiin Hmar hnam lam mawi tak tak an suklang el baka hla mawi tak tak saktuhai le an nauhai phal taka hi hun hmangna dinga lo thlawptu khawsung nu-le-pa hai chung ah lawmthu a hril. Hnam thuoitu Pu, Dr. John le Pu, Upa Laldawnlien hai chun an theina haia hi khawtlang tadinga hmatieng peia hmalak le thangpui an in huom thu hai an hril a. Model Village hi mipui le khuo hmasawnna dinga pawimaw tak a ni thuhai le Politics khel le Election hmang thiem a pawimaw zie, election hun haia chu Party neiin lo inkhing hlak inla khawm inrem taka um nawk hlak ding, chuonga ei um chu hmasawnna dinga pawimaw tak a ni thu le a that thuhai uor takin an hril.

Hi hun a hin khawtlang thuoituhai khawmin an khuo Khangbor chu Model Village a siem dinga hma an lak mek thuhai an hril. Hi khuo a hin Plantation tieng  a hlawtling em em a, mi iemanizatin an lo thaw zing ta baka tuhin khawtlang le sawrkar hmalakna a thil um thei dinghai chu thaw pei dingin an in singsa mek thuhai ngai thlak a ni bawk. Zantieng khawtlang thuoituhai le Cultural Troupe hai chun inngainatna ruoi an kiltlang. Hi zo hin HI le HYA hotuhai chu an hnungzuituhai leh Jiribam an pan. Jan. 25, 2015 hin an changna khuo le in seng pan an tih. Khangbor hi in150 vel umin, Vangai TD Block No. 4 sunga um a ni a, Post Office chu Jakrador, Imphal East Dist. hnuoia um mek a nih. Chun, Health Centre hnai tak chu PHC, Sibapurikhal (Ankhasuo) a ni a, School khawm Pathum (3) umin, tuhin RPC, ICI  le JB Govt. School hai a um bawk.