Pathien LALPAA chun ân sukhrat a.

(1 Sam 30:6)

                                                          Ziektu: Tv. Alan Famhoite.

Damlai hringnun kal ei chawina a hin thlipui chi hran hranin ami nuoivel chang aum hlak. “Damlai Thlipui” ti lekhabu ziektu chun thlipui chi hran hran ei tuok thenkhat hai a lekhabuah a ziek a, chuonghai chu, Thlemna thlipui dam, lungngaina thlipui, muolphona tawpkhawk le hmingsietna thlipui, pasietna thlipui le nat beidawngna thlipui hai hi an nih. Hieng thlipui hai hi a tuoklo chu vangkhatte ning ei tih.

Khawvela mi inlar (Celebrities) eiti hai khawm TV ringawta en chun nun inhawi hmel em em le inhnar um em em hmel putin aninlang hlak kha tiraw? Amiruokchu a ruktein kilkhata an lu anlo dawm ve ngawi ngawi chang aum hlak. Hollywood ei hril kai phaknaw deu khawma Bollywood bek hang hril inla, ṭumkhat Amitabh Bachchan (Big B) interview an neina a chun hieng hin alo tih “Screen life larger than life.” Hi umzi chu Tv screen a ei hmu hlak ang ngawt khan takrama damlai hringnun alo hmang bik chai nawh tina anih. An hringnuna damlai thlipui chihran hranin a sawk ve hlak a. Bollywood star iemanizat mani hringna inlak(Suicide) khawm an um rawp hlak ani kha. Amiruokchu hienghai hi ringnawtu hai hringnun hmang dan le an damlai thlipui phur dan chu anih.

Anle eini ringtuhai hin Damlai Thlipui in ami nuoi vel chang iengtinam eilo dawnlet hlak ?  Iengtinam I um hlak? In ngaituo kunin I thlep thla der el hlak am ani? Buoina I tuok a, Pathien a’nthawk ṭhangpuina I hmu el sinaw a. Harsatna I tuok a, I sungha’n an ṭhangpui thei el bawk naw che a. Lungngaina I tawng a, I hmangai ha’n an hnem naw che a. Manganna  ah I ruolha’n an hnem bawk naw che a. Nun khawsawt ngawi ngawiin inhriet a, ringtlâk le ringding reng I hmu bawk nawh. Chuong huna chun Damlai Thlipui hi iengtinam I tuor hlak?

Lal David a chanchin hang en ei tih: Lal David le a rawihai chu raldo fea intieng kira anin lawi chun an nuhmeihai, an naupasalhai, an naunuhmeihai chu salah an lo man pek vawng a. “Chuongchun, David le a kuoma umhaiin an râwl an insuoh a, ṭap hlei thei lo lêkin an ṭap a” Sap Bible chun hien a tih “So David and his men wept aloud until they had no strength left to weep”  An tuor nat dan ding chu zuk ngairuot thei a nih. Hmelma inbeina a khawm an nuhmeihai salah hei in man pek dai chu in hnesawna rapthlak tak chu anih. Amiruokchu Lal David hi Damlai Thlipui in na taka a sawk laia a thilthaw hi ṭha kati bek bek el chu anih. Eini rawi ni inla chu iengtin takin am Pathien kuoma ei nuor thusim eiin zawt hman rek ding. Lal David ruok chu a “Pathien LALPAA chun ân sukhrat a” ti hi anih.

Pathien LALPAA insukhrattu hai chu an hlawsam ngai naw reng reng: 1 Sam 30: 8 na ei tiem chun “Chun, David chun, “Chuonghai chu hnawt lang, la hnawt phak ka ti?”tiin LALPA chu ân dawn a. Ama chun a hung dawn a, “Hnawt rawh, hnawt phak ngei ngei i ta, sansuok vawng ngei ngei i tih,”a ta. Harsatna tawpkhawk a tuok lai khawma Pathien ala hei râwn tawk tawk nuomna lungril hi ngaisang aum kati a, Kristien hringnun kal ei chawina khawnga hin hi hi thil pawimaw tak chu anih. (Damlai thilpui in ami nuoi chang aum hlak sia.) 

Saula chanchin hei en nawk zawk inla, ama khawm hi Damlai Thlipui in a nuoi ve leia buoisie, Ṭitna thlipui in a nuoia, David angin Pathien LALPAA ah insukhrat nek nekin khawhri aisânthiem zâwl nuhmei ava râwn a. A hun nuhnunga lem khan chu ama le ama an that ta hlawl el ani kha.

Nang tiemtu dittak, harsatna, beidawngna, manganna le bawrsawmna thlipui in a nuoi huna che iengtinam lo sang let ita?  Pathien LALPAA insukhrât am, khawvel thil-ah i lungngaina hnemtu ding i zawng vêl ruoi hlak?

A kharna dingin sap hla ‘Praise his name’ ti hla hi inlet hran chuong loin ei dit zuolna laia mi po Pathien LALPAA insukhratna hla ṭha tak ani leiin hei suklang ei tih. 

When everything falls apart
Praise his name
When you have a broken heart
Raise your hands and say
Lord, you're all I need
You're everything to me
And he'll take the pain away
When it seems you're all alone
Praise his name
And when you feel you can’t go on
Raise your hands and say
Greater is he that is within me
And you can praise the hurt away
If you'll just praise his name

https://www.youtube.com/watch?v=AgqAN2i7GM0 

Pathienin mal mi sawmpek raw seh.