To Hun le Trong Hun

By Pu Zarzolien Keivom, New Delhi

Ni khat chu ka nuhmei leh ramtin ramtang hrilin kan hohlim a. Ama chun, “Isu lem an inchanga hai ku hin Isu hi a lawn thuok thuok a, thil trul lo a thaw le hril awm lo a hril hmu ding le hriet ding a um naw ngei maw” a hung ti a. Chu ruol ruol chun “To hun a um a, trong hun a um” ti Thuhriltu 3:7 thu hi ka nakawr bula mi hriltu um ang elin fie hlokin a mi deng a. To hun a ti chu ieng hun le khawlai hmun am ning a ta, trong hun a ti khom chu ieng hun le khawlai hmun hmun him ni tang a ta ti chu ka lungril le ngaituonaah a bo thei der dal a.

Eini Isu ringtu le a hniekhnung zuitu intihai hlak hi ei hmatok tokin ei inpawt a, ringtu baua suok awm lo tak tak dam ei sak suok a, to hun le trong hun ding hrim ei ngaituo ngai naw niin ka hriet a. Hi thu hi tisa le thisen inhriettirna el nia ka hriet naw leiin ka hun awl nei changin ka ngaituo zui nawk pei a. Chu taka inthoka ka thil hmu, ka lungrila inphumhai chu “thu chu taksain a hung inchang a, eini lai a hung um ta a,” ti ang deu khan an lang dan danin, mi khoma an lo tiem ve thei dingin a thren a zar bek a ka hung tar lang tum a nih.

Johan 8:1-11 ei tiem chun Dan zirtirtuhai le Farisaihai chun nuhmei a uire lai ngeia an man chu Isu kuomah an hung thruoi a, “Zirtirtu, hi nu hi a uire lai tak man a ni a, Mosie dan mi pek ang chun hieng ang nuhmei hi chu lunga deng hlum ding a na, nangin iengtin am i ngai a”? an ta. Isu chun a don el naw a, a kûn a, to trokin a kutparin hnuoiah thil a ziek a. An thil indon chu ama hĕkna ding an hmu theina dinga khal awk an tumna a nih ti a hriet a. Chuonga an hnaw sek lei chun a hang dak a, an kuomah “Nangni laia suol nei naw naw chun deng hmasa raw se” a ta, kunin totrokin hnuoi a ziek nawk a. A thu hril an hriet chun suol nei naw um nghal lo hai chu a upa taka inthoka tranin pakhat khatin an inrel hmang rip el a nih.

Isu khan to hun le trong hun kha ngaituo loin, Thuthlungthar hun an tah leiin Mosie dan pek cheu kha hmang thei ni ta naw nih dam hang ti pal hlau el ta sien chu, kalvari muol khom sir hman naw nih, a hmunah khan chilhlum nghal an ta, Pathien thil tum khom a hlawsam der el thei a ni aw! “Thu a ni dan ding ang taka hril suok hi tangkaruoa rangkachak mûm phŭm ang a nih” (Thuvarhai 25:11) ti a ei hmu angin Isu trongkam suokhai hi chu a ni dan ding ang thlap hi a ni vong el, hang belsa ding le peihawn ding hi a um naw top el a nih. To hunah a to trok trok a, trong hun le thaw hunah a’n tǐm ngai nawh.

Khawvela ei Lalpa Isu a hung leng laia a chet danhai kha ei en chun, to hun le tong hun kha a va hang hriet de aw! A fena tieng tieng khan hril hunah chu insûm dêr loin a hril pei a, kut thlak huna chu intîm der loin kut a thlak el a nih, Jerusalema tempul huong sunga thil zortuhai le inchawtuhai khom kha hruihruol invuokna a siem a, a hnot suok vong a, tangka thlengtuhai dawkan le parva zortuhai thrungna a nam thlukpek a. An kuomah, “Ka in chu trongtraina in ting an tih tih ti ziek a na, nangni ruok chun suomhmanghai pukah in siem lem hi’’ a ta, trong chuongtlai reng a hmang ngai nawh. A fena taphotah suol ngaidam theitu le sukdam theitu a ni zie trongbau le thilthawin a suklang pei a. Hi truma a thu hril hi chu a uor taluo deu an naw leh a hril intǐm deu hang ti ding hi a um naw top el a nih. Pilatin “Judahai lal i ni maw” ti an don khom khan “Ni e, i ti an nawm” ti bak kha chu a don naw top el a nih. Pilat khom khan a suolna ieng khom a hmu bik nawh, Eini hai ang nisien la chu a thiem thu hang inzawt a ta, Pilat khom khan insuo el a tih ti a trong bauhai a inthokin hriet theiin a um. To hunah to loin a thiem thu hang hril sei met sien la chu, Pilatin insuong a ta, Pathien thiltum a hlawsam dĕr el ding a ni leiin a trong da’l a nih. Eini khom thilthra thaw dinga Pathien kutsuokhai ei ni leiin to hun le trong hun Krista Isuah inchuk hlak inla chu, ei ram ei hnam le kohran lai Pathien thiltumhai chu sukpuitlingin um a ta, hieng lawm lawm hin tlaksamnain mi tlakbuok kher naw nih ti ring a um.

Nupa kara insel inhal le inthrĕna chen a tlungna san tam tak chu to hun le trong hun ei thre hran thei ngai naw lei a ni deu tak hlak niin an lang. Ei Lalpa Isu angin to hunah toin trong huna chau trong hlak inla chu nupa kara chau ni loin nau le tehai le kara chen inhrietthiem nawna tlawm lem ngei a tih ring a um. Eini rawi hi chu thiem lem ni inchuin a trûl lo chen chen hril ei ching a, trong chuongtlai hmangin khel chen ei hril sa rop hlak niin an lang bok. Pa lung a sen ta chun nuin amanih, nauin amanih to inchu hlakin la, chuong ang bokin pahai khoma nu lungril nat ding le nauhai nuor taluo ding vengin to inchu hun dam hi nei hlak inla chu, ei insungah Kristan inlalna chang a ta, Debol chun hmun chang ngai naw ni a, ei sungkuo nunah Pathien thiltum chu sukpuitlingin um hlak a ta, malsawmna khom dong tam lem ngei ei tih ti ring a um. Sam 133:1-3 a ei hmu angin, lung inruol taka unau cheng khawm diel dielhai chu a mawiin dit a um a, “Chutaka chun malsawmna Lalpan a’n tlungtir hlak a, kumkhuoa hringna ding chu” tiin a lo hril kha.

To hun le trong hun ei hriet naw leiin ei hnam ei sosaiti le kohranin nasa takin siet ei tuok pha tah a, a por khom a nasa hle tah ti hi ei ngaisak nuom der naw niin an lang. A tho kang thei a muol khom ei um ta naw a, ei thil hmu dan khom ku hi mitdel parukhai sai hmu dan ang el niin a’n lang, Pakhatin a phing a them a, bang a hoi a ta, a ngho a them pa chun fei a hoi a ti nawk a, a ngawn them pa chun rul a hoi a ti a, a khup them pa chun thingkung a hoi a ti a, a nakawr them pa chun hmaizap a hoi a ti a, a mei them pa chun hrui a hoi a ti a. An sai tawk chin nina angpui chu an hril dik seng a, sai angpui ruok chu an hril dik naw seng. Chuong ang bokin eini rawi khom mani kohran ei inkhina hmol sengah an dik seng thei, Pathien kohran nina indik tak ruok chu eiin khi indik naw deu vong el thei a nih. Mani pawl chu an dik tak, a dawthei tak, a fel tak, a hrat tak, a thra tak, a thlarau mi taka ei lo ngaina hai hi mitdel parukhai sai hmu dan ang tho niin an lang. Lungril entu Pathien mi en dan chun ei inhmu dik ve naw vong el thei bok. Isu hun laia Farisaihai nek hman khan tu lai Pathien kohran intihai hi ei farisai lem dai el ta thei bok. Bau inngaitlawm, lungril chapo si hi tu lai kohran mizie laia a langsar pawl tak laia pakhat niin a’n lang bok.

KEIVOM RUN (Greater Noida)

3 July 2014.