VOTE KHAT CHAUH!!

Tv. LRS Puruolte.

Ziektu: Tv. LRS Puruolte, Rengkai

1.       Aaron Burr khan vote khatin President of U.S.A. Nina a chan pha.

2.       Texas Union khata siemtu chu vote khat a nih.

3.     Andrew Jackson chu vote khat leiin a Lalthungpha a inthawka peithlak an tumna lakah a fihlim.

4.       Oliver Crowmwell chu vote khat leiin 1656 khan England ah Lalna a chang.

5.      Vote khat leiin America chun 1776 khan German tawng nekin English (Sap) tawng hmang theina a nei.

6.       1875 a France ram Monarchy a inthawka Republic a siemtu chu vote khat a nih.

7.       Rutherford B. Hayes chu vote khat leiin 1876 khan USA President a tling.

8.       Adolf Hitler chun German ram ah Nazi Party a thuoitu nina 1923 khan vote khat leiin a chang.

9.       Khawvelin France tawng neka English (Sap) tawng a hmang ta lemna hi vote khat chau a nih.

10.    Atal Behari Vajpayee, Prime Minister of India chun vote khatin a sawrkarna (BJP) buka a um hun ah May 1999 khan a tlaksietpui pha.

Chuleiin, VOTE KHAT CHAUH te khawm hin thil a lo thaw thei hlein, a lo suksiet thei hle a ni chuh! 

Ei ram Politiks le Taksa ram ah:

Ei ram, ei hnam le sawrkar sie mek siemthatna ding chun i ditthlangna Vote  khat chauh khawm te kha a hlu bek bek el a nih, ti hriein, ei hma election hung um ding a hin hang hmang thangkai tum chau ni lovin, hmang thangkaiin, hmang thiem hle ringawt el rawh. I vote kha darkar tlawmte chauh dai ding a zawr hmang lovin kum tamtak thlirin, indikna le ringumna kengkaw tlatin, nang ngeiin thlak rawh. Dit tukhawm I neinaw a lo ni khawmin, I vote kha a pawimaw tho tho a nih, ti hrie tlat rawh. India sawrkarin “NOTA/NONE OF THE ABOVE/NONE OF ABOVE (TUKHAWM KA DIT AN UM NAWH) tia thlang theina/tia vote pek theina zalenna a pek ang char chein, huoisen takin I ditthlangna ngeiin, ti le zam der lovin I vote thlak la, I ta bak, midang ta, I ruoltha tak, hmangai tak le i sung-le-kuohai ta khawm nisien thlak der naw rawh. I chungah thuneitu India dan bak tukhawm an um nawh ti hrie tlat rawh.

India rammi indik tak, dan bawsietna thubuoi neilo, mi lungrilkim/mi pangngai le mi Kum 18 a inthawka chungtieng Voter List a um, Voter ID Card/Lekha pawimaw nei taphawt hai chu Mani Vote Khat  Chauh bak thuneina a i pek bik, midanghai Vote thlak pek theina, thuneina a pek le hi kawnga dan bawsiet theina India mipui tukhawm a lien tak a inthawka a chintak, a hausa tak a inthawka a pasie tak, a var tak a inthawka an vet tak, a lekhathiem tak a inthawka a thiemnaw tak, tu ang mihriem khawm nisien ei um nawh. Hlutna ang khat seng ei nei a nih. Ei vangnei hle el. Chuleiin, I hlu hle ringawt el a nih, ti kha hrie tlat rawh. Chun, hi kawng a dan bawsietna lakah thiemchang theina a pek bik le nei pakhat khawm ei um der bawk nawh. Mi Vote inruk pek le hmun khat neka tama Vote nei hi dan in a phal naw hul huol chu a nih. Vote I neina le inzieklutna khuo a khan in le lo, a khuo a cheng, a khuo mi indik tak nina I nei ngei ngei ding a nih.

Mi thenkhat ching em em, hmun khat neka tam a Electoral Roll a inzieklut, Assembly Constituency pakhat neka tamaVoter ID nei khawm hi Representation of the People Act, 1950 … in a khap hmak a nih, ti hi hriet tlat dinga tha a nih, I vote neina insawn ding/pakhat neka tam I nei chun sawrkar tienga thuneitu in peihmang the tir ngei rawh, dan zawm hi I mawphurna a nih. Chuleiin, hieng thil hi I thawlui a lo ni chun SUOLNA le DAN BAWSIETNA RAPTHLAK TAK A NIH (Kristien ka nih, ti ve si a, hiengang ching hlak hai chun, Krista lungril a ni dim? ti ei inenfie a ngai hle. A hnungzuitu indik tak a inti ngam ve si hai thaw chi lem lem chu a ni der nawh) ti hi hrie tlat rawh. Man dawk I ni chun, I phutawk danin hremna a pek thei ding che hai chu Case I nei hun a, a thangpuitu ding che lo zawng la, inphalam der lovin lo indawn chieng la, India dan po po, IPC (India ram inhremna dan) bupui i/in phet suok vawng pha hril thei vawng a ti che.

Hnam tin le Rambung tinin an phu tawk ang seng Sawrkar an nei hlak a, eini khawm ei phutawk ang pei Sawrkar ei nei hlak a lo nih! Hun liemtah haia Sawrkar khawm kha a tha am, a sie am, ei phutawk a lo ni zing!… Chulei tak chun, I VOTE KHAT CHAUH te kha hlu takin hmang la, ei hma el inthlangpui (election) hung um hun a hin I chengna ram hi hang siemtha ve rawh leh…

Thil mak ve tak pakhat chu, hriet naw kar khawm ni lovin, hriet zing sain, ‘Democracy’ chu, For the people, by the people and of the people… a ni zing laiin Manipur le India ram hmun tam tak a hai chun, ‘Democracy’ hi Far the people, buy the people and off  the people… ti leh thuhmun char a lo ni tawl der chu an tah!! Chuchu thil chu, i sielethahrietna hmangin, i VOTE KHAT CHAUH te kha indik le huoisen takin, sawrkarpa’n zalenna le thuneina a pek ang char che kha  hmangin hang siem dik raw khai. Ram le hnam hmangaitu in ti hai khawmin ‘chu ei hmangaina tak te chu’ ram le hnam siem hun lai tak a hin suklangin, mipui ha’n ditthlang theina le zalenna an nei, an hmang thei ngeina dingin sukbuoitu ni lova, thangpui lemtu ei hung ni a, hmu thei ngei a, ei hung suklang a hun ta hle.

Mipui hai chanvo “Rights”  ei chuthlak pek amani, ei inruk pek sung phawt chu ei ramah Sawrkar tha le indik ngir ngai naw hrim hrim  a tih. Ram le hnam changkang, mihai ngaisang le entawntlak ni ngai bawk nawng ei ta. Vawisunnia ei harsatna hai popo hi sukkieng ta nekin a let tamin hung pung tuol tuol lem a tih. Chuleiin, Mitinin Indikna chau kengkawin ei VOTE KHAT CHAUH nei hai te hi hang hmang thangkai diet diet ei tiu leh.

Manipur ah: Tulai hnai a Indian Army Analysis khawmin a lo hril tah angin Thalai, lekhathiem sin nei lo an tam leia Manipur a helpawl an tam niin a hril a. Hi thil hin Sawrkar/Mipui chu hrillo, Security Forces, Police le Paramilitary Forces hai a sukbeidawng em em a. Hieng sinneilo leia tamtak helna, nunkhawhlo zawnga hun hmang tah le hmang mek, inruithei thil tienga nun khal mekhai le mi Nuoi 7 chuong zet sin dit a Employment Exchange a Feb. 2014 chen a inzieklut (educated unemployed youth 7,00,602 an nih a, hieng hai lai hin nuhmei 2,00,784 le ruolbanlo 2,636 an thang) hai khawm hin ei ram politiks fe dan ei ditnaw tak tak a nisi chun, sum senglo le sin ruok um thei dan ding chun vote nei deu fur ei ta, ei vote pakhat chit chauh te hi tuok khawm diet dietin vote Nuoi tel hung niin Sin neilohai tadinga sin ruok siem theitu ding, sawrkat thar indinin, Sin ruok hung umin, ei ram ei siemtha thei zing a nih.

Tharum insuona nekin indikna le ei VOTE KHAT CHAUH, hlu ngawi ngawi el te hi hmang thangkaiin hma la lem ei tiu. Chuchu, lampui indik tak lem khawm a lo nih. 2011 Census dungzuiin Manipur ah mihriem 27, 21,756 ei um a. Votes um zat chu 17, 39, 005 le ti lai a nih. Manipur a sin neilo Employment Exchange a inzieklut hi Mizoram a Vote nei zat nekin ei tamlem!!... Mizoram ah Voters 6,90,860 an ni laiin, Manipur a lekhathiem sin neilo, sin dita Employment Exchange a in zieklut chu 7,00,602 lai zet an tling tah!! Annihai Vote ringawt khawm thahnem fe chu a um ding a nih. State thenkhat/pakhat vote neka tamlem a um thei dingin ring a um!!... Chuongang peiin, tu hun hi hun hlu tak el, vote nei taphawtin mani VOTE KHAT CHAUH hmang thangkai hun chu a nih.

Tu ang hun hi India ram pumpuia ei palai ding, kawng iengkima eini aia ngir ding ei thlangna hun a nih sih a.

“Invetna chikhat chu thawngai thaw zinga, thil tha lem beiseina hi a nih…”

– Albert Einstein

“Hnam tinin an phu tawk char sawrkar an nei...”

-Joseph Marie,(Comte De Maistre (Apr. 1754- Feb. 1821)

“Hun liemtah hai kha mivar darthlalang a nih...”

-Christina Rossetti

Thlarau ram ah: Unau, tiemtu dittak, nang khawm I ditthlangna VOTE KHAT CHAUH leiin Chatuon Meidil ah amani, Vanram ah amani I la fe ngei ngei ding chu a la nih a. Chuleiin, tu hi sukfel hun lai tak chu a nih. KRISTA a ninaw chun HREMHMUN/MEIDIL a ni el ding chu a nih. Chuleiin, a hun lai hin thlang fel vat rawh leh…

‘Lalpa, Lalpa’ mi ti nazawng vanram ah lut naw ni hai,

ka Pa vana mi ditzawng thawtuhai chauh lut an tih.

-Lalpa Isu Krista (Matthai 7:21)