Thalai Day Chanchin

By Pu Ramthienghlim Varte*

“I thatlaini le vanglainihai chun nangma siemtu che chuh hre zing la..”

Thalai Day hi ni dang ei inser angin a hun bi inangin khawvelin a hmangve naw a hawi a, eini khawmin ei hmang ni hih an ang vawng naw nisien a hawi. Chubakah, Kohran pawl a hmangnaw khawm ei um nuolin an lang a, Thalai Day chanchin a tawi thei ang takin ka hung ziek.

kum 1976, June 16 khan South Africa khawpui Johannesburg simtieng pang Orlando West SOWETO (South Western Township) an ti hmun a hin hnam inthlierhrangna (Apartheid) le kum 1956 laia South Aferica sawrkar laipuiin an ram School Curriculum ah Afrikaans hmang dinga Bantu Education Act alo passed an ditnaw leiin students mi 15,000 neka tamin an ditnawzie entirna dingin lam hrawna (Protest) an nei a. Sawrkar venghimtu pawl (Police) hai leh an inbei ta chiem el a, dodaltu student an hrat a, an huoisen si leiin Policehai chun lamhraw pawlhai tieng an silai chawi an hmet puok el ta a. Hi tum hin students mi 600-700 bawr velin an hringna an chan a, mi sangkhat bawr vel an hliem bawk. Student singtel chuh ramdangah an tlanhmang bawk a nih. Chuleiin, hi ni hih South Africa rama chuh ursun takin THALAI DAY tiin an inser.

African National Congress (ANC) a hung hrat a, Pu Nelson Mandela President a hung ni khan hi ni hih ni pawimaw a nih ti’n THALAIHAI NI tiin National Holiday dingin kum 1994 khan ANC sawrkar chun a puong a, a namdet nghal ta a nih.

Roman Catholic Kohran hai chun a hun bik um chuong loin a tul angin an hmang ve a. Kum 1985 khan Pope John Paul II chun WYD (World Youth Day) tiin Diocesan (D/S annawleh PO biel sung tina ang ning a tih) kumtinin a hmang pui a, khawvel pumhuop R.C. a ding ruok chun kum 2/3 hnungah a hmangna hmun ding ruotin a hmangpui pei hlak. Kum 1985 khan Vatican City, Rome ah a hmang a, Thalai nuoi thum neka tam an fe khawm a, thupui tha tak tak siemin an hung thaw pei a, Holy Mass a um hlak bawk. Kum 2008, July 20 khan Australia khawpui Sydney WYD08 an hmang tum lem chun Pope John Paul II thlaktu, Pope Benedick XVI khawm thangin fekhawmhai po po Holy Mass a nei pui nghe nghe a, a ropui hle. Maktaduoi li (4) neka tam an fekhawm a, Australia rama Thalai fekhawm tam tak a record a nih. Hi tuma an thupui (Theme) chuh – Receive The Power – ti a nih. Australia puotieng Vatican City-ah kum 2000 a WYD00 a chun Thalai Maktaduoi hni (2) neka tam an fe khawm nawk a. Tukum hin Madrid, Spain-ah August thla khin WYD11 a ve thung ding a nih.

Swami Vivekananda piengchampha 12 June, 1984 hi India rama chuh Thalai Day-in a hmang ve thung. Kum 1985 khan India sawrkar-in National Youth Day tiin alo puong ve tah nghe nghe a nih. Hi ni hin Thalaihai insukhlimin hieng – recitation, musics, convention, essay writing, sports, social work le inruolsiekna hrang hranghai an nei ve hlak. Chubaka, Hospital-a mirethei thangpui ngaihai an thangpui a, thisen pek tulhai chen an pek hlak.

Leh, eini khawm May 29, 2011 hi THALAI DAY-a ei hmang ve hun ding a ni a, ei umna le Kohran rorelna le inmila ei hmang ding chuh ni ve el a tih. Pathienin thalaihai hi a rawngbawltu dingin a dit a, setan khawmin a hmang nuom ngawi ngawihai an nih. Chuleiin, hi ni hi hmang tangkai seng inla nuom a um. Thalai Day hmangtuhai po po Lalpa malsawmna chang dingin ditsakna kan hlan.

*Pu Varte, Shillong, is a regular contributor to Inpui.com.