J.Kailova leh Lalzopuii hrietrengna lungphun hawnna ropui takin nei a ni

By Timothy Z. Zote

(An chanchintawi )

Pu J. Kailova leh Pi Lalzopuii te nupa hi hretu tam hle ma ila, a la hre lo pawh tam tak kan awm a rinawm. Hriat awlsam theihnan chuan Pu J.C. Ramthanga, IAS, tuna Commissioner, (MOBC,MI,DE) Govt. of Manipur hna chelh mektu tun hma lawka Mizoram Sawrkarin Deputation a kum 5 lai lo awm tawh nu leh a pa an ni a, chuh loh pawh Pu P. L. Thanga, IAS, Retd, tuna Member Secretary State Planning Board Govt. of Mizoram hna chelh lai mek puzawn te nupa an ni.

Pu J. Kailova hi a pu chu Neihlura a ni a, chi leh kuang ah Hmar Zote(Joute) Chawnghau a ni a. Amah J. Kailova chauh lo, a pi a pu te atangin mi vantlang chung deua awm niin an chanchin chhuitu te chuan an ziak a, Sailo Lal leh pawih lo intihthiam loh lai pawh khan a pute leh a thlatu te chu mi tangkai leh chanvo pawimawh tak tak lo chelh pha tawh leh rawn kai an lo ni bawk. Remna dawhkan lo kil pha an lo ni nghe nghe. Famlam thlenga remna hna thawk pha an lo ni tawh bawk a.Tin, Neilura hi Vuta thlah Zataia leh Kairuma te khua leh tui , pa anga vengkhat hotu leh roreltu an lo ni bawk. Fa pathum a nei a, a fa te chu 1. Sutliana, 2. Rochawngpuii leh Ngulchawngmanga te an ni. Hman lai atangin inchhung khawsaknaah pawh mi intodelh tak chu an ni ngei ang, Neilura hian silai pahnih a nei a. kum 1871 vailen laiin an silai pakhat chu surrender ( pelut) a , pakhat erawhchu khanchhukah dapin a tel a, Lal phalnain an thukru a. A fa naupang ber Ngulchawngmanga chu Kum1888 khan Sialhawkah a piang a, Neihlura te chhung hi buh leh bal leh ran vulh lamah hmuingil tak an ni. An thei ang angin tanpui ngai te tanpui hi an chhungkaw hna leh rilrua an put reng te zinga pakhat chu a ni awm e. Hengang rilru an neih vang hi a ni ngei ang fahrah leh tanpui ngai zual bik mi pahnih pathum hi chu an awm deuh reng thin bawk a ni. Khawvel khawsakna leh inrelbawl dan a zirin hmun danga pem an rilruk ta deuh niin a lang a. Tichuan kum 1901 khan Hrangchhuana’n Neihlura hnenah a khua a pem a. Vuta thlahte hnena a chanvo ang chiah a pek a tiam a. Chungchuan Hmawngzawlah Lal Hrangchhuana an bel ta a. Kum 1907 khan Kanghmunah a kai a, kum 7 hnuah Ngopa bul Chawra hnunah an kai leh a. Kum 77 mi niin Neihlura chuan he khawvel hi a lo chhuahsan ta a ni.

Ngulchawngmanga leh a chhungteh chu kum 1921 ah Khawdungsei kai turin Khuanglung, Kawnpuiah an inbawk a. Kum 1922 ah tuna Khawdungsei (NE Khawdungsei) hmunah an kai ta a ni. Lal Hrangchhuana’n Ngulchawngmanga hnenah in 70 hova Chiahpuiah khawthar va sa turin leh rorelna leh sa chhiah va chang turin an ti a. Kum 1924 ah Chiahpui an zuan a. Kum 1926 khan lal fapa Lalzidinga’n a va thut a. Kum 1933 ah Lalzedinga’n Ngopa a zuan leh a. Ngulchawngmanga pawh chu vengkhat hotu bawkin khawdungseiah a lut leh ta a. Ngulchawngmanga hian nupuiah Vanlalnghaki a nei a. Fa pali a nei a. 1. Tlangkhama, 2. lalnghinglova, 3 J. Kailova leh 4. Thanghleia te an ni.

Pu J. Kailova Nupui Lalzopuii hi March 25^th, 1932 khan Ngopa, Mizoramah a lo piang a. A nu a hrisel loh avangin a u Kailiani’n a buchip lai chuan nu chan changin a awm a, a u mipa te pawhin an duat em em a. A nu duat taka lo enkawltu chuan hun lo takin April 5, 1936 ah kum 38 mi niin a fanau te chu he khawvel danin a lo kal san ta a, nuberin in thihsan hma hle mahse a unau mipa pathum te c huan an tuammawi hle thin.

Thlahtu chanchintawi : Pi Lalzopuii pu chu Dengphunga a ni a, a nupui chu Thangtinchhuahi a ni. Liannghawr Pachuau an ni a. Fa panga an nei a.1. Saihuma 2. Lalchhama 3. Kawngsena, Rochhungi, leh Rothangi te an ni. An fapa Lalchhama hi Chemsini ( Sinnawii) , Tlau vantawl hnam nen an innei a. Mi zaidam tak a nih avangin,” Mi zaidam Lalchhama” tia sawi a ni thin a, fa panga an nei a. 1. Kailiani 2. Halruama 3. Lalthanga 4. Thansanga leh Lalzopuii te an ni. Tlai khawhnuin Liansailovi a rawn piang leh a, amah nen hian unau paruk an ni ta a ni.

J. Kailova hi Chiahpui, Mizoram ah 23 April, 1925 khan he khawvel eng rawn hmu turin a rawn piang chhuak a. Kum 1933 khan Chiahpui khua chu tindarsanin a awm a. Chu ve leh a pa te lo awm tawhna mel 3 chauha hla Khawdungsei khuaah awmhmun khuarin an awm ta a. Kum 1935 a rawn nih chuan Zawlbuk thingnawi a fawm ve tan thei ta a, kum 1937 thleng thingnawi a fawm ve a ni. Kum 1937 ah Lower Primary class 3 a zir zova. Kum 1938 atangin scout ah tangin a thiante nen necktie sen an suih ve tan a, hlim takin an lam thin a, tlawmngaihna rawngbawl hna tinreng an thawk thin.

Ni 23 may 1942 khan Asame (Asom) Regiment ah atang a. kum 1944 November thlaah Batmanela, Mysore state ah te tangin chhuti (Chawlh) ni 46 a la a, Mizoramah a haw chho va A nu leh a pain an lo lawm entirna’n vawk sum 6 leh kel chal an lo talh nghe nghe a ni. Ni 27 March 1945 ah a nu Vanlalnghaki’n a thihsan ta hlauh mai. August 1946 in L/Nk ah a kaisang. October 1946 khan Shillong atangin chhuti (Chawlh) ni 46 chhung a la leh a, Khawdungseiah ni 28 a zuk cham a. A pain vawk sum 7 leh kelpa a talh sak leh. December 1947 ah Sipai atangin ban a dil a, an hotuten “ exemplary” pein an “ release” ta a ni. October 1948 atangin march 1949 thlengin Tipaimukh ah dawr a siam.

Pu J. Kailova hian unau a nei te zinga upa ber chu Thangkhama a ni a, a ni hi Rengkaiah a khawsa a. A nupui chu Aibawihi a ni a. Fa 3 an nei a. An hming te chu Sangluaii, Biakthangi , leh Rualneikhuma te an ni . Thangkhama Kum 1957 khan Jorhat Hospital ah a boral. Rengkaiah inpui a nei a, tun thlengin a nupui Aibawihi’n a la awmchilh. An fate chu Aizawl lamah an khawsa thung.

A unau dang, Pu Lalnghinglova hi Rengkai M.E School ah Headmaster hna a thawk thin a. Fanu pakhat Zozamliani a nei a. Kum 1947 November thlaah Rengkai khuah a boral.

A unau dang leh, Thanghleia hi a unau zingah naupang ber a ni a, Kum 1949 khan vanduaithlak takin nupui neih hmain a Tlawngluihah accident-in a boral..

Inneih hnu:

Pu J. Kailova chu Tlangval fel tak leh invawng tha tak a ni a, khawvel nunphung angin Date 23 April, 1949 chuan ( Nilaini chuan) Ngopa Presbyterian Biak Inah Pastor Siamhnuna kuta nupa tuak ni turin an lo intiam ta a ni. Ti chuan khawsakna ngaihtuah vangin Aizawl leh Tipaimukh lam ah dawr siamin hun eng emaw chen chu an ti kual a. Pathian zar leh taimakna, tumruhna leh dikna a vang te a ni ang chu, a thiltihna apiangah a rawn tluang chho ta zel a, Zoram khawpui ber Aizawl dawttu leh Zofa te zirchhuahna hmunpui pakhat Tuithaphai, Churachandpur Phairuamah Dawr siamin, dawrthawmhnaw te, Culcutta, Rangoon leh hmun dang dangah la thinin sumdawnna lamah pawh a lo bei nasa hle thin.

Khawtlang leh Civil society hmun hrang hrangah pawh nihna sang tak tak a lo chelh tawh bawk. A then a zar: Ex. Service, Hmar Trade Company, Lamka Thlanmual Committee Group YMA, Manipur, HYA Tuithaphai Block, Zote Welfare Society, New bazaar committee, Presbyterian Synod, Manipur ah te nihna pawimawh tak tak lo chelh tawh leh dik taka sum lam( treasurer) hna pawh lo thawk tawh thin a ni bawk. Heng bakah hian Kohhran a lawina ah pawh mi tangkai leh thawhlawm khawn nikhuah pawh pathian tana inphal tak a nihna hian mi hriat a hlawh phah em em. Mithi ral leh tanpui ngai a hriat chu theih tawka tanpui zel thin a ni a. Inchhung invawng felna te hi a tui a, zirna leh tumruhna a tul zia hi a tu a fa te a fuihna lian ber leh hlawhtlinna kalbi pawimawh tak a nih ziah a sawi thin. Inkhawm ni khuahah dar rik hun vela thleng hman thin a ni a. Kohhran inkhawm leh Kohhran programme reng reng a ngaipawimawh hle thin. Heng lai reng hian an nu Lalzopuii pawh hi nu fel tak leh a pasal theih ang anga thlawptlat thin a ni a, fate enkawl dan chungchangah leh midang deu an awmpui leh enkawl chungchangah pawh thiam tak leh duat taka hmangaihna thuk tak nei chung renga enkawl thin mi a ni a. Nupa inthurual tak leh inmil tak an ni a.Tawngtaina hi Pi Lalzopuii hian a taimaa, naupang school kal dawn ah te hian buaina a awm viau loh chuan tawngtainain a thlah thin.

Pu J. Kailova leh Pi Lalzopuii te nupa chu an hun tam zawk chu Tuithaphai, Churachandpur phairuamah an hmang ta a. An inneih Silver Jubilee pawh Synod Hall ah April 23, 1974 khan ropui takin an hmang tawh a ni. He mi ni hian Pathian ropui na’n 1.Synod Mission board , Mizoram Synod( India Ramthar rawngbawlna atan) Rs. 10,000/- an hlan a, 2. Executive Secretary , Tuithaphai Presbytery (Manipur rama ramthar rawngbawlna atan) Rs. 10,000/- an hlan bawk 3. Bible Society of India, Churachandpur Branch Rs. 5000/- an hlan bawk a ni. Heng thil pawh hi an nupa hian an nei reng vanga tih chu an ni kher lo ang, Pathian tan leh a ram tana an theih tawk an tih lan ve a nih a rinawm bawk.

Khawvel tung chhukchhoah lo khawsa chho zelin fa duh awm tak leh fel tak tak Pathian zarah an rawn neih chho ta zel a. he khawvel an chhuahsan hma atang khan fate chungah rilru hahdam takin an lo hmang tawh a ni. Mi tam chuan malsawmna an dawng nasa hle a ni, an ti thin fa eng emaw zat an nei a, tunlai khawvelah ruihthei thil in mi tam tak a tih buai lain an ni zawng buaipui ngai awm an awm hriat a ni lova fak an hlawh hle a ni.

Pu J. Kailova leh Lalzopuii te karah hian fa duh awm tak tak 8 an hring a, chung te chu:

1. Pi Laizovi Pu Hrangthanseia nen inneiin, vanduaithlak takin 1992 khan,Tuithaphai Kawnpuiah fa nei hman lovin a boral.

2. Zomzamliani hi Aikima nen inneiin fapa pakhat leh fanu pathum neiin tunahah Tuithaphai, Lamka, Appolo Vengah chhungkuain an khawsa mek.

3. J.C. Zomawia hi zirna lamah BA final thleng zirin, P.C. Lianhmingthanga (P.L.Thanga)IAS, Retd. ( Adviser, Planning, Govt. Mizoram till) nen 11 January 1972 khan an innei a. Fapa 3 leh fanu pahnih an nei a, Chaltlang Aizawlah an chhungkuain an in ngeiah an khawsa a ni.

4. J.C. Zothantluangi hi Zirna lamah Matriculate thleng a zir hman a, Jamse Lalcha Vaiphei nen 29 May, 1968 khan nupa tuak ni turin an lo inneih a, fapa pali leh fanu pahnih neiin tunah Aizawl Bawngkawnah an chhungkuain an khawsa mek a ni.

5. J.C. Zohmingthangi zirna lamah chuan Matriculate thleng a zir hman a, Industries Department ah UDC thawk mek a ni a. R. C. Daniel nen 19^th September 1981 khan inneiin fapa pakhat leh fanu pakhat neiin tunah lamphelpat, Imphalah an khawsa mek a ni.

6. J.C. Zoliankunga (L) Zirna lamah BA a zo a, DIC churachandpur ah Inspector (handicraft) thawkin 12 October, 1981 khan Lalrothangpuii nen inneiin Kum 2002 , September 6, khan hrawk cancer-in a lo boral tawh a. Fapa pahnih leh fanu pakhat an nei hman.

7. J.C. Ramthanga,IAS, Commissioner,(MOBC/MI), Govt. of Manipur ni mek hi zirna lamah chuan NEHU, Shillongah MA a zawh hnuin Civil Serice examination ah hna pathum a hmu a, Armed Forces Headquarters Civil Service, Indian Police Service (IPS) leh Indian Administrative Service (IAS) kum 1989 khan a hmu hlawm a, Manipur - Tripura cadre pek a nih angin lain, Tunah a nupui Jakie Ramthangsangi nen fapa pakhat leh fanu pathum neiin Imphal Lamphel, Qrt No. 3,Type VII(NC) ah chhungkawhlim tak niin an khawsa mek

8. J.C. Lalsangzuala hi zirna lamah chuan JNU, Delhi-ah MA a zo a, tunah Jawaharlal Novadaya Vidyalaya(JNV) ah Principal hna thawk lai a ni. September 12, 1992 khan Irene Lalringzuali nen inneiin fanu pahnih leh fapa pakhat neiin Thenzawl JNV Quarterah an cheng mek a ni.

9. J.C. Manglianthanga hi Manipur University hnuaiah MA zoin ,Rural Labour Inspector hna a thawk mek. 12, December 1986 khan Laldawngliani nen inneiin fanu 5 leh fapa pakhat neiin tunah Phunchawngi Nu Road, Churachandpurah an khawsa mek a ni.

10. J.C. Zomuanthanga hi zirna lamah chuan JNU ah MA leh M.Phil a zo a. Aizawl Theological College-ah BD zoin tunah Mizoram University hnuaiah Asst. Professor(Political Department)-ah hna a thawk mek a. Lachhanhim nen 5 May, 2005 khan inneiin tunah hian fapa pakhat leh fanu pakhat neiin Aizawlah an chhungkuain an khawsa mek a ni.

J. Kailova leh Lalzopuii Hriatrengna Lungphun Programme

An fa ten nasa taka an buaipui hnu leh ngaihtuahna thui tak nei an hneih hnuin Lungphun hawnna chu Tuithaphai, Churachandpur, Lamka Synod Hall,I.B.Road ah ropui takin Date 28 April, 2011 khan hman a ni a. He tiang hian Programme hman a ni.

Zaihawnna 12:oo Pm atangin mipui zaia hman a ni a. Hunserh chu tlai Dar 1.00 Pm khan hman tan a ni a, He hunserh hi Rev.Vanmawia, Executive Secy. Manipur Synod chuan kaihruaiin, Bible chhiarna leh Programe chhiarna a neih zawh hnuin hunhawnna hla “ Pathian min hmangaihna a va ropui em “ KHB 38 –na chu sak a ni a. Hun kaihruaitu chuan inhmelhriattirna mipui hmaah a nei hmasa a. He hla sak zawh hian Lungphun hawnna Rev. J. F. Lalropuia, Lamka Bialtu Pastor, chuan Sam 73:23 na chhiarin lungphun hawnna chu Hallah a hman zawh chuan Pu J. Kailova leh Lalzopuii te tu leh chhungkhat leh thian tha, lainatu pangpar rawn keng te tan pangpar hlanna hun hman a ni a. He mi zawh chiah hian mipuiin an thlir leh beisei taka a hmel leh a zai ngaithla duh an tam bawk nen tiin hun vawngtu chuan Nula Zaithiam Melody Zothansangi, Aizawl, Republic Veng, chu zai tur ko niin a han zai chu Pu C. Dinthanga tawng taka “ a thlawh mawi hle mai”. Melody-in thiam taka Pathian fakna hla asak hnu hian Maj. P.C. Thansanga, Salvation Army chuan thusawina neiin hun thiam tak leh tangkai taka a hman hnu chuan. Zai lam pang bawkah lut lehin Pu Buonglienkung a ho te “ Blessed Choir” te chuan Hmar hla Pu Buonga a phuah chu an sa a, an base mawiin an er mawi hle mai, ngaihthlak a nuam hle. K.L. Liana,T.C. Zonunsanga leh K.C. vanlalruata te chu ka help deuh tihna a ni ang chu. A dawtah chuan pu Lalzuia Colney, Padma Shree pawh min itsik deuh ka ringhlelh lo chuang lo.

“ Buonglienkunga tel se zawng a va nuam leh zual dawn em,

Mahse duhaisam chauh a chang ta si”

He an zai hnu hian thusawi tawi Pu P.L. Thanga, IAS, Retd. ( Adviser, Planning, Govt. of Mizoram-in a nei a, Inchhung thu leh J. Kailova te nupain an dam laia an thil tih entawntlak tak tak tawngkain a pholang nasa hle. Ngaihthlak a nuamin fam J.Kailova te nupa khan an dam lai khan thil tha, entawntlak thil an lo va ti nasa em tih chu mipui kal khawm te rilruah a riak ngei ang tih a rinawm.

“An nupain an rauthla chuan engtin tak lo ngai ang maw,

Dawn tisei thlawn an chang si”

Hemi zawh chiah hian Pu J.C. Kailova te leh Lalzopuii te kara mipaa upa ber J.C. Ramthanga,IAS, Commissioner,MOBC/MI, Govt. of Manipur chuan lawmthu leh a nu leh pa ten a thuchah an sawi teh, hun liamhnua apa leh a nu te thatna leh ngilneina, leh thlahtu te chungchang tawi fel tak a sawina neiin, a thusawi lai hian a pa nena an sulhnu a ngaihtuahna ah lo langin lungrimin thlak/hnukulh a hial a , a sawizawm duh tawh lo hial a ni.

Pu J.C.Ramthanga’n thusawina hun a hman zawh hian Nl. Zaitiam Melody Lalthansangi chu zai tura ko leh a ni a” Nundan ka lo thiam ta “ tih hla an sa chu a thiam hle mai. He hun karlakah hian thingpui semtu leh chhang semtu te chuan an lo serve reng bawk. Hun bik tak “ Souvinir” J. Kailova leh Lazopuii te hriatrengna tih chu Rev. B. Lalhnuna’n tlangzarhna a nei a, a duh zual leh pekawma ngaihte bulah a thlawna sem a ni bawk. Hun vawngtu chuan Programme ang zela kaihruaiin Rev. Lallarmawia, Executive Secretary, Tuithaphai Presbytery chu thuchah tawi sawina hun a hman zawh chuan Blessed Choir te chuan Mizo tawngin hla an sa leh a, an thiam hle mai. He mi zawh hian a duh apiang thusawina hun mi bik pahnih hun siam sak a ni a, Upa Tuolkhawhmang of Rengkai leh Pu Lalngai of Lamka ten he hun hi an rawn hmanga, thu tawi sawina hun an hmanga, J.Kailova te Nupa damlaia khawtlang leh ram leh hnam tan, Kohhran tan chiah leh kuang chanchin mipui hmaah thiam takin an sawi. He mi zawh hian Programe angin Malsawm tawngtaina Pastor, Laldongliana’n a hman zawh chuan inkhawm hunserh tih tawp a ni.

He inkhawm hun serh ah hian mipawimawh tak tak ngainatu an kal thahnem hle mai. Manipur sawrkar milian leh Khawtlanga mi pawimawh tam tak an telin mipui ngainute chuan chawhlui kilna neiin mi sang chuang dawn lain an kil nia hriat a ni.

Heng mi bik te zingah hian , Pi Sawmpuii, D.S. Poonia, Chief Secretary, Govt. of Manipur nupui, Mrs P.C. Lawmkunga, IAS, Additional Chief Secretary,Govt. of Manipur, Pu Lallungmuana ,IAS, Commissioner, IPR, Govt. of Manipur , Christopher Doungel, IPS, (IGP), Tv. B.Tlangtinkhuma,IAS,SDO, Singat Pu K.Thansang, ADC, Churachandpur,Nula Laltanpuii(Puii),MCS, SDO, Thanlon te leh Pu H.K. Zote, President, Manipur Tribal Council te, Delhi Mizo Women Chairperson te leh adangdangin he programme hi an uap.

Mizoram atangin Pu Lalrosanga, Deputy Director General, Doordarshan, Aizawl pawn he hunserh hi a rawn hmanpui ve a ni.

Pu C. Dinthanga, Editor, Lelte Weekly pawn he hunserh hi rawn hman a duh hle a, mahse hun remchan loh avangin a rawn chhim thei ta lo a, chuvangin a duhsakna thu pawh Lelte Palai kaltlangin a rawn thawn bawk a ni.

Pu J.C Ramthanga inneitu chanchangin Lelte palai leh Lelte weekly magazine publisher leh Editor C. Dinthanga chunga lawmthu a sawi a, Kohhran leh Makpa, chhungkhat lainatu , thian tha Mizoram leh hmun hrang hrang atang rawn kal khawm te he chanchinbu kaltlangin lawmthu a sawi tak zet, tin hrilh awm hrilh awm kan lo hrilh hmaih te chungah pawh hriat thiamna kan ngen nghal bawk, media dang dang bulah pawh lawmthu hmaih lovin a sawi a ni tih Lelte palai a hrilh bawk.

“A hming kan Zokaipui,

Thangthar zofa leng ten,

Nghilh maian zawng a mawi dawn nem le,

Asulhnu hring fa leng ta’n,

Dawn thiam awm tak maw!

Mahten awmkhawhar changin,

A thuvawn,a tu le nau tawnah,

Par ang vul zel se,

Chuailo par iangin,

Zuapa nunmawi nghilh lo’ng aw,

Zuapa leh Chunnu anka,

Chul mai tur an zawng,

I phal law’ng u Chunnu’

Anka mawi rialang dai ta kha,

Sakruang piallei chang mahse,

Inhrai leng ta’n zawng,

Anka mawi ni ang thar kan ti,

Rauthla leng thiam ka nuam e,

Tawn mang a iang leh mai si,”