Halloween party ideas 2015
Showing posts with label HYA. Show all posts
Tweet Share Share Share Share Share

Friday, January 20, 2017 1

Press Release
The 18th January, 2017

Lawm Thu

Kum  2011 laia inthawka Saikot Sub Division Demand Committee-in  Saikot Sub Divisional Officer ngennaah ka sawl, ka kham ti lo a,  theipatawpa an nawrna lei lieu lieu-in Sub Divisional Officer Posting order November 11, 2016 khan suokin,  tuhin biel mipuiin  SDO Pi Lalthazam, MCS  chu ei lo nei ta a; hi demand le inzawma theipatawpa hmalatu kan President, HYA, Saikot Branch ni lai Pu Timothy Z. Zote le a  thawpui Demand Committee Office Bearers le Executive Committee member hai popo kuomah  HYA Saikot Branch  chun nasa takin lawm thu kan hril a. Political pressure mi pepuitu DR. Chaltonlien Amo, Chairman, Hill  Area Committee, Manipur le Moral support mi petu Pu T.N. Haokip, Concern MLA hai kuomah lawmthu kan hrilsa a.  Chu bakah, Saikot Sub Division Demand Committee hmalakna fe peina dinga khawm full support kan pek a nih ti kan puong a,  hieng anga biel mipui ta dinga thil tha thawtuhai hi  biel mipui khawmin ngaisang nachang hri’ng ei tiu. Chun, an nihai hi Saikot SDO um sung chu an hming hi chul din kan ring ta nawh.

Date 8 December, 2016 zan ril laia Manipur Cabinet-in District 7 a siem thar laia Pherzawl District a hung  pieng ve hi  HYA Saikot Branch chu a lawm hle a, hi le inzawma biel mipui aia hmalatu Pherzawl District Demand Committee le Pu Dr. Chaltonlien Amo, Chairman, HAC hmalakna zar lieu lieu niin kan hriet a; chuleiin, Demand Committee le Pu Dr. Chaltonlien Amo hai hi inpak an umin ngaisangum kan ti takzet a, an hming hi  ei hnam sungah chuoi ni nei din kan ring ta nawh. 

Saikot Sub Division le Pherzawl District hi a sunga cheng hnam tum tum lungruol taka an chengna, hmasawnna, vangneina, changkangna, ngirsuokna, unauhai ta dinga damna le malsawmna, Pathienin Lalna a changna  ram,  hung ni pei din ditsakna insang tak HYA Saikot Branch chun kan inhlan bawk  a, a ropui tak chu PATHIEN ni kumkhuo sien kan nuom….


Sd/ Sd/-
Darsanglun Faiheng Upa Laltinkhum
Secretary, Vice President,
Hmar Youth Association, Saikawt Branch

Read More
Tweet Share Share Share Share Share

Wednesday, September 14, 2016

NGEN NA LE INHRIETTIRNA
___________________________

State danga inthoka mithi ruong Imphal hung hrawthleng ding reng reng a hung thawntu welfare/HYA etc hai in official a information pe dinga ngen ei nih. Khawlaidung a hriet le Media fethleng a hriet hi a la um nuol el a.

Tlawmngaina ei ti zing laiin muolpho theina tamtak um thei ngai a ni lei in bengvar tak a ruong hung thawn haiin details mi hung pe vat vat dingin inhriettir le ngen ei nih.

In thahnemngaipui,

Thangthatling Sinate
President, HYA Imphal Jt HQ, Manipur.

Read More
Tweet Share Share Share Share Share

Friday, March 13, 2015
LRS Puruolte. 
~ LRS Puruolte

A hi kan thiltum, kan Motto a lo nih,
Thiltha thaw, nun dan mawi le tlawmngaina hlu,
Sietni le thatni a kan bellai, kan suong lungpui,
A sakhming lawi ang inthang raw se.
-James Songrolal, 1993

March 7: HYA Founding Day; HYA Intan dan:
A hmasa’n tiemtu ditumtakhai, Sietni le thatni a kan bellai, kan suong lungpui HYA Founding Day Chibai!

Kum 1985 a lo indin tan tah Hmar Youth Association (HYA) le Hmar nauhai tading chun March 7 hi ni pawimaw tak le sinsie zing tlak, HYA Founding Day niin tukum hi a kum 30-na (Sawmthum-na) hmel a hmuna a lo ni ve der el tah.

Sietni, thatnia  Hmar Thalaihai tlawmngaina hi Hnam dang hai tlawmngaina nekin an  hnuoi bik der naw lai zingin inhmang/tuitla zawng a um changin Hmar Thalai Pawlhai chu akul-ataiin thang ve hlak hai sienla khawm Chanchinphek (Newspaper) ah Hmar hming a’nlang ve ngai der  naw a. Asanchu, ieng dang niloin sietni le thatni a dinga tlawmngai inzawmkhawm Pawl (Philanthrophic Organisation) hming sam ding a um ve naw lei a nih. Lungrila sipliem intlunna remchang tak el Hmar pumpui huopzo HSA  36th General Assembly chu Saikot  khuoah October 2-5, 1980 khan buotsai a ni hlau el a. Chulai huna HSA General Headquarters thuoituhai chu General President Pu Hrangchalkhum le General Secretary Pu Harvey Darsiemlien hai an nih. Amiruokchu, hieng hun lai hin Pu Harvey Darsiemlien-in MDC an Candidate ve leiin HSA in harsatna  a tuok a. Chuleiin, Officiating General President-in Pu Raltawnluoi Riengsete le Officiating General Secretary –in Pu (Upa) Rosangzuol Khawlum hai hmang an nih. HSA 36th General Assembly October 2-5,1980 Saikot Playground-ah nei a nih a (Hi tum hin Pu R.K. Dorendro, Manipur Chief Minister khuollien a hmang a ni nghe nghe a, tuilienin Assembly Hall a chim bawk).

Hi tum hin HSA Tuithaphai Block Pu Lalhmuok Famhoite President ni laiin Committee chun, “Hmar lai tlawmngai inzawmkhawm Pawl indin ni sien” tiin Block Agenda dingin  a putlut a, nisienlakhawm, Assembly Speaker chun, “Lien lema la ngaituo ni lem sien”  tiin a hnawl a. HSA Assembly chun kum thum lai zet ngaituo nawn  nawkna a nei ta naw hnungin HSA Tuithaphai Block Pu Lalnuntluong Faiheng, President chel lai Committee chun “Hmar lai tlawmngai Pawl indin ni sien” ti a Block Agenda dinga a thelut thar nawk chu- “Sietni le thatnia Hmar tlawmngai Pawl indin ngei dan ding HSA General Assembly-ah thulut Block hmingin nei tha kan tih”  tiin Block Conference Thutlukna (Resolution) No. 5-na a chun an rel a. HSA 40th General Assembly October 2-3,1984 Parbung, Manipur a rorel khawl chun, Sietni le thatnia Hmar Tlawmngai Pawl indin ngei tha a tih a, a bawzuitu dingin HSA General Headquarters thuoituhai a dande nghal bawk a. Chuongchun, Hienglai hun a Tlangval tu’n chu Pu lo ni tawl tah, HSA General Headquarters a General President Pu R.Th Varte le General Secretary Pu Zuola Shunate hai inrawina hnuoiah Hmar laia inhnikna nei taphawt HSA Hall, Rengkai ah tarik March 7, 1985 khan ko khawm an nih a. Pawl hming dingin Pu Lalhmuok Famhoite-in rawtna a i siem (proposed) ngei Hmar Youth Association (HYA) ti hih sukthluk a lo ni tah a nih. Hi ni vek hin HYA thuoitu hmasatak ni dingin lunginruol takin hienghai hi an thlang ta a nih. Annihai hi HYA History le Hmar nauhai lai a chun innghil ni reng um thei ta ngai naw ni hai.

Mr. Lala Khobung – Gen. President
Mr. J.Tusing – Gen. Vice-President
Mr. Lalhmuok Famhoite - General Secretary
Mr. Thankhum - Asst.Gen.Secretary
Dr. Hrangthangluoi - Secretary Information
Dr. H.L. Liensang - Secretary Finance
Mr. Remthang Tusing - Treasurer

HYA Gen. Conference neina hmasatak hmun chu Rengkai, Churachandpur, Manipur a nih a. A Hun: March 6 – 7, 1986, Thupui: “Thiltha thaw,  Nun dan mawi, Tlawmngaina”. Chun, HYA Inawpdan (Constitution) chu Pu Lalhmuok Famhoite in a Draft, HYA Gen. Conference hmasatak hun ah March 6, 1986 ni khan Rengkai ah zawm le hmang tan dinga pawm det a nih.

HYA ka hmu dan: HYA Founding Day hi HYA hratna hmun le Hmar nau a bengvar deu hai chun Kum tin an inser hlak a. Chuonglaizing chun a la hre ngai naw khawm ei la um el thei. Asanchu, HYA hrat tawk nawna lei le an lar bek naw lei khawmin a ni thei a, hi thil hi a mak naw a, a awmnawna khawm umin an lang hran nawh. HYA Inkhawmpui le HYA hminga hnatlang/tlangsin thaw ti hai a hung inkhat ta bawk leh, HYA hi a hratnawna hmun tamtak ah um ngei a tih. Tu lei am? ti zawna ei indawn ding chun, a dawnna tawifel le indik tak chu- “Nang le kei a lei a lo ni zing!” ti hi a nih.

HYA indinna san chu hrilsei rak khawm ngai derloin a thupui le a thiltum (Motto) – “Thiltha thaw,  Nun dan mawi, Tlawmngaina”  ti hin a sukchieng hne hle. Kristien hai nun dan ding tak le awm hrim khawm a nih. HYA Thupui hi ei Bible mi’nchuktirna tam tak le inmil em em, Kristien nun dan ding tak, Luka 10:30-36 a Samari mithapa mizie dam, Galati 5:13 a “Hmangainain rawng in bawl pektuo ro…”, Galati 6:2 a “In rikphurhai chu insawk tuo ro...” a mi ti dam, Rom 12:15 a Lawmhai chu lawmpui a, taphai chu tap pui dinga a mi’nchuktirna hai po po le hin an kalna hmu ding a um der naw a. An inmil thlap lem a nih. HYA le Kristienna hi an kal ang elin mi tamtakin ei ngai el hlak hi chu a pawi tak zet! Kohran khawmin a tumin sie ei tum tlat hlak! Sietni le thatni haia hin HYA bovin ei um thei der naw zie chu in hril hran khawm ngai derloa a hrietu seng ei nih. HYA chu Kohran mi-le-sa, Kristienna le inkal deu anga ei hmu nasan khawm, siemthat ding chi khawm chu um ve ngei a tih. A iengpo khawm lo ni ta sien, HYA hi ei renga ei mawphurna a nih.

HYA a hin Kristien sakhuomi le Kohran mi-le-sa a challanghai khawm hin rawngbawlna pawimaw tak a nih, ti hriein in hmang ve hlak inla chu ei thaw ding hrim ei thaw a nih, ti ei hriet thar nuom a um. Hnam le HYA a dam naw chun Kohran le Kristienna, mimal nun le sungkuo nun, khawtlang nun khawm a dam bik ding am? ti hi ei ngaituo nawn rawp nuom a um hle. HYA hi iengtik lai hun a khawm Tawngtaina a ei san rawp hi Kristien hai mawphurna khawm a nih. A chau ei ti a lo ni khawmin a neitu nang le kei ei chau lei lo ning a tih. Tukhawm intum bik ding an um nawh!

Hnam dang dan tha hai la veng ei tiu, an dan suol thik loin… HYA hrat zo nawna san hi inzawt ding neu neu chu umin inlang hlak de sienla khawm, a hratna ding tieng hril lem ta inla, ei fe dan hi thlakdanglam chu a lo ngai ta tak zet. Khawsung inenkawlna dan hai khawm hi thlakdanglam ding neu neu a um tah. Tienlai hun anga Val Upa ang zawnga ei in keithuoi zingna khawm hi HYA a hrat thei nawna san niin an lang! HYA le Val Upa hin an thaw ding a chang chun an inhnawktuo am/an inlakpektuo? HYA hi a tak tak a suok dawk le thaw ding um hun a chun a chang a tul nawk hlak ang lawi si. Val Upa khawm inhma lai khan chuh, HYA um hma khan chu a hlu tak zet. Ngainat khawm a um hle. Khawvel hung changkang peiin Val Upa el khan a sukfel thei talo ding a hung tam ta a. HYA hin Val Upa thaw hlak hai khawm kha a hung thaw ta pei bawk. Mi thenkhat chun ro anga Val Upa nina hi ei nei le dit khawm a ni hlak leiin Val Upa bansan ti chu thil theilo le thil harsa vieu ding a khawm ei ngai el thei. A harsatna ding a um naw a, Val Upa fel, tlawmngai thei le inzaum hai chu HYA ah an umna khuo/Branch/Jt. HQ ah (Gen. Headquarters ah khawm lo ni sien) Ex Officio/Adviser khawmin an hung um thei/in ni tir thei an ni bawk. Khawtlangin Community Hall ei nei hlak hai khawm hi Hmar khuo a chun HYA Hall ti pei ta inla chu HYA suk hratna le inthanglienna, tuta neka a hung parvulna ni em em a tih. HYA hi nek hin power nei lemin in um tir ta inla, ei hnam le khawtlang a hin lo hrat chie ta sien chu a thaw thei ding hi a va tam awm de āw…

HYA Tlawmngaina le Hmar Thalaihai Tlawmngaina hi Vawisunni hin a la bo nawh... A sinthaw chen ding siemfel pek a ni naw leia hratnaw a inlang mei mei a nih. HYA hratna dinga pawimaw hmasatak HYA Inkhawmpui lien hi hung um vat thei sien. Hmar hai rorelna insang tak Hmar Inpui (Hmar Supreme House) dam hin HYA le Val Upa chungchang hi hung ngaituo vat sienla nuom a um. HYA in Ambulance tam tak la neisa sien, HYA in Water Tanker, HYA in Oxygen Cylinder, HYA in Life Jacket le boat (Lawngleng), Emergency Solar Light, First Aid/Medical Equipment le thil tul dang dang hai dam hi nei dan ngaituo nisien. HYA hi Sietni le thatni a hai hin mitinin ei mamaw si leiin ngaitha chi an nawh. Mimal thahnemngaina khawmin thangpui chi a nih. Ei Sawmapakhat hai khawm hi a chang bek a chu pe ve ta inla a pawi di'm a ni? HYA tadingin thaw nei seng tum inla, ama a inthawk beisei ringawt khawm hi thil indik an nawh ti hrie thar ei tiu.


Chung Pathien-in thuoiin, malsawm pei sienla, Sielni le thatni a kan bellai, kan suong lungpui HYA vul zing raw seh.
Read More
Tweet Share Share Share Share Share

Thursday, October 23, 2014
Text: LRS Puruolte | Photograph by: Alan Famhoite
Tuithaphai: Oct. 23, 2014 dar 10:30AM a inthawk zantieng 3:54PM sung khan Sielmat Community Hall, Churachandpur (Manipur) hmun ah  Hmar Youth Association –cum-General Election chu tluong taka nei zo a nih. Hi hun a hin Pu Ruolchunghnung Secretary, Art & Culture, HYA GHQ le Nk. Priscilla Ruolngul haiin hi hun hi an keithuoi a. Hun hawngnain “Kan Tlangram Mawi” ti hla mipuiin sak ruolna nei a ni a. Chu zo chun Rev. Jonathan Pudaite in hun hawng tawngtaina a nei a. Palai lawmlutna Pu Zothanmawia Gen. President, HYA GHQ in a hmang a, Report Pu L. Thangkima F. Tusing Gen. Secy. le Upa Laltlanmawia Secy. Finance, HYA GHQ haia inthawk ngaithlak a nih. Hi zo hin Hmar hnam sunga HYA in hnam tadinga an thilthaw that leia Thangsuo le Chawimawi tlak a a ngai mi pathum hai kuomah Chawimawina Thuziek Mawi tak el le Hmar Thangsuopuon an hlan. Chuonghai chu Pu Lalmalsawm Sellate Editor, Hmasawnna Thar (An Independent Daily Newspaper), Pu SN Ngurte (Hmar Novelist le HYA Thuoitu hlun le Hmar MIL Degree Level a a Drama Ziek 3 zet inchuon a um) le Tv. Thankhum (Tlawmngai fal bik le HYA Thuoitu hlun) hai hi an nih. Hi Chawimawina hi Pu Zothanmawia Gen. President, HYA GHQ in inhlanna a nei a nih. Hi zo hin Palai fekhawmhai Lawmthu hrilna Pu Vanlalhlun Hrangchal Executive Member, HYA GHQ in a nei a, Hun khar tawngtaina  Upa Zaiawithang Sr. Adviser, HYA GHQ in a neizovin hun khatna chu suktawp a nih. Hun karlak a hai Nk. Gloria Khawlhring (Vocalist, Semikah Gospel Band) le Pu James Pakhuongte haia inthawk hla mawi tak tak ngaithlak a ni bawk.
Hun hnina (1:05 PM in) sunzawm nawk nghal a ni a. Hi hun hi inthlangna (Election) hun a hmang a ni a. Secret Ballot Paper hmangin Thuoitu thar dinghai thlangna nei a nih. Hi hun hi Rev. Dr. Lalhmuoklien in hun hawng tawngtaina a nei a, Rev. Ruolhlei Pakhuongte Secreatry, Election Commission le Pu Albert Thangthasiem Nungate Returning Officer haiin Election ding le inzawma thuhmahruoi hrilna an nei a. Chu zo chun hun hmang zawm pei a ni a. Pu Dr. Rosiem Pudaite hi ni a Presiding Officer  in thuhmahruoi hrilna le thilthaw dan dinghai felfai takin a nei zoin. Darkar khat sung Election hi thienghlim tak le fel fai taka nei zo a nih.  Hi hun a hin Rev. Dr. Lalhmuoklien chu Recording Secretary in a thang a nih. Thuoitu thar dinga thlang thar hai Puonglangna Pu Albert Thangthasiem Nungate in a neizoin, Rev. Lalneikhup Hmar Secy., Development & Finance, Independent Church of India (ICI), Gen. Hqrs chun Intiemkamna (Oath Taking) inneitirin le Tawngtai pekna a nei a nih. Hi hun a hin Palai mi 102 in an Vote an thlak.

Rorelna hun chu (dar 2:18pm in) nei zawm nghal a ni a. Hi hun hi Pu Ramthanglien Vice President, HYA GHQ in a keithuoi a, Recording Secy., in Pu L. Thangkima F. Tusing Gen. Secy., HYA GHQ a thang a. Hi hun a hin Agenda 6 putlut a umhai chu a fethleng vawng a nih. Chu dungzui chun, (1). HYA GHQ Election a hun taka nei thei a ni tak naw leiin Kum 2010-2013 Term Kum 2014 (Kum khat) a lo fe ta chungchang thu ngaituona nei a nih a. Constitution Article No.4 angin Kum 2016 chen Kum sunga dingin Tarik ni 23 Oct. 2014 a thuoitu thlang thar dinga thlang hai hin Kum 2 sung chel dinga thlang an nih a, (2). HYA Constitution Amendment dinga Executive Council 30/4/2014 Resln. No. 1 in a lo rel ta chu Thuoitu Thlang thar haiin bawzui dinga rel a nih, (3). Hmarram Jt. Hqr. in an President ni lai Pu Challienthang Songate HYA Patron Member a Confer dinga Recommend a hung thaw chu Executive Meeting-in ngun taka ngaituo ani hnungin Special Conference –cum- Gen. Election 2014 chun Patron Member a Confer tha an tih a, (4). Hmar hnam sunga Sietni, Thatni, Martyr’s Day, Mithi Tuom Puon, Martyr’s Day Flag/Hmar zakuo a hranpa taka nei tha ti a nih a, Hi thu hi Thuoitu Thar hai bawzui dingin an sie, (5). HYA Office a HYA indin tana inthawka Thuoitu lo nit ah President le Secretary hai hming le an chel sung (Term) ziek a tar nisien kan tih, (6). Hmar hnam sunga Hlawtlingna chang hnamin Chawimawi phu a a hriet; Tlawmngaina kawnga dawng tlaka a hriet hai la khawmin Jt. Hqrs., Branch in Chawimawina pek nit a hlak sien ti chu hi hun a hin ngaituona nei a nih. Jt. Hqrs. le Branch in Tlawmngai fal Chawimawi tlak hai Record siemin  Branch/Jt. Hqrs. in Gen. Hqrs. ah recommend thawin Chawimawina hi pek ni ta hlak sien tha an ti thu hai a thang.

Hmar Youth Association (HYA) Gen. Headquarters 2014-2016 Office Bearers’ dinga thlang thar hai chu hienghai hi an nih. Gen. President- Pu Upa  Laldawnlien Varte, Gen. Vice President- Pu Zothanmawia (Uncontested), Gen. Secy.- Pu Francis Songneilien Songate, Asst. Gen. Secy.- Pu Hmangkhumlien Songate, Secy. Finance- Upa Laltlanmawia, Treasurer- Pu L. Thangkima F. Tusing, Secy. Info. & Pub.- Pu Lalramsiem (El Ar Es Neitham), Secy., Art & Culture- Pu Ruolchunghnung (Uncontested) hai hi an nih a. Secy. Games & Sports chu tukhawm Candidate an um naw leiin hi hun a hin thlang an um nawh.

General President, HYA Gen. Hqr. dinga thlang thar a um, Pu Upa Laldawnlien Varte hi hun hmangzo a inpawlpuina ei nei hun a chun, “Pathien thu le inzuol taka hnam rawngbawl a tum thu hai hrilin, Bible hi ka dictionary a ni ding a nih” tiin a hril.










Read More
Tweet Share Share Share Share Share

Tuesday, October 21, 2014

Ziektu: LRS Puruolte.

Mihriem taphawtin hi khawvel a ei damlai ni a ei pumpel theilo thil pathum a um a. Chuonghai chu Sakhuo (eini tading chun Kristienna), Fak-le-dawn le Pawlitiks an nih! Ei damsung hi thil pathum hai hin a mi del naw thei nawh. “Ka nghawk tah, ka thang ta nawh, ka thang nuom nawh, ka pei ta nawh”, ti a pumpel theilo an nih. Chuleiin hi thil pathum thu a Bible inchuktirna chu hriet le zawm ding a inchukchieng khawm a tul hle.

 Hieng thil pathum ei hril lai a hin 1985 a lo indin tah, Kum 29-na hmang mek. “Thiltha Thaw, Nundan Mawi, Tlawmngaina”, ti Thupui a neitu Sietni le thatni a kan bel lai kan suong lungpui, Hmar Youth Association (HYA) khawm hi a thangsa ve zing a nih. HYA Thupui hi ei Bible mi’nchuktirna tam tak le inmil em em, Kristien nun dan ding tak, Luka 10:30-36 a Samari mithapa mizie dam, Galati 6:2 a “In rikphurhai chu insawk tuo ro...” a mi ti dam, Rom 12:15 a Lawmhai chu lawmpui a, taphai chu tap pui dinga a mi’nchuktirna hai popo le hin an kalna hmu ding a um naw a. An inmil thlap lem a nih. HYA le Kristienna hi an kal ang elin mi tamtakin ei ngai el hlak hi chu a pawi tak zet! Kohran khawmin a tumin sie ei tum tlat hlak hi thil mak a nih! Sietni le thatni haia hin HYA bovin ei um thei der naw zie chu in hril hran khawm ngai derloa a hrietu seng ei nih.

 HYA chu Kohran mi-le-sa, Kristienna le inkal deu anga ei hmu nasan, siemthat ding chi khawm chu um ve ngei a tih. A iengpo khawm lo ni ta sien, ei renga ei mawphurna a ni ve tlat leiin HYA a hin Kristien sakhuomi le Kohran mi-le-sa a challanghai khawm hin rawngbawlna tho a nih, ti hriein in hmang ve hlak inla chu ei thaw ding hrim ei thaw a nih, ti ei hriet thar nuom a um. Hnam le HYA a dam naw chun Kohran le Kristienna, Mimal nun, Khawtlang nun khawm a dam bik ding am? ti hi ei ngaituo nawn rawp a hun ta hle. HYA hi iengtik lai hun a khawm Tawngtaina a ei san rawp hi Kristien hai mawphurna khawm a nih. A chau ei ti a ni chun eini khawm ei chau tina a nih. Tukhawm intum bik ding an um nawh!

 Young Lushai Association (YLA), Tuta huopzau lema Young Mizo Association (YMA) ti a ei hung ko tah hung intan dan tak la hang hrilsa vak inla, YMA le Kristienna inkungkai inthukzie chu indin an rawt zan June 3, 1935-a inhmukhawm hai a inthawk ringawt khawm hin an lang chieng vieu awm ie. Hi zan hin Zosap 3, Mizo Pastor 1, Upa 2, Kohran hotu dang 4, Pi Zaii Bangla-ah inhmu khawmin pawl indin an rel tah a ni kha. YMA hming hmasa YLA phuoktu khawm Zosap Rev. David Edward (Zorema pa) a ni a. A tira YLA um san, an hmathlir chu fir tak a nih ti an Dan zam a hin an lang chieng hle- Tlangval haiin an hun awlhai a tha tienga an hmang a, an nun danhai an dik tieng le a hrisel zawnga an nei theina dinga infuina a nih. Um dan iengkimah Kristien nun dan zuiin Kristien Association angin a um ding a nih. Isu nungchang ang inentir a tum tak a nih. Hi Association hin insawiselna hai, hriltlangna hai le lemchang hai ngaituong a ta, Hockey, Football, Badminton, etc hai nei ning a tih. Insung luma infiemna le lekha tiem dinghai khawm nei ning a tih... YLA Thupui tak- Kristien nun dan ngaisangtu tuelkhawm hi pawl a hin thang thei an tih... Zu dawn pumin tukhawma YLA hmunah amani, inkhawmna ah a thang ding a ni nawh... Mi  nungchang mawilo le tawng tlahawl chu member an ni thei nawh... Hieng danhai hi hi pawl thatna le felna humhalh theina dinga siem a nih ti ei hmu thei a, Thuoitu hmasahai khawm Kohran mi, rawngbawlnaa inpekna inthuk tak tak nei, ram le hnam hmangaitu indik tak an ni pei a nih! YLA/YMA indintuhai hin hi pawl le Kristienna hi an hmet kawp hne hle. Fe hrang thei ah an ngai naw niin an lang. Hienglai hun a hin Kristien khawm an la ni vawng naw leiin ringnawtuhai hipna le Isu Krista la pawm chielo hai khawmin an nunphung neka tha (Christian Social and Ethical Values) an inchuk ve theina dinga an ngaituo a ni hmel a. A nina tak a chun Chanchintha hrilna hmangruo a dingin hmang an tum niin an lang.

Kum 1954-a Kristian Thalai Pawl/Kristien Thalai Pawl (KTP) indin a ni hma khan Kohran le Kristien in ti haiin YMA a hmu le ngaidan dan chu tuta KTP ei hmu ang hi ni elin an lang. Chun, Kohran hnuoia Thalai Pawl ringum taka ni dingin a dittawk el niin an lang bawk. Amiruokchu, khawtlang le hnam thil hriet thiemna tienga hmasawnna a hung um peia kohran mal huongsung hi a lo chin tan tah ning a ta. Thuoituha’n YMA fedan le ni dan an lo in duong sa chu a hung hun tawk ta naw tan tah a. Kohran le YMA inkarah khi ni a hang hril theilo a hung um tah a nih. YLA indin tir a inthawkin YLA Chanchin bik ziekna Thubel ti Kristien Tlangau a belsa zie a lo ni hlak a. 1954 a inthawk chun Kristian Tlangau a chun Thubel chu insuo nawk a ni ta ngai nawh. Hi chunchang thu hi Dr. Sangkima chun hiengang hin a hril, “... Kohran le YMA inkara chun ‘Khi’ a hung um a, chu ‘Khi’ chu a zau tiel tiel a, a tawp a chun Kohran le YMA chu an in lak hrang ta nghe nghe a nih. An lang danin hieng hun lai a inthawk chau hin a nih YMA hin ‘Social Organisation’ anga hma lak a, Mizo popo hai inlengna dinga ke a pen tan chau na chuh! Kohran le YMA inkara inkhikna san hi thil dang tam tak baka kum 1946 a ‘Political Party’ indin a a hung um kha niin an lang. Chun, kohran thununna a inthawka intal suok hrim hrim nuomna khawm a um niin an lang bawk”. An dintu kohran (Presbyterian/Synod) leh thilthaw le hmalakna haia tuta hma angin fe kawp ta naw sienkhawm, Kristienna le YMA chu in rem tak le indittuo takin a fe kawp pei a nih ti chu YMA hmalakna popo thlirin chieng takin an lang.

Social Media tum tum haia ei hmu angin Hmar Youth Association (HYA) General Headquarters Special Conference -cum- General Election 2014 khawm October 23, 2014 zing dar 10:30AM a inthawk hin, Sielmat, Churachandpur, Manipur ah nei dinga ti a nih a. HYA Gen. Hqrts thuoitu thar ding thlangna le thuoitu dinga thlang thar hai chu Rev. Lalneikhup Hmar in intiemkamna hun (oath taking) inneitir nghal bawk ding a hril a ni bawk.

HYA ei mamawna tieng thlir zingin, Eini Hmar Kristien-hai hin iengtik lai hun a khawm Kristienna le inkallo, HYA Thupui- "Thiltha thaw, Nundan mawi, Tlawmngaina" hi chawisang zing ei tiu. HYA dam zing raw se. HYA le Kristienna/Kohran hi iengtik lai khawm the hran nawng ei tiu. Kohran le Pumkhat a ngir tlat ding ei nih. Pathien thu a kal nawh. Khawvel a ei um sung Sakhuo/Kristienna, Fak-le-dawn le Pawlitiks bovin ei um thei nawh...

Chung Khuonu’n malsawmin, thuoi pei sienla, Sietni le Thatni a kan bel lai, kan suong lungpui HYA hi Vul Zing Raw Seh!

Dated: 21-10-2014 (Tuesday)
Rengkai.



Read More
Tweet Share Share Share Share Share

Tuesday, July 05, 2011
Tarik June 12, khan HYA Saidan Branch inthlangna nei a ni a. A hnuoia hai hi thlangtling an nih.
1. President : Lalminawn
2. Vice President : Gedeon
3. Secretary : Ramhmufel
4. Asst. Secretary-cum- Info. : Jehofa Lerthansang
5. Fin. Secretary : Chanchinmawi
6. Treasurer : Lalruotsang
7. Secy. Art & Culture : Boris Ramnghakmawi
8. Secy. Games & Sports : Chawngneilien
Sd/- Thangdaivel Sd/- RohminglienRecording Secy. Presiding Officer
Read More
Subscribe to: Posts (Atom)
Powered by Blogger.