March 7: HYA Founding Day; HYA Intan dan le HYA ka hmu dan

LRS Puruolte. 

~ LRS Puruolte

A hi kan thiltum, kan Motto a lo nih,

Thiltha thaw, nun dan mawi le tlawmngaina hlu,

Sietni le thatni a kan bellai, kan suong lungpui,

A sakhming lawi ang inthang raw se.

-James Songrolal, 1993

March 7: HYA Founding Day; HYA Intan dan:

A hmasa’n tiemtu ditumtakhai, Sietni le thatni a kan bellai, kan suong lungpui HYA Founding Day Chibai!

Kum 1985 a lo indin tan tah Hmar Youth Association (HYA) le Hmar nauhai tading chun March 7 hi ni pawimaw tak le sinsie zing tlak, HYA Founding Day niin tukum hi a kum 30-na (Sawmthum-na) hmel a hmuna a lo ni ve der el tah.

Sietni, thatnia  Hmar Thalaihai tlawmngaina hi Hnam dang hai tlawmngaina nekin an  hnuoi bik der naw lai zingin inhmang/tuitla zawng a um changin Hmar Thalai Pawlhai chu akul-ataiin thang ve hlak hai sienla khawm Chanchinphek (Newspaper) ah Hmar hming a’nlang ve ngai der  naw a. Asanchu, ieng dang niloin sietni le thatni a dinga tlawmngai inzawmkhawm Pawl (Philanthrophic Organisation) hming sam ding a um ve naw lei a nih. Lungrila sipliem intlunna remchang tak el Hmar pumpui huopzo HSA  36th General Assembly chu Saikot  khuoah October 2-5, 1980 khan buotsai a ni hlau el a. Chulai huna HSA General Headquarters thuoituhai chu General President Pu Hrangchalkhum le General Secretary Pu Harvey Darsiemlien hai an nih. Amiruokchu, hieng hun lai hin Pu Harvey Darsiemlien-in MDC an Candidate ve leiin HSA in harsatna  a tuok a. Chuleiin, Officiating General President-in Pu Raltawnluoi Riengsete le Officiating General Secretary –in Pu (Upa) Rosangzuol Khawlum hai hmang an nih. HSA 36th General Assembly October 2-5,1980 Saikot Playground-ah nei a nih a (Hi tum hin Pu R.K. Dorendro, Manipur Chief Minister khuollien a hmang a ni nghe nghe a, tuilienin Assembly Hall a chim bawk).

Hi tum hin HSA Tuithaphai Block Pu Lalhmuok Famhoite President ni laiin Committee chun, “Hmar lai tlawmngai inzawmkhawm Pawl indin ni sien” tiin Block Agenda dingin  a putlut a, nisienlakhawm, Assembly Speaker chun, “Lien lema la ngaituo ni lem sien”  tiin a hnawl a. HSA Assembly chun kum thum lai zet ngaituo nawn  nawkna a nei ta naw hnungin HSA Tuithaphai Block Pu Lalnuntluong Faiheng, President chel lai Committee chun “Hmar lai tlawmngai Pawl indin ni sien” ti a Block Agenda dinga a thelut thar nawk chu- “Sietni le thatnia Hmar tlawmngai Pawl indin ngei dan ding HSA General Assembly-ah thulut Block hmingin nei tha kan tih”  tiin Block Conference Thutlukna (Resolution) No. 5-na a chun an rel a. HSA 40th General Assembly October 2-3,1984 Parbung, Manipur a rorel khawl chun, Sietni le thatnia Hmar Tlawmngai Pawl indin ngei tha a tih a, a bawzuitu dingin HSA General Headquarters thuoituhai a dande nghal bawk a. Chuongchun, Hienglai hun a Tlangval tu’n chu Pu lo ni tawl tah, HSA General Headquarters a General President Pu R.Th Varte le General Secretary Pu Zuola Shunate hai inrawina hnuoiah Hmar laia inhnikna nei taphawt HSA Hall, Rengkai ah tarik March 7, 1985 khan ko khawm an nih a. Pawl hming dingin Pu Lalhmuok Famhoite-in rawtna a i siem (proposed) ngei Hmar Youth Association (HYA) ti hih sukthluk a lo ni tah a nih. Hi ni vek hin HYA thuoitu hmasatak ni dingin lunginruol takin hienghai hi an thlang ta a nih. Annihai hi HYA History le Hmar nauhai lai a chun innghil ni reng um thei ta ngai naw ni hai.

Mr. Lala Khobung – Gen. President

Mr. J.Tusing – Gen. Vice-President

Mr. Lalhmuok Famhoite - General Secretary

Mr. Thankhum - Asst.Gen.Secretary

Dr. Hrangthangluoi - Secretary Information

Dr. H.L. Liensang - Secretary Finance

Mr. Remthang Tusing - Treasurer

HYA Gen. Conference neina hmasatak hmun chu Rengkai, Churachandpur, Manipur a nih a. A Hun: March 6 – 7, 1986, Thupui: “Thiltha thaw,  Nun dan mawi, Tlawmngaina”. Chun, HYA Inawpdan (Constitution) chu Pu Lalhmuok Famhoite in a Draft, HYA Gen. Conference hmasatak hun ah March 6, 1986 ni khan Rengkai ah zawm le hmang tan dinga pawm det a nih.

HYA ka hmu dan: HYA Founding Day hi HYA hratna hmun le Hmar nau a bengvar deu hai chun Kum tin an inser hlak a. Chuonglaizing chun a la hre ngai naw khawm ei la um el thei. Asanchu, HYA hrat tawk nawna lei le an lar bek naw lei khawmin a ni thei a, hi thil hi a mak naw a, a awmnawna khawm umin an lang hran nawh. HYA Inkhawmpui le HYA hminga hnatlang/tlangsin thaw ti hai a hung inkhat ta bawk leh, HYA hi a hratnawna hmun tamtak ah um ngei a tih. Tu lei am? ti zawna ei indawn ding chun, a dawnna tawifel le indik tak chu- “Nang le kei a lei a lo ni zing!” ti hi a nih.

HYA indinna san chu hrilsei rak khawm ngai derloin a thupui le a thiltum (Motto) – “Thiltha thaw,  Nun dan mawi, Tlawmngaina”  ti hin a sukchieng hne hle. Kristien hai nun dan ding tak le awm hrim khawm a nih. HYA Thupui hi ei Bible mi’nchuktirna tam tak le inmil em em, Kristien nun dan ding tak, Luka 10:30-36 a Samari mithapa mizie dam, Galati 5:13 a “Hmangainain rawng in bawl pektuo ro…”, Galati 6:2 a “In rikphurhai chu insawk tuo ro...” a mi ti dam, Rom 12:15 a Lawmhai chu lawmpui a, taphai chu tap pui dinga a mi’nchuktirna hai po po le hin an kalna hmu ding a um der naw a. An inmil thlap lem a nih. HYA le Kristienna hi an kal ang elin mi tamtakin ei ngai el hlak hi chu a pawi tak zet! Kohran khawmin a tumin sie ei tum tlat hlak! Sietni le thatni haia hin HYA bovin ei um thei der naw zie chu in hril hran khawm ngai derloa a hrietu seng ei nih. HYA chu Kohran mi-le-sa, Kristienna le inkal deu anga ei hmu nasan khawm, siemthat ding chi khawm chu um ve ngei a tih. A iengpo khawm lo ni ta sien, HYA hi ei renga ei mawphurna a nih.

HYA a hin Kristien sakhuomi le Kohran mi-le-sa a challanghai khawm hin rawngbawlna pawimaw tak a nih, ti hriein in hmang ve hlak inla chu ei thaw ding hrim ei thaw a nih, ti ei hriet thar nuom a um. Hnam le HYA a dam naw chun Kohran le Kristienna, mimal nun le sungkuo nun, khawtlang nun khawm a dam bik ding am? ti hi ei ngaituo nawn rawp nuom a um hle. HYA hi iengtik lai hun a khawm Tawngtaina a ei san rawp hi Kristien hai mawphurna khawm a nih. A chau ei ti a lo ni khawmin a neitu nang le kei ei chau lei lo ning a tih. Tukhawm intum bik ding an um nawh!

Hnam dang dan tha hai la veng ei tiu, an dan suol thik loin… HYA hrat zo nawna san hi inzawt ding neu neu chu umin inlang hlak de sienla khawm, a hratna ding tieng hril lem ta inla, ei fe dan hi thlakdanglam chu a lo ngai ta tak zet. Khawsung inenkawlna dan hai khawm hi thlakdanglam ding neu neu a um tah. Tienlai hun anga Val Upa ang zawnga ei in keithuoi zingna khawm hi HYA a hrat thei nawna san niin an lang! HYA le Val Upa hin an thaw ding a chang chun an inhnawktuo am/an inlakpektuo? HYA hi a tak tak a suok dawk le thaw ding um hun a chun a chang a tul nawk hlak ang lawi si. Val Upa khawm inhma lai khan chuh, HYA um hma khan chu a hlu tak zet. Ngainat khawm a um hle. Khawvel hung changkang peiin Val Upa el khan a sukfel thei talo ding a hung tam ta a. HYA hin Val Upa thaw hlak hai khawm kha a hung thaw ta pei bawk. Mi thenkhat chun ro anga Val Upa nina hi ei nei le dit khawm a ni hlak leiin Val Upa bansan ti chu thil theilo le thil harsa vieu ding a khawm ei ngai el thei. A harsatna ding a um naw a, Val Upa fel, tlawmngai thei le inzaum hai chu HYA ah an umna khuo/Branch/Jt. HQ ah (Gen. Headquarters ah khawm lo ni sien) Ex Officio/Adviser khawmin an hung um thei/in ni tir thei an ni bawk. Khawtlangin Community Hall ei nei hlak hai khawm hi Hmar khuo a chun HYA Hall ti pei ta inla chu HYA suk hratna le inthanglienna, tuta neka a hung parvulna ni em em a tih. HYA hi nek hin power nei lemin in um tir ta inla, ei hnam le khawtlang a hin lo hrat chie ta sien chu a thaw thei ding hi a va tam awm de āw…

HYA Tlawmngaina le Hmar Thalaihai Tlawmngaina hi Vawisunni hin a la bo nawh... A sinthaw chen ding siemfel pek a ni naw leia hratnaw a inlang mei mei a nih. HYA hratna dinga pawimaw hmasatak HYA Inkhawmpui lien hi hung um vat thei sien. Hmar hai rorelna insang tak Hmar Inpui (Hmar Supreme House) dam hin HYA le Val Upa chungchang hi hung ngaituo vat sienla nuom a um. HYA in Ambulance tam tak la neisa sien, HYA in Water Tanker, HYA in Oxygen Cylinder, HYA in Life Jacket le boat (Lawngleng), Emergency Solar Light, First Aid/Medical Equipment le thil tul dang dang hai dam hi nei dan ngaituo nisien. HYA hi Sietni le thatni a hai hin mitinin ei mamaw si leiin ngaitha chi an nawh. Mimal thahnemngaina khawmin thangpui chi a nih. Ei Sawmapakhat hai khawm hi a chang bek a chu pe ve ta inla a pawi di'm a ni? HYA tadingin thaw nei seng tum inla, ama a inthawk beisei ringawt khawm hi thil indik an nawh ti hrie thar ei tiu.

Chung Pathien-in thuoiin, malsawm pei sienla, Sielni le thatni a kan bellai, kan suong lungpui HYA vul zing raw seh.