Lalrawngbawla Ralte Hmar

By - Pu Hminga/April 19, 2017

Mizoram hmar tawp Tinghmun khuoa Pu L. Rinthanga le Pi Zaikung hai nupa chun naupasal pathum an nei a. A upatak, October ni 28,1963-a pieng chu a nih, Pu Lalrawngbawla Ralte Hmar (aka Bawla), a chanchin ei hril ding hi. 

Pu Rinthanga hai hi Ralte Kawlni hnam an na; an ureng hi, pasal chau khawm, an thahnem fut a (an ureng zat ka hriet nawh). Tinghmun khaw mi, pi-pu huna inthawka lo khawsa an na. Vangduoithlaktakin, ama Pu Rinthanga hi nau pathum a nei chauvin tuiah a changsuol a. A nuhmei- Pi Zaikung hin an nauhai hi a hmeithai-pui tah a nih.

Upa Rokam le Pi Siemi hai nau upatak dawt -Pi Zaikung hi nu lien rak lo, sa muk tal el; mi tumru, ringum, tuorsel le lungril nghet tak el a na. A nu le pa Pathien ti-mi an ni ang hrimin ama khawm Pathien ngaisak, kohrana tangkai em em a nih. Naupang tea hmeithai ni sienkhawm hmingsietna le hrilsep kai der lovin a nauhai hi a keitlei a nih. (Pi Zaikung le kan nu Shari hai hi an nuhai sul-khat-keu an ni nghe nghe). Pathien malsawmna dawngin Pi Zaikung ni leh, a unauhai khawm, det-in-do taka khawsak rel an ni tawl a. A upa chu kohran upa niin, Government primary school head a na, pakhat dang chu Mr. HSA lo ni tah, Judicial Magistrate a ni laia boral Tv. H Vanlaringa kha a na; pakhat nawk chu Government Middle School headmaster niin, kohran upa a ni ve ta bawk a.

Pi Zaikung khawmin malsawmna a dawng a. Nuhmei la thalai takin, makhata naupasal pathum hei enkawl chu thil namai lo tak a ni dingzie ti hriet sa a nih. Sienkhawm a nauhai hi nungchang mawi naw le hawiher indik lova khawsa um der lovin, mi nun ngil, tlawmngai thei, a tha naw zawnga har-vang le inlekphek um der lovin an hung puitling a. An naupangtak Pazawna, Mizoram Police-ah ASI sin thaw lem chu a tlawmngai luot leiin tlangval puonthuo khai laiin, a hringna a chan a. A vuina program khawm Mizorama mithi vuina program-a chu a ropuitak a ni awm deh ti khawpin a ropui a nih. An nu Pi Zaikung hin nasataka sin thawin lekha khawm a’nchuktur seng a. Pu Bawla le an mi-lai Pu Theophil ruok chu an inchuk sang ta nawh. (Theophil le Pazawn hai hi Middle School-ah kan student an nih). Thingtlanga ding chun in tha huntawk tak, thing-at-rangva in a bawl a. A in hi Pathienin a hluopui a; thli a dawng em em vei leh, thlipui le ruopui kum sawm tam do sienkhawm a sietna um lo le inhning met lovin, Tinghmun an suoksan hin an la zawr a nih.

Pu Bawla hi kum naupang tea nuhmei nei a na, nuhmei neia nau a nei chen khawm khan hlasak, hlaphuok, music hai hi a talent a nih ti la hre kher naw nih. Kum 1980 lai vel khan Tinghmun Primary school-a hin zirtirtu hlasakthiem, radio artist - Vanlalruata an hung transfer a; ama keithuoina dam, Aizawl-ah AIR station umin, Mizoram puma pop music/band a hung inlar tan lai leh a lo intuok vel hlau bawk a, Pu Bawla chu hla tieng a hung inhnik tan a.

Mizoram Assembly Speaker –Pu C Chawngkunga khan HSA Hqtrs ta dingin drum set a pek a. Aizawlah an va lak a, an hung kir tieng Tinghmun khuoa hin an riekpui a. A zingah an fepui nawk hma zingkar –zingbu fak hma chu remchanga la-in, Pu Ruata chun Pu Bawla thuoiin, drum vuok dan a hang inchuktir a. Chuonga tuk khat, zingbu fak hma po po a’n chuk chun, Pu Bawla chun nal takin drum a vuokin a roll thei a; hla beat dang dang a rem thei a nih. A remchang dan dana inchuk peiin, drum vuok puma hlasak thei (drummer cum vocalist) a hung ni hiel tah a. Hieng hun lai hin, Mizoramah drum vuok malama hla sak thei chu Peter C Lalrinmawia chau niin an hril a. Pu Bawla hi a pahnina ni awmtak a nih. Tinghmun khuoa chun pop group an form bawk a, ‘The Pole Star’ an tih. Music instrument lem chu an nei nawh a. Kum 1982 favang khan Tinghmun Middle School-ah ztt sin ka thaw tan a, Vaitin made electric guitar, a ban sei over deu, transistor radio hmang chi ka nei a. The Pole Star band chu zawm vein, ka guitar chu kan instrument nei hmasatak a ni ta awm kha. Ka zawm hmaa invawng (thing)phaw an lo tuk, la tuk zo lo chu bass guitar dingin kan siem danglam a, kan hmang bawk a.

Kum 1983-84 vel khan Pu Bawla hi hlaphuok tieng a tuon zui ta pei a. Love song, hla lenglawng/ khawtlang lungleng hla, hnam hla, etc. hai a phuok ta pei a. Pathien hla ruok chu, ‘A thu hi indik zo lo deuvin phuok rawi ka tih’ tiin, Pathien thu inthuk inzana leiin a phuok naw a nih.

Kum 1985 lai vel khan Tinghmun Middle School-ah Peon-cum-Chowkidar post an hung create a. Kan headmaster chu training-in Maharastra tieng a um-hmang dai a, head i/c ka nih. Mi tamtakin an inchu a, a buoithlak kher el. Tu am lak ding ti thuah ngaidan nghet tak ka siem a; ‘Khawtlang ta dinga mi tangkai’ ti hi priority-ah ka sie a. Anachu politics a hung inrawl nawk a, kan buoi tho tho. Thang kan khaw nasa bawk a, Pu Bawla hi lak a nih a. Hi sikula hin Craft Teacher post an hung create nawk a, teacher post-a hin a lut nawk ta pei a nih. HPC movement buoi runpui a hung tlung a, insung tulna’n a buk nasa ta bawk leiin Aizawl-ah a transfer a. Tu chen hin Aizawlah an la um zing a nih.

Back to 1987: Pu Bawla hi talented deu a ni ang hrimin hla a phuok zui pei a; a hlahai chu ama vekin a sak a, AIR Aizawl-a Hmar program-ah broadcast a ni hlak a. HPC movement a hung intan khan hnam hla khawm phuok sa peiin, a hlaphuok pakhat ‘Thangruolin, Lungruolin’ ti hla lem chu a lar hle a. Assam University-a Hmar MIL subject dinga thlang a ni ta hiel a nih.

Hieng hun hma met ni tahin ka hriet; a hla phuok hai chu sakin Hmar hla audio cassette/album a siem a. Mani hla phuok hlang hlak, mani ngeia sak a, Hmar hla album siem umsun a la ni ring a um.

Zirtirtu ni sienkhawm HSA a ngaipawimaw em em a. Mizoram HSA president sin hi vel tam a chel a. Ralte le Lusei hai theida a kai hiel hlak a. Anachu a duoi nuom ngai nawh. ‘Ralte ni langkhawm Hmar ka nih a, chu chu a huntawk’ a ti tlat hlak a. HSA Gen. Hqtrs chun award a’n hlan nghe nghe a nih.