Halloween party ideas 2015
Tweet Share Share Share Share Share

Tuesday, February 28, 2017
INPUI.COM & MANMASI DIGEST EXCLUSIVE

Manmasi Digest reporter Laltanvel in Manipur Tipaimukh Constituency-a MLA candidate hai po 'Common Questions' siem in written interview a thaw pui tawl a. Chu le inzawmin a hnuoia hi Tv. Ngurrivung le an tititna Inpui.com ah Manmasi Digest editor Pu Timothy Z. Zote hrietpuina in insuo sawng a nih. Candidate dang hai le titina hung insuo ni bawk a tih.  – Inpui.com Admin) 

I pa hming, i nu hming, i unau nei zat le an hming le an sin thaw hai i mi hril thei ding?
>>> Ka pa hming Ngurkhawsiem, ka nu hming Khawlpui. Unau piengpui pahni ka nei a, an hming hai chu Ramtharngai le Zalennuom annih. Kut sinthaw an nia, pasal annei veve an ni tah.

I nuhmei hming, qualification le occupation.
>>> Nuhmei ka la neinaw a. Tuta hri a ding hin chu ram le hnam hi ka hmangai tak a nih.

I Education qualification? Ei hnam society-a nina I lo chel ta hai?
>>> M.A. (Political Science). Ei hnam a hin nina hril tlak khawm ka la neinaw ie. Anachu tlin le tlin lovin HSA Jt Hqrs thenkhat a hai chun Treasurer le Information Secretary sin hai ka lo thaw ve hlak.

MLA i nuomnasan, manifesto le Party ticket/independent candidate i ninasan.
>>> MLA ni ka nuomna san lien tak chu Pathiena inthawka suok hmangaina indik tak leh ei ram ei hnam hi siem ka nuom lei a nih. Manifesto -(email ah attached)

Independent candidate ka ni a, independent candidate ka nina san chu tulai ei ram politics sui chet chet chun ei ram tadinga hmasawna tam lem le hrat lem a hmalak theina ‘chance’ a tam lei a nih.

Tipaimukh Constituency hi constituency danghai neka inhnuoi lema hril hlak hi iem a san niin i hriet a?
>>>Ei Kristienna hi a tak taka hmang lovin le Pathien tina tak tak khawm nei lova sin ei thaw lei niin ka hriet.

Mi tamtakin MLA an hung kai a, a vote tlingtu mipuihai nekin hmun dang mihai an hmangaiin an ngaihlu nawk lem pei hlak an ti hi thudik tlingin i hriet am? Asan iem?
>>>Iemani chen a chun thudik tlingin anlangna lai chin khawm um in ka hriet. Asanchu, MLA Election campaign lai an theina le varnahai hmanga theitawp a hmala puitu anni leiin. Amiruokchu hi lei hin a vote tlingtu mipuihai nekin hmun danga mihai an ngaihlu lem vawng tina a ni chuong nawh.

“Tipaimukh Road chu Motor in ei tlan a, ei in bawr bawr a, lampui a hung inteta ei thanghar pha’t chun Hmar biel ei tlung an tah tina a nih” tia tawngbau um hi ieng anga sukbo chi am ning a ta leh? Lampui el chau khawm ni lo, a ram sung Development dan a hin lungawium tawkin i hriet am?
>>> ...ti tawngbau um hi sukbona ding chun bieltu MLA’n thuneitu hai kuomah a ni dan ding ang tak a intluna, theitawpa a sinthawtu, labour-hai khawm an himna ding pek a nih. Ei ram sung a khuo tamtak lampuiin a paw mek a, hmasawnna khawm hmu ding a um mek. Amiruokchu, mi ram, state danghai, constituency danghai hmasawnna en chun ei lampui le ram hmasawnna hai hi lunglai a na ngawi ngawi a nih.

Ei lampui siemthatna ding le ei ram hmasawnna ding chun mipuiin vote zawr lovin, mani sie-le-tha hrietna thienghlim tak hmanga, Pathien tina neia ei vote hlutak thlak hi anih.

Pherzawl District Hmar khuo hming ngeia Manipur sawrkarin a hung siem hi lawm a  um  ruol  ruolin  tha  taka a  function  theina  ding  hin mipuiin ieng ang mawphur-na am an neiin i hriet a?
>>> Mipuiin a lawm dan thiema, a sinthawtu (offical) hai tha tak a tawiawm a. Chun sawrkar Department-hai le a sinthawtu (staff) hai a tak taka um lova, a thu chauva an um chun huoisen taka, thudik tan a sawisel (complaint) ngam ding ei ni bawk a nih.

Lo tling ni la, Manipura Hmar Magazine umsun Manmasi Digest ta din thaw pek nuom nei i ti? , I nei chun i mi hril thei ding?
>>> MLA lo tling ta lang chu Manmasi Digest hi hi neka thalem (tuta mi hi a thanaw tina ni lovin) le mipui hip thei dingin suok ngei a tih. Chun, a copy khawmhi hi nek hin tam lem in, indar zau lem ngei bawk a tih.

Mipui kuoma incha nuom le hril nuom i nei hai tawiten mi hril ta la, maw?
>>> Mipui kuoma incha nuom le hril nuom ka hau a chu a poimaw tak pakhat chau hril ka nuom. “PATHIENA INTHAWKA SUOK HMANGAINA INDIKTAK LEH EI RAM EI HNAM HI INDINTHARNAWK EI TIU” ti hi a nih.

MLA thlangtling lo ni la, chun, in party-in Ministry lo siem bawk inla portfolio iem chel in ring a? Chun, i term sung ieng ang development am i bielah kei lut i tum a?
>>> MLA thlangtling lo nita lang chu ruling party zawma portfolio tha tak chel ka tih ti ka ngaituo hranpa chuong nawh a, chu nek hmanin ka MLA biel sung a Development thil reng reng a ni dan ding ang taka a um theina dingin hma lang ka ta, ka hlaw (salary le allowances) bak chu cheng khat khawm la peng ngai naw ningah. Chun, Independent ka ni angin, zalen takin ei ram tadinga hmasawna a umtheina dingin party dang hai inthuruol a hma lak dan hai khom ngaituo ning a tih.

Pherzawl District Headquarter Pherzawl hi hmun danga sawna, chun Sub Division dang laklut ngei tuma hmalakna um anga hril hi, tling ni la, dang thei i ti?
>>> MLA ka tling chun Pherzawl District Hqrs hmun danga sawn tum a ni chun mipui hai le thang kawpin dang thei ka tih. Asanchu, India ram hi democracy, a tam lem rorelna a ni a, Pherzawl district sunga hin a hnam bing anga tiem chun Hmar hnam hi a tam tak ei nih. Chun Pherzawl hi khawtieng tieng a inthawk khawmin an laili remchang tak a ni bawk. Sawrkarin ei khawzawla District Hqrs a hung inthut ta chun Pathien le mipui hai zarin humhim thei ka tih.

Pherzawl District hi ADC member iengtikam nei thei dingin i ring a? An nei thei din ADC member iengzam nei thei an ta? Pherzawl dist hi MLA delemimitation nei hunah iengzam MLA nei thei dingin I ring a?
>>> Autonomous District Council indik tak (Sixth Schedule hnuoia) chu MLA hai khat chauh a an thaw thei ni lo a na. State bakah Central sorkar khoma hril a nei hlak a nih. ADC indik tak nei theina hnai tak ding awm a inlang chu tuita political movement thuoitu haiin sorkar le inremna thulung thatak an ziek thei hunah ning a tih. Legislators hai in bawzuinaw ding tina a ni chuong nawh a. ADC member le MLA constituency zat chu population le criteria dang dang en hlak a ni, tu el a lo hril thil chi a ni nawh. Amiruokchu, thanglak dan ding plan lo siem lawk ngei ngei chi a nih.

Vote petu ding che le an khuo hai hi ieng ang chie in am i ngaihlu in i hmangai a? An ta dingin ieng ang thiltha le hamthatna am thaw pek i tum? Ieng ang chie in am a biel mipuihai hi i hmu a?
>>> Vote mipetu ding mipuihai hi an khuoa hai ke a fein intin deuthaw ka fang suok tah a. Tipaimukh biel a in um hai hi zaah sawmkuo pasari (97%) vel chu an in a hai lut tang ka tih. Ei harsatna hai hi ka hriet chieng hle a, in thenkhat a lem chun chibai ei hang buk a, an mit menga ringawt khawm pawisa beisei niin ka hriet tawl a, lungsiet an um tawl hle. Election lai a sum tlawmte an dawng lei a sawrkara hamthatna an dawng ding reng hieng – bufai, chini, khawnvartui, lamlien tha, electric, damdawiin le a dangdanghai an dawngnaw / an hmu naw hin ka lunginsiet tawl in ka lunglai hi ana ngawi ngawi el anih.

Kum 2012 a Voters17409 kha tukum 2017 a 17749 a nina thua hin hril nuom i nei am?Hi hun sung hin Additional tamtak a um a, Deletion khawm tamtak a um a. A/C dang le tekhi in kum 5 sunga mi 340(Avg) chaua ei pung hi ieng anga hma lak am tul le thain i hriet? Hmalakna dam i lo nei ta am?
>>>Voter ID nei lo tam tak an um lei a nih. A umzie chu khawpuiah mi tam tak an um tawl ta a, an nu le pa hai chun voter ID an nei deu fur. Anchu khawpui a umhai chun voter ID uksak hmanlo an tam. Chun, Tipaimukh biel hi mi tam takin an rausan pei a ni ti ei hriet a tul. Mizoram le Tuithaphai a inpem khawm hriet ding an tam. Iengleia an inpem am a na ti chu nang khoma hril ngai lovin i hriet ka ring. Hi le inzawm in ei ram sungah thaw ding tam tak a um a; a poimaw bek bek laia mi chu road tha nei a nih. Chun healthcare tha le fak le dawn zawngna tienga hmasawn. Manifesto ah khan tam tak thaw ding ding kan chuon hrim a ni.

Tipaimukh A/C sunga mipui chu pawisa a inchawk thei an nih ti hi thudik a ni am?
>>> Tipaimukh A/C sunga mipui chu pawisa a inchawk thei annih, an ti hi thudik a nih ti theina lai chin a um. Amiruokchu Tipaimukh A/C sunga mipui hai hi an reng chun pawisaa inchawk thei vawng anni nawh ti hi ka hrietchieng hle. Ei ram a hin Baal hmaa la dingthathuon ngailo mi tamtak Lalpan a la nei anih, ti ka hrieta chuleiin Tipaimukh A/C mipuihai hi an rengin sum a inchawk thei an ni nawh.

Sawrkar thawktu tamtak an thawkna khuoa umlo hi thlangtling lo ni ta la ieng ti angin am thawng i ta?
>>>Sawrkar thawktu postingna hmuna um lohai hi MLA lo nita lang chu an posting-na hmun senga um dingin hril ka tih. Kei ngei khawm biel sunga um dinga insiem ka nih. An sinthawna a an um le an umnaw sawrkar ah indiktakin report pe hlak ka ta, sawrkar sinthawtu an sinthawna hmuna umnawhai chu an chungah dan in ro a hung rel el ding a nih.

Ditsakna: Manmasi Digest chun hlawtlingna insang tak hung chang din ditsakna kan inhlan che.
Read More
Tweet Share Share Share Share Share

Monday, February 27, 2017
INPUI.COM & MANMASI DIGEST EXCLUSIVE

Manmasi Digest reporter Laltanvel in Manipur Tipaimukh Constituency-a MLA candidate hai po 'Common Questions' siem in written interview a thaw pui tawl a. Chu le inzawmin a hnuoia hi Dr. L Fimate le an tititna Inpui.com ah Manmasi Digest editor Pu Timothy Z. Zote hrietpuina in insuo sawng a nih. Candidate dang hai le titina hung insuo ni bawk a tih.  – Inpui.com Admin) 

I pa hming, i nu hming, i unau nei zat le an hming le an sin thaw hai i mi hril thei ding?
>>> Pa hming: Rev. H. L. Ngura, Nu hming : Chamte,
Unauhai: i) Rev. Ros Infimate, Pastor, ii) Upa Lalchawisang, Program Executive, Doordarshan.

I nuhmei hming, qualification le occupation.
Ans. Nuhmei hming : Mrs. Thangneikim, Programme Executive,AIR.

I Education qualification? Ei hnam society-a nina I lo chel ta hai?
>>> MD.

Hnama nina hai: Secretary, H.S.A. Churachandpur Govt High School, 1964.

MLA i nuomnasan, manifesto le Party ticket/independent candidate i ninasan.
>>> MLA hi ka thil nuomtak ni naw sien khawm, ei ram siem thata indinthar nuomna leia MLA platform ka hung hnawt ve chau a nih.. Vawisun hin Pathien zar chauin ka insung chu ka siemzo thawkkhatin kan hriet ta a, ka hmabak chu beisei nei thak loa Hmar Ram siemthat hi a nih. Ei rama la cheng le lo suoksan ta hai khawma an beidawngna tak chu ‘ ei ram hmasawn thei naw zie le, sorkar khawm uksak lova ei um el hi a nih. Chuleia, MLA ngir tum chau lem ka nih.

Ka piengna le ka seilienna, Tipaimukh area le ei Hmar Canan ram neisun khu thingle-ruo chau an inthanga, a mipui le sawrkar thil hrim hrim hai hlak inthang thei lo. Thi vang vanga hring zing si a, ei umna hi kum tamtak an ta a. Chuleichun, Pathienin “Indinthartu ding” le MLA dangdaitak (MLA with a difference) ni ding le ei ram inthimtak sukengtu dinga a mi ko ni’n kan hriet leia Pathien ringsana ngirtum ka nih. Party ticket (BJP)a ngir ka tum nasan chu kei ka hmakhuo ngaituona lei an naw a, ka biel mipuihai hmakhuo ka ngaituo lei chau a nih. Chun, Central sawrkar hi BJP a ni leiin ka lo tling chun ei constituency (Tipaimukh) hung ngaisak thei ding sawrkar ringum ka dit lei le Cabinet Minister chen chel thei dinga an mi fielna leia BJP hi ka zawm a nih.

Tipaimukh Constituency hi constituency danghai neka inhnuoi lema hril hlak hi iem a san niin i hriet a?
>>> Tipaimukh hi biel dang po po neka inhnuoi lem a nih ti hi chu mitinin an pawm seng ring a um. Ei ram fethlenga National Highway tak ngiel khawm rausana um, ei unau Mizoram hai le ei infepawna umsun leilak siem tum lo sorkar, ei health centre po po an rem zo tah, sorkar office reng rengin an mi rausan, India rama khuo (village ) po po electric meivar hmu ding ti nisienkhawm hmuphak ve lo, tui supply that naw leiin ei nuhmei ha’n vadung tui an la chawi, sikul hai hring tawk tawk, khuo kar lam hai reng reng motor lam lien um ve lo, blacktop chu ti lo, Elektrik High Tension wire-in mi pal tlang sienkhawm mei mi pe chuong lo, hieng hai lei hin ei biel hi chu Dark continent tiin an ko hiel hlak. MLA lo ni tahai ka dem naw a, amiruokchuh, MLA biel danga hai chun hieng ang bek bek hi anni naw-in ka hriet, Development Work tha taka an thaw leiin. Eini’n hieng ang thlawta harsatna ei tuok el hi chu asan ei hriet seng tho ka ring. Kei ka lo ngai dan chun, hmangaitu, berampu tha anga thuoitu tha MLA ei la hmuphak naw lei ni takin ka hriet. Thanlon hai MLA, mi thar, Minister khawm ni lo-in a biel ah khuo kar lam hai motorable road le Blacktop hai siemin, kum tin-in tamtak rangva an khum theia, Electrik transformer hai inbukin, khuo tamtak mei an vartir thei a, Jiri area a hai blacktop road um seu suou hai khu ei ena, ei ramin a nei ve thei der dal khu chu, bieltu MLA haiin an thaw thei ve naw’m a ni ding, an uk-saknaw am a ni ding, ei biel harsatna hi an hung hmu phak ve nawm a ni ding, ei ram an lunginsiet naw hrim hrim am ani ding, a pakhat tak chum ani ding, annaw leh, areng khin am anih, lo ngaituo ve el tar oh. Hiengang ram tha tak ei nei hi sukvultu le Hmar Canan rama siemtu ding hin MLA tha le huoisen, ma ni tading ni lo, hnam ta dinga inpe zo ei mamaw hle tain ka hriet.

Mi tamtakin MLA an hung kai a, a vote tlingtu mipuihai nekin hmun dang mihai an hmangaiin an ngaihlu nawk lem pei hlak an ti hi thudik tlingin i hriet am? Asan iem?
>>> Hi thu hi mi tamtaka i’nthokin ka lo dawng ve hlak. An dik khawm ni ngei a tih. Chuong a ni chun thil poi tak ning atih.Entirna dingin kum 2016 kumtawp tienga Congress Sawrkar in sin tamtak a hung lak khan, Hmarbiel tieng mi nekin phairam mi han sin an hmu rawn lem thlat a. Chun, Sawrkar schemes le hamthatna tamtak hmarbiel lut dinghai khawm phaitieng mi ha’n an lo fakzo pek hlak a ni ti hi hriet le hmu theiin a um bawk(Phai mi ka hrilsiet nuom lei an nawh). Hi thu hi mani nauhai bei lakpeka pansakpa nauhai pek ang tlukah ka ngai. Mani biel sunga mihai phiengtam le dangchar ngawi ngawia an um hmu zinga midang la zukpek hmasa lem dam chu concern MLA indiknaw lei a nih. A san ni dinga ka ring chu, a vote tu hai an pasietna leiin thawkna an inchawk zo ve naw lei a ni’l thei. A hlangkaitu voter hai hi ngai pawimaw hmasa tak ding a ni veileh, ngai pawimaw an hlaw ngai da’l hi chu lungsietum tak an-na, thaw ngai lo ding a nih.

 “Tipaimukh Road chu Motor in ei tlan a, ei in bawr bawr a, lampui a hung inteta ei thanghar pha’t chun Hmar biel ei tlung an tah tina a nih” tia tawngbau um hi ieng anga sukbo chi am ning a ta leh? Lampui el chau khawm ni lo, a ram sung Development dan a hin lungawium tawkin i hriet am?
>>> Hi tawngbau hi thil indik a ni zie chu Tipaimukh pan a, Tipaimukh road hraw taphawt hai chun hrie chieng seng an tih. Phaizawl a hai lamlien reng reng blacktop vawngin a sip zova. Ei pansak Thanlon le ei panthlang Jiribam hai sien la, iengang development work am ka hung phursuok a ti chu mi hre thei an tih. A tawptakah, mani inhmangai lo a, ei ram lungsietumtak hi hmangai lema ei vote hlutak hi indiktaka thlak seng dingin ka fiel tawl takzet.

MLA thlangtling lo ni la, chun, in party in Ministry lo siem bawk inla portfolio iem chel in ring a? Chun, i term sung ieng ang development am i bielah kei lut i tum a?
>>>  MLA lo tlingin, kan party-in ministry lo siemin, Minister dam ei lo kai phak a ni chun, ka dittak chu Minister, Works ning a tih. Asan chu, ei rama lamlien hai a tha naw em leiin, ka term sung Tipaimukh road, JT road le khuo kar lam hai blacktop vawnga siem tum ka tih.

Pherzawl District Headquarter Pherzawl hi hmun danga sawna, chun Sub Division dang laklut ngei tuma hmalakna um anga hril hi, tling ni la, dang thei i ti?
>>> MLA kani sung Headquarter hi Pherzawl hmuna inthawk sawn ni thei naw nih.

Pherzawl District hi Autonomous District Council (ADC) Member iengtik am nei ve thei dingin i ring a? An nei thei huna din ADC Member ieng zam nei thei ning a ta? MLA Delimitation hun pha Pherzawl District hi MLA ieng zam nei thei i ring a?
>>> BJP MLA ka ni pha hi thu hi hrilfie thei vat ka tih.

Vote petu ding che le an khuo hai hi ieng ang chie-in am i ngaihlu-in I hmangai a? An ta dingin ieng ang thiltha le hamthatna am thawpek i tum? Ieng ang chiein am a biel mipuihai hi i hmu a?
>>> Vote mi petu ding ka mipuihai khu an ni chau nilovin an delram (Tipaimukh leilung) po po khawm khu ka lainain ka hmangai vawng a nih. An ni thawsuol niloa an thlangtlinghai thawsuol leia khung bek beka an hnufuol el khu chu lungril hi a na ngawi ngawi hlak a nih. Chuleichun, an ni hai ta dinga in-candidate ka ni ang hrimin ka tling vei chun mipuihai hmangai hmasatak ka tih, an hamthatna dingin transport, education, hospital hai ngaituo hmasatak tum ka tih. Chu chu Pathien hming sal meuin kan tiem ngam. Mi tamtak chun ‘Hmar biel khu hmangaitlak khawm ni lo hai a’ an mi ti khum hlak a, ka na thei em em hlak. Kei ruok chun ‘an nihai thawsuol nilem lovin MLA lo tling taha’n an lo thuoisuol ta lem lei a nih’ ti’n ka dawn hlak. Chuleichun, ka biel mipuihai hi mi taima, hnam tlawmngai, lekha thiem le MLA hai leia sungkuo rethei tak niin ka hmu tawl.

 Kum 2012 a voters 17409 kha tukum 2017 a 17749 a nina thu a hin hril nuom i nei am? Hi hun sung hin Additional tamtak a um a, Deletion khawm tamtak a uma.A/C dang le tekhi in kum 5 sunga mi 340 (Avg.) chaua ei pung hi ieng anga hmalak am tul le tha’n i hriet? Hmalakna dam i lo nei ta am?
>>>  Hi voter enrollment chungthu a hin chu hrilnuom tamtak ka nei. Iengleia Hmar mi tamtak umzing sia electoral roll a hin ei tlawm bek bek ma-na? Ti hi ka hang suichieng taktak chun MLA lo tling ta hai khan an ni vote naw dinghai chu an lo pei (cut) hlak a ni’ ti in an mi dawn tawl. Ei delram Hmar Canan ram khu ei hang suichieng tak tak chun hnam danghai mi suksiet niloin eini le eini bawk lo insuksiet a ni ti hi hriet theiin a um. BLO hai hlak MLA hai thu thu-in ditsakbiek le theidabiek neiin belsap (addition) le peithei (deletion) neiin khuotin fangin thla (photo) an zu lak a. Hiengang inpeithei hi ei lo chieng leia hnam dang population ei tluk thei naw a nih. Khawtina hlak in (household) tam tak tak ei uma chu population tlawmte te chau an min umtira, hilei hin, ei MLA hai hin thil pawi tak an mi thaw pek an naw maw?. Kei ngei khawm hi thu hi ka hriet le inruolin mi pakhat thla la ding ka tir-suk a chu DC office lai lo cut (delete)-in an belsap nuomnaw a nih. Hieng zing ding hi ei ni chun ei hnam population chun pung zai rel ngai nawng ei tih. Hienghai po po khawm hi ka lo tling a ni chun inthielfaivawng tum ngei ka tih.

Tipaimukh A/C sunga mipui chu pawisaa inchawk thei an nih ti hi thudik a ni am?
>>>  Hi thu hi thudik lo ni reng sienkhawm kei chun kan chawk thei tawl ka ring naw a, inchawk dan ding kalhmang khawm ka hriet naw bawk. Chun, inchawkna dingin sum khawm ka nei ve nawh. Amiruokchu, a mi lainahai le a mi lo lunginsiettuhai chu ka thei ang anga thangpui ka nuom. Tuchenachu, mi kan chawk nekin mihai an mithangpui lem hman hman a ni. A then lem chun ‘Dr. Lallukhum hi sum a hau a chu politics a thiem naw em a nih’ an mi ti hlak. Sum seng ka tum naw a, Politricks hmang ka tum naw bawk a; Kristien politics
hmang ka tum tlat a nih.

Sawrkar thawktu tamtak an thawkna khuoa umlo hi thlangtling lo ni ta la ieng ti angin am thawng i ta?
>>>  Mimal tin harsatna enin, sorkar dan ang taka hma lak ka nuom.

Ditsakna: Manmasi Digest chun hlawtlingna insang tak hung chang din ditsakna kan inhlan che.

Read More
Tweet Share Share Share Share Share

Monday, February 27, 2017
INPUI.COM & MANMASI DIGEST EXCLUSIVE

Manmasi Digest reporter Lalthanvel in Manipur Tipaimukh Constituency-a MLA candidate hai po 'Common Questions' siem in written interview a thaw pui tawl a. Chu le inzawmin a hnuoia hi Pi Thangṭhaling Sinate le an tititna Inpui.com ah Manmasi Digest editor Pu Timothy Z. Zote hrietpuina in insuo sawng a nih. Candidate dang hai le titina hung insuo ni bawk a tih.  – Inpui.com Admin) 

 I pa hming, I nu hming, I unau nei zat le an hming le an sin thaw hai I mi hril thei ding?
>>>  Ka pa hming chu Upa Hranglienkhum a na, ka Darchawngpui khawbung a nih. Unau 7 kan na, kei hi a upatak ka nih. Ka sanghai Darthangluoi le Sara Lalneithar hi engineer an na,
Sara chu tuhin pasal neiin Canada-ah a um a, Darthangluoi chu Mumbai Hmar Welfare Association ah Chairman sin a thaw mek.

I Educational qualification? Ei hnam society-a nina I lo chel ta hai?
>>> Inchukna tieng chu Matric chen ka zo hnungin medical tieng ka lut a, Female Health Worker a inthawk Female Health Supoervisor a promotion in, 2014 khan voluntary retirement ka lak.

MLA I nuomna san, manifesto le Party ticket/independent candidate I ninasan.
>>> Hmar hnam le ram siem ka nuom leia MLA in candidate tum ka ni tak. Ka hnam chanpui haiin an chanvo ding ang an hmu naw ka hriet hin ka lung a sukna thei hle a, sawrkar scheme an hmu ding hai inhmutira, ka hnam chanpuihai an chanvo ding pek ka nuom a nih. Ram hmasawnna dingintheitawp insuong ka ta, development fund hai a nina ang taka infetirin, ram sukchangkang ka tum a nih. Party ticket chu ka hnawt naw a, Independent a ngir dingin kan siem a nih. Pathien malsawmna dawnga thlang tling ka ni chun, sawrkarna siem ding party zawm ka tih.

 Tipaimukh Constituency hi constituency danghai neka inhnuoi lema hril hlak hi iem asan niin I hriet a?
>>> Tipaimukh constituency hi constituency danghai neka inhnuoia hril hlak ani chun, mipui haiin an aiawtu dinga an thlang MLA han an mawphurna an hlen naw lei ni dingin ka ring. Chu khelah, a ram mipui han an chanvo ding an hriet naw leiin, an ngirhmun dingah an ngir phak naw lei khawm ani thei bawk.

 Mi tamtakin MLA an hung kai a, a vote tlingtu mipui hai nekin hmun dang mihai an hmangaiin an ngaihlu nawk lem pei hlak an ti hi thudik tlingin i hriet am? Asan iem?
>>> MLA ngirhmun inchangtirtu mipui hai chu MLA in a ngaituo hmasatak dingin ka zuk ngai el a. A ram mipui neka hmun danga mihai an lo ngaisak lem hlak ani chun, sungkuo hnai inditsakna lei ani ka ring. Chun, MLA le mipui inkara sinthawtu hai khawm an pawimaw hle in ka hriet. Mani hmakhuo chau ngaitu nilo, hmangaina neia thlir bik neilo thuoitu le roreltu ei pawimaw takzet a nih.

 "Tipaimukh Road chu Motor in ei tlan a, ei in bawr bawr a, lampui a hung intet a ei thanghar phat chun Hmar biel ei tlung an tah tina a nih” tia tawngbau um hi ieng anga sukbo chi am ning a ta leh? Lampui el chau khawm ni lo, a ram sung Development dan a hin lung awium tawkin i hriet am?
>>> Hi thu an hril vet hlak hi ka hriet a, iemani zawnga zuk ngaituo chun nuizatum zawnga lak thei khawm a nih. MLA a thlang tling ka ni phawt chun, hmarram lut ding le Tipaimukh road a inzin taphawt intet har lovin Tipaimukh chen hadam deuin in thei tang an tih. Development chungthua chun, ka hril angin fund le mipuihai hamthatna ding dang dang hai ani ang takin infetir ka tih. Sawrkarin mipuihai dawmsangna dinga scheme a siem hai hi ani ang taka hmu chun, a dawngtu in an thathnempui tawk dinga siem vawng an nih.

Pherzawl District Hmar khuo hming ngeia Manipur sawrkarin a hung siem hi lawm a um ruol ruolin tha taka a function theina ding hin mipuiin ieng ang mawphurna am an neiin I hriet a? 
>>> Thuoitu le mipui hai inthuruol taka thangtlangin ei inkawl a ngai

Lo tling ni la, Manipura Hmar Magazine umsun Manmasi Digest ta din thaw pek nuom nei i ti? , I nei chun i mi hril thei ding?
>>> Hmar haiin Magazine changtlung tak Manmasi Digest ei nei hi ka suongin ka ngaina hle a, vangneina changa thlang tling ka ni chun, a sukchangkangna dingin theitawpin thang lang ka tih.

Mipui kuoma incha nuom le hril nuom i nei hai tawiten mi hril ta la, maw?.
>>> Mipuihai hriet dinga hril nuom tam tak ka nei a, zuk hril vawng khawm an tak awm ie! Chuong hai laia ka ngaipawimaw zuol bik hai chu, mipui han ram le hnam siemtu ding thlang suok nachang hrie inla ti hi a nih. Mi pakhat phing sukbelna ding chau nilo, a hnam pum huopa ei tangkaipui ding ngaituo nachang hrie inla, ram le hnamin a hlawkpui ding ani phawt chun, mimal in hamthatna ei dawng ding khawm inthla ngam ta inla ka nuom. Ei ditsak han a dum an ti leh a dum ti ve el lovin, a var chu a var ti ngam ve ta dingin hmar mipuihai ka fiel a nih.

MLA thlangtling lo ni la, chun, in party-in Ministry lo siem bawk inla portfolio iem chel in ring a? Chun, i term sung ieng ang development am i bielah kei lut i tum a?
>>> Hi thu hi chu zuk hril harsa tina tak ka neia, iemani tia thlang tling ka nia sawrkarna siem hai ka zawm ani chun, Department le Ministry pakhat taka chu Minister chanvo chel ding chun kan ring hrim hrim! Development tlura chu ka hril angin ka ram mipui han an chanvo an hmu ding a na, chu bak khawm ka theitawpin sukhmasawnna ding ngaituong ka tih. Inchukna hi ka ngai pawimaw tak a na, MLA a thlang tling ka ni phawt chun tlangram mi harsa tak taka in hluoa khawpuia inchukhai an harsatna suk zangkhai dan ngaituong ka tih.

Tlangrama inthawka school, college le university a inchuk hai an sum ngirhmun le inmila hadam taka an um theina ding Churachandpur le Imphal ah hostel siem pek ka tih. Inchuklai hai hi nakie huna ram thuoitu ding an ni leiin, a hmasataka ka sie hlak hrim an nih.

Pherzawl dist headquarter hi hmun danga sawna, chun sub division dang laklut ngei tuma hmalakna um anga hril hi, tling nila dang thei i ti?
>>> Hmun danga sawn el hi chu thil awlsam ani chu ka ring naw anachu lo tum nita hai sien, thlang tlinga ka lo um a ni chun mipui hai thangpui hai le thang ruolin dang thei ngei ka tih.

Pherzawl District hi ADC member iengtikam nei thei dingin i ring a? An nei thei din ADC member iengzam nei thei an ta? Pherzawl dist hi MLA delemimitation nei hunah iengzam MLA nei thei dingin I ring a?
>>> Hi hi chu sorkar policy dungzui ning ata, azat ding ruok chu dan le dun umsa ang hung ning a tih.

Vote petu ding che le an khuo hai hi ieng ang chie in am i ngaihlu in i hmangai a? An ta dingin ieng ang thiltha le hamthatna am thaw pek i tum? Ieng ang chie in am a biel mipuihai hi i hmu a?
>>> Vote mi petu dinghai hi ka lungrila kan vawi le ka sin tha nuom thaw thei ding ngirhmuna mi hlangkaitu ding an ni leiin, ka ngaina in ka hmangai tawl hle a, an hmakhuo khawm ka ngaipui tawl hle a nih. An chanvo ding ang an hmu naw leia harsatna an tuor hai khawm sukbo pek ka nuom a nih. Tipaimukh biel mipuihai chu mi thilthawthei hai dawivet angin ka hmu a, thuomhnaw anga inchawk le zawr thlawng thei angin an um, an nina le chanvo hrie hai sien chu hieng ang mei meiin an um ka ring nawh.

Kum 2012 a Voters17409 kha tukum 2017 a 17749 a nina thua hin hril nuom i nei am?Hi hun sung hin Additional tamtak a um a, Deletion khawm tamtak a um a. A/C dang le tekhi in kum 5 sunga mi 340(Avg) chaua ei pung hi ieng anga hma lak am tul le thain i hriet? Hmalakna dam i lo nei ta am?
>>> Hi thil hi chu ka ngaimaw tak pakhat a nih. A thaw thei han mi-le-sa neiin sin an thaw a, mani tanghma ngai leia inpei thlak ei uor bawk. Vote nei thei ding tam tak ngaiven lo le thun loa um an um a, unau hnam danghai ei tluk nawna pakhat niin ka hriet. Hnam danghai chu hming neilo le kum tlinglo chen khawm electoral roll ah an thunlut laiin, eini chu inhnelna anga hmangin, mani mi le sa bak chu ei ngaiven rak naw a hawi. Hmalakna hril tham la nei naw lang khawm, theitawp suo dingin kan siem mek a nih.

Tipaimukh A/C sunga mipui chu pawisa a inchawk thei an nih ti hi thudik a ni am?
>>> Pawisa a inchawk hlak an lo um chun an rights an hriet naw lei ning a tih, democracy hnuoia India in dan ei nei hi ngaihlu a, mitinin inza seng ding a nih.

 Sawrkar thawktu tamtak an thawkna khuoa umlo hi thlangtling lo ni ta la ieng ti angin am thawng i ta?
>>> MLA ka ni chun sawrkar thawktu ka biel sunga posting hai chu an umna hmun senga an um ding a nih. Mani sin ngaisaknawtu chu an phutawk hremna pek ning an tih.

Ditsakna: Manmasi Digest chun hlawtlingna insang tak hung chang din ditsakna kan inhlan che.

Read More
Tweet Share Share Share Share Share

Monday, February 27, 2017
INPUI.COM & MANMASI DIGEST EXCLUSIVE

 Manmasi Digest reporter Lalthanvel in Manipur Tipaimukh Constituency-a MLA candidate hai po 'Common Questions' siem in written interview a thaw pui tawl a. Chu le inzawmin a hnuoia hi MLA nilaizing le Hills Area Committee chairman Pu Dr. Chaltonlien Amo le an tititna Inpui.com ah Manmasi Digest editor Pu Timothy Z.Zote hrietpuina in insuo sawng a nih. Candidate dang hai le titina hung insuo ni bawk a tih.  – Inpui.com Admin)
I pa hming, i nu hming, i unau nei zat le an hming le an sin thaw hai i mi hril thei ding?
Hril thei e, ka pa (L) D.R.Thuoma, Chief of Patpuihmun, ka nu (L) Rodailovi. Unau pasal 5 le nuhmei 3 kan nih. Kan upa tak Lalliensung Amaw, Director NEREFS Ltd., a dawt Upa
Lalthanzam Amo, Engineer (Rtd), Ms.Chalthanthieng (BDO), Ms. Lalthangzuol, Vanlaleng (Govt. Contractor), Lalvulmawi Amo, Chief of Vangaisumtuk (Patpuihmun,Phulpui, Thingpuikuol)le a naupang tak Laltanpui an nih.

I nuhmei hming, qualification le occupation?
Lalramsang, Graduate a nih.

I Educational Qualification?
MBBS.

Ei hnam Society-a nina i lo chel ta hai?
President, HSA/Imphal,
Secy.Public Relation/HSA, GHQ.,
General President/HNU

MLA i nuomna san, manifesto le party ticket?
Ans: MLA nuomnasan chu Ram le hnam ta dinga rawngbawl ka nuom lei a ni a. Ei ram le hnam kawng iengkima a changkang dan ding. Indian National Congress(INC) Party.

Tipaimukh Constituency hi constituency danghai neka inhnuoi lema hril hlak hi iem asan niin i hriet a?
Ans: A hriltuhaiin thudik an hriet naw lei ning a tih. Tipaimukh A/C neka khawsak insanglem le inhnuoilem khawm tam tak um naw nim.

Mi tamtakin MLA an hung kai a, a vote tlingtu mipui hai nekin hmun dang mihai an hmangaiin an ngaihlu nawk lem pei hlak an ti hi thudik tlingin i hriet am? Asan iem?
Mihai chanchin ka hriet nawh a. Kei chu a mi huomsa naw ning a tih.

“Tipaimukh Road chu Motor in ei tlan a, ei in bawr bawr a, lampui a hung intet a ei thanghar pha’t chun Hmarbiel ei tlung an tah tina a nih” tia tawngbau um hi ieng anga sukbo chi am ning a ta leh? Lampui el chau khawm ni lo, a ram sung Development dan a hin lung awium tawkin i hriet am?
Imphal-Jiri road, Imphal-Dimapur road, Imphal khawsung le puo, CCpur-Muolbem le Hmarkhawlien lam a hai motorah an chuong ve pha leh Hmarbiel an sawn vawng el awm de! Lam that naw chu lungawi um love. Lam siemna ding hin Ccpur-Tipaimukh (NH-2) a thuneitu BRO hai leh inhrepawin Ministry of Rd.Transport & Highways, GOI, New Delhi ah ka zu bawzui rawp ta reng a nih.

Pherzawl District Hmar khuo hming ngeia Manipur sawrkarin a hung siem hi lawm a um em em a, tha taka a function theina ding hin mipuiin ieng ang mawphurna am an neiin i hriet a?
Naute piengthar ang a nih a, chuleiin a piengna nu, kei le mipuihaiin inthuruol taka ei enkawl zui tlat le chu dinga sawrkara thuneituhai betheitu siem chu mipui mawphurna a nih.

Lo tling nawk nila, Manipura Hmar Magazine umsun Manmasi Digest ta din thaw pek nuom nei I ti?, I nei chun I mi hril thei ding?
Nei e, nang khawma i mamaw le thangpui i tulna i mi hril phawt tul naw nim.

Mipui kuoma incha nuom le hril nuom i nei hai tawiten mi hril ta la, maw?
Hril nuom a tam ngei maw.. tawitea hril zo el thei ni naw nih a, a pawimaw taka ka hriet chu ngaidan inang naw leia mani ngaidan a ni naw lei ela mi ngaidan suol hrim hrima ngaipek dam le tharum hmangna le hringna inlak pek nuomna lungril a that naw zie dam, Hnam politics khel ei ni le var a tul zie dam le Kum 50/60 liemta laia Hmarhai District dangchara chartahai tuta ei dawn tan Pherzawl District hi Hmar District anga ei ngai leia Hmar hnam khawvel kawlkil tina umhaiin ei lawm em em hi Mihaiin Hmar District anga an mi ngaipek ve leia lungril na em em le mi thik ngawi ngawihai lungril hril hran ngai lova hriet thiem el a tul zie dam… hi tie.

MLA thlangtling lo ni la, in party-in Ministry lo siembawk inla portfolio iem chel in ring a? Chun, I term sung ieng ang development am I bielah kei lut I tum a?
Ram le hnam mipuihaiin ei mamaw ang dungzui pei le mipui dit dana hma lak pei tum ka tih.

Pherzawl District Headquarter Pherzawl hi hmun danga sawn a, chun Sub Division dang laklut ngei tuma hmalakna um anga hril hi, tling ni la, dang thei i ti?
A tul ang peia ka naute pi engthar chu hum him tlat tum ka tih.

Pherzawl District hi Autonomous District Council (ADC) Member iengtik am nei ve thei dingin i ring a? An nei thei huna din ADC Member ieng zam nei thei ning a ta? MLA Delimitation hun pha Pherzawl Dist. hi MLA ieng zam nei thei I ring a?
Hmabak thil ding a la nia, chuong ang huna ei dit dana siem dinga thunei thei, hnam danghai hneng theitu Hmarhai mamaw chu kei hi ka ni hih.

Vote petu ding che le an khuo hai hi ieng ang chie in am i ngaihlu’n i hmangai a? An ta dingin ieng ang thiltha le hamthatna am thaw pek i tum? Ieng ang chie in am a biel mipuihai hi i hmu a?
Ka hmalak dan le thawta le hmabak Development sin pawimaw taluo sunzawm tul biela um mita hmu thei le naa hriet theihai zozaihai hi mit le na nei chun an hriet.

Kum 2012 a Voters 17409 kha tukum a 17749 a nina thua hin hril nuom i nei am? Hi hun sung hin Additional tamtak a um a, Deletion khawm tamtak a um a. A/C dang le tekhi in kum 5 sunga mi 340(Avg) chaua ei pung hi ieng anga hma lak am tul le tha’ni i hriet? Hmalakna dam i lo nei ta am?
Hril ding a tam…la comment dal ka tih

Tipaimukh A/C sunga mipui chu pawisa a inchawk thei an nih ti hi thudik a ni am?
Inchawk thei an ni le ninaw ka hriet naw bak a !!! Ieng dinga inchawk ding am?

Additional Question:
Sawrkar thawktu tamtak an thawkna khuoa umlo hi thlangtling lo ni ta la ieng ti angin am thawng i ta?
Tipaimukh biela Sawrkar thawktuhai an post hmuna um dingin MLA ka ni nain nasa takin ka mawr hlak. A ram mi khawm mani rama um peilo ei nia, inhremna a an ngai pei hlaka. Ka khata thaw thei ruol an nawh, la ngaituo tlang ngai a tih.

Aw leh Manmasi Team chun tling ngei dingin ditsakna insang tak kan inhlan che.
In mi ditsakna ka lawm ngawt el..chuong ang taka Pathienin mi thangpui dingin milo tawngtai pui sunzawm ro aw.

Read More
Tweet Share Share Share Share Share

Monday, February 27, 2017
-Timothy Z. Zote
Japan Camp Approach Road,
Saikot, Tuithaphai (25.2.2017)
                                     
       Khawvela Manmasi Hmar hnam a dam  sunga a chanchin bo ta lo dinga ngai, le thang le tharhai khawma a chanchin an la hung suizui pei ding khawpa  hnam ta  dinga thawhlawk em em  Fam Rev. Dr. Rochunga Pudaite hi a chanhin kimchang ziek ding hre naw lang khawm ka hriet ve hai  tarlang lo thei loa ngaiin ka hei zieklang  tum a nih. Unau tienami hriet khawm an dang an ti angin ka lo hriet ve dan ka hung ziek ding a ni leiin, a lo indik naw deu khawm a, ka hriet ve dan ka ziek a nih ti tiemtu ha’n in mi hrietpui hmasa ka nuom a nih. A dam laia inthawka ka mi ngaisang le kan za em em, thiem inzirna (school) ama zara kai tan ve le ziek le tiem min thiemtirtu  chanchin tlin le tlin lova ziek theia ka umnaah Chung Pathien le Rev. Dr. Rochunga Pudaite family kuomah lawmthu bat lovin ka hril hmasa bawk a nih. A dam laia ka ziek insuo ka tumlai fam mi lo changsan sien khawm ziek tul tlata ka hriet leiin ka ziek a nih. Chun, kei a mimalin Principle (nghet taka ka chel) mi sietna neka mi thatna  ziek le hnam ta dinga chawimawi tlaka ka ngaihai chu an chanchin zieka sie that pek hi  a nih. Chu chu sukchiengtu chu, Manmasi Year Book Vol. I, II & III  haiah khan fie takin an langin ka hriet. A thu ringawta um nekin zieka um chun ro hlu tak an chang thei ti ka hmu vein kan hriet a. Chuleiin, ei hnam chanchin ka hriet le ka hmu hai chu ziek ngeia siethat pei hi ka mimal thiltum ka thaw mek le ka thaw pei tum a ni bawk.
Rev. Dr. Rochunga Pudaite
Hnam ta dinga ṭangkai tak hung ni dingin Rev. Dr. Rochunga Pudaite hi kum 1927 December 4, Pathienni zîngkâr khan Manipur South District-a Kristien um tanna khuo Senvon, Pherzawl District-ah a hung pieng a. Amiruokchu, Vangai tlâng Phulpui khuoa seilien a ni thung.  A pa chu, Pastor Chawnga hi Hmar laia Kristien hmasa pawl a na.  A nu Daii Zote (Hriler) chu kum thum lai nuhmei tirko sin a thaw hnungin, zirtirtu Chawnga leh an innei a, nau paruk an nei a, pasal pali  le nau nuhmei pahni an nei a.  An nauhai hming chu Lalrozâm, Lalramlien, Rochunga (a hming phuoktu a pu Lusei ṭawng/Dulien tawng or Hmar ṭawng part –II) hmang a ni leiin a bel a), Lallienkhawl, Lallienkung le Ruoltinkhum an nih.  An unau nuhmeihai khawm chu chung tieng an mi lo inlawi  san ve ve  ta a nih.

       Chi le kuongah Hmar Leiri, Pudaite a ni a. Chun,Hmar pahnam laia Leiri nunphunga chun naupasal milai chu an nuom nanaa fe thei dingin an zalên hlak a. Amiruokchu, Rochunga a pieng zân chun a pa le kohran ṭhuoitu umkhawmhai chun, Hmarin Bible an nein aw leiin an lungrilah an lang angin a lu chunga kut innghatin, “Lalpa, hi naute hi Hmar Bible inlettu dingin i kutah kan hung inhlân,” tiin an ṭawngṭai a.  Chuuongchun, ama chu ringnain beiseina insang tak an nei hrim a nih. Hieng hun laia ring thar umhai khawm hi, hnamah an hring hle ti naw ruol an nawh. Tawng hringna dingin Pathien iengkim thaw thei kuuomah an hni nasa em em a nih. Khang hun laia kohran thuoituhai tawngtaina lei kha mani Manipur a khawm Tribal lai Mizo ti lova chu Hmar hin BA inchuk theina ei nei hmasa tak a nih.Hmar ṭawnga Bible nei kâr an nghâkhla leiin mi dang chunga khawm  an hni hlak  tho ring um.Inchukna tienggah  Phulpui khuoah Primary skul a zo hnung, kum 10 mi a ni chau chun, a pa leh nga manah an fe a.  

 A pa'n Sandamna lampui a hril a, Lalpa Isu a Sandamtu dinga a pawm hnung chun, a pa chun, “I pienghlimin kohran hran ṭhuoituhai leh Hmar Bible inlettu dingin kan inhlân che a.  Chuleichun, skul ṭha lemah i kai ding a nih,” a ti chu a lungrila châm zingin, Churachandpur-a Middle skul-a kai dingin a fe ta a. Amiruokchu, Japan râl lien leiin Middle skul zo lovin, in tieng ân lawi a.  Chulai chun Mr. Sawithang-in Parbungah skul a hawng a, a hang kai a.  Tawite hnung chun Sawithang chun Sipaiah a fe san leiin, ama khawm sipai ni tumin ṭum hni lai a bei ve a.  Ana chu a la naupanga a pum a lien tawk naw leiin, an hnawl a.  Chuzova chun General Joseph Stillwell rawi a “A ram mi, a ram leilung le ṭawng hrie Intelligent Informant” a zawng lai khan an lâk ve a.  Thla thum vâng thuomhnaw zawr malama inthupin chu sin chu a thaw hnungin, Indopui a hung re tieng an ta leiin, Phulpui tieng a kîr a, lo a nei a.  Hun sawt rak lo hnung chun Calcutta-ah American sipaihaiin “landboy” (nawkawr) an lâk ti an hril a.  Sapṭawng thiem a nuom leiin, Calcutta maidan-ah tûk hni zet a va ngîr ve hnung chun, a la nuom an um naw leiin St. Lawrence high school-ah kai tumin a va fe nawk a.  Anachu, a sapṭawng thiemnain a tlin naw leiin an lâk naw a.  Rin deuvin in tieng a kîr nawk a.(Hieng ang hi nisien khawm lung a hnuol chuong der nawh-ziektu)

       Lakhipur-ah Mr. H. K. Bawichhuaka ṭhangpuina leiin Bengali High School-ah class 7-ah ân admit a.  Bengali ṭawng ruok a ni leiin harsa a ti nawk a.  Chulai tak chun Dr. Thanglung-in Lungthulien-ah Junior high school a hawng ti an hung hril a.

       July thla chun Lungthulien a pan a.  Admission thaw dingin Dr. Thanglung a biek a. Thanglung chun, “A fail tho tho ding chu admit, admit a ngai amanih,” a lo ti fiem a. Ama chun khûn taka lain, “Pu, admit khawm admit lova fail nêk chun, admit nia fail ka nuom lem” tiin a dawn a.  Class 7 a bawk a kai a.  Dr. Thanglung-in “fail tho tho ding” a ti lei khan a pu ta rak el a.  Final exam an hang nei chun, a pathumnaah a passed ta a. Chuphing chun, Dr. Thanglungin an fuinahai kha  a hriet zing a, a lawm em em hlak a nih. infuinaah lawmthu a hril tawp thei nawh.

       Kum 1946 chun Jorhat Christian High School-a class 8 zawm dingin a fe a. Chuonglaichun Pu H. K. Bawichhuaka chu Mahatma Gandhi le Pandit Jawaharlal Nehru thlawpa India Freedom Movement a zawm lei le a kûl a taia ṭhang ve leiin, Silchar le Syhlet lungina an khum hnungin Jorhat Jail-ah an sie nawk a.  Bawichhuaka lungina a va kan hmasak tak ṭum chun, Pu Bawichhuaka chun, “Saphai hi ei ramah an um a, thu an nei hlur a,  A ram mi ni zing si, Manipur-a ka fe dâm an khap a. Ka pa thlaktu chu thi ngamin Silchar D.C. Walker chun a hala.  Thu khêlin an hêk a. Pu Tlangval mâksan a, Mr. Coleman I thlawp naw chun Cachar-a inthawkin kan hnawt dawk ding che, ti dâmin an inṭhi a.  |hang ruol ei ta, Saphai hi ei rama inthawkin hnawt dawk ei tih,” a lo ti khum a.  A lungril a hne hle ni naw nîm, an high school pana a kîr malam chun Assamese student-hai lam hrawa khêk a hmu a, a ṭhang ve nghâl a. “Mahatma Gandhi! Jindabad! Pandit Nehru! Jindabad!” a va ti ve hemhem el!  Tlângmi, a ruolhai chun an inzapui a, mak an ti hle bawk.

       Lungina H. K. Bawichhuaka a va sir zât chun India ram a ngainatna a zuol peiin a hriet a. Pu Bawichhuaka hi, Tlângmi laia India Freedom Fighter pakhata hriet a ni leiin, India ram pumpuia chawimawina hmu tlâk a nih.  A chanchin lak khawma la bawzui ngei ngei  chi ni dingin an lang.  Khang lai huna inthawka India a lainatna a hung lien deu deu leiin, India ram puo tieng kum 50 lai a khawsak hnung khawmin Rochunga Pudaite chun Indian citizenship a nina a thleng nuom nawh.

       Jorhat Christian School-a Matric a zo hnung chun Calcutta-a St. Paul’s Colllege-a kai dingin, Rs.150 Mr. K. Luoia pawisa pûkin a fe ta a.  Calcutta a zuk tlung chu misuolin, a pawisa chawi po chu pe dingin chemte zumin a awmah sun dein, a pawisa.  A  a pêk vawng a, kut benthekin, zân ril lai College chu a tlung a.Amiruokchu, ring nawna tieng an Principal Dr. Nirmal Kumar Eddy chun, “India Sorkarin Scholarship for Scheduled Castes, Scheduled Tribes and Other Backward Classes (OBC) an siem thar hlim a um a.  Chu chu apply i ta, i college fee le mess fee chu tum thei el a tih,” ti pum zingin admission a pêk a; scholarship hnina lekha chu Delhi tieng an thawn ta a.

       Kâr hni hnung chun Joint Secretary, Ministry of Education chun lekha a hung thawn a, “Hmar is not included in the list of tribes in northeast India.  Therefore, your application is denied,” a hung ti ta a.  A ruolhai chun, “Lushai or Kuki inti la, scholarship chu awl takin I hmu el ding an nawm,” an ti a.  Ama chun, “Lushai kan naw a, Kuki ka ni bawk naw a. Pathien mi siemna hnam hming hi ka phur ngam naw chun, a mi siemtu Pathien chu kân zapui nîng a tih.  Ka ni naw hnam nia scholarship hmu nêk chun, hmu naw ka nuom lem,” tiin a dawn a. Principal Eddy kuoma chun a va fe nawk ta a.  Dr. Eddy chun, “Hmar hi hnam pakhat a ni ngei zie proof-nadingin Prime Minister kuomah lekha ṭha deuvin hung ziek la, lo thawn pêk ka ti che a,” a ta.

       Chawlkâr khat zet a buoipui hnung chun, a lekha ziek chu Dr. Eddy a vân hmutir a.  Phêk riet zeta sei a ziek chu, Dr. Eddy chun phêk thumin a lo suktawi pêk a, Prime Minister Nehru kuoma chun registered airmail-in an thawn ta a.

       Kâr hni vêl hnung chun Prime Minister office-a inthawkin, Prime Minister suoi sen nam meuvin lekha a hung tlung ta a.  Chu lekha chun, “The Prime Minister was moved to read your letter and he has arranged a special scholarship for you.  A new Commission for Scheduled Castes, Scheduled Tribes and Other Backward Classes is being formed and the name of your tribe has been submitted to be included in the list of tribes,” tiin Secretary to the Prime Minister chun a hung ziek a.

       Kum 1952 chun Pandit Nehru le inhmu theina um dinga a beiseina leiin, B.A. inchûk dingin Allahabad-ah admission a thaw  ta a.  AMRITA BAZAR PATRIKA, Allahabad edition hi Nehru’n a tiem hlak an ti leiin, “HMAR: The Little Known Tribes of North East India,” ti a ziek a.  Mak takin, thlalâk iemani zât leh Sunday Magazine Section-ah, phêk pui sipin an insuo a.  Chu copy chu Pandit Nehru chun a lo hmu ta ngei a, Delhi-a inzin dinga fielna lekha a hung ta a.  Amiruokchu pawisa a nei naw leiin fe thei lovin a um a. Kum 1953 November thla chun Pandit Nehru le a naunu Indira Gandhi chu All India Congress Party Working Committee hmang dingin Allahabad-ah an hung inzin a.  Chu ṭum chun lekha phêk nga laia sei, Hmar hnam harsatna ziekin, Nehru le Indira chu a vân hmupui a.  Pandit Nehru chun Delhi a inhmu zui dingin a fiel a, kalman ding khawm a pêk bawk a. 

       Hun remchâng hmasatak a chun, Prime Minister Nehru le inhmu ding chun, a ruolpa Mr. Chiten Jamir ṭhuoiin Delhi tieng an pan ta a.  February 12, 1954 zîng dar 9 chun,  Prime Minister In, Teen Murti-a chun Pandit Nehru leh an inhmu ta a.  Pandit Nehru chun, “Tuta hnung Hmar student-haiin scholarship thua harsatna an nei nawk ta ngai nawna dingin, Scheduled Castes and Scheduled Tribes Commission thar Chairman Dr. Kaka Sahib Kallelkar kuomah va fe la, sukfel vawng rawh,” a ta,  Kaka Kallelkar le inhmuna ding chun a Secretary chun appointment a siem pêk nghâl bawk a.  Chuongchun, chu ni la la chun, Hmar hnam chu, khawvêl um sûnga sukbo ta lo dingin India Sorkar lekhabua chun, chatuon chena dingin, ziek lût a hung ni ta a. Hienglai huna Rochunga Pudaite hlim hmel chu thil hmu chakum tak ning a tih. Tulai hun leh tekhi chun  mak tak el  a nit ah si.

       Rochunga Pudaite chun B.A. a zo char chun Prime Minister Nehru le inhmu dingin Delhi-ah a zu fe nawk a.  Nehru chun Dr. Verrier Elwin, Adviser to the Government of India for Tribal Affairs, Shillonga inthawka Delhi-a hung inzin le chun inhmuna a siem a, Regional Tribal Research Commissioner (Asst. Political Officer rank) sin, Dr. Elwin le thaw dingin a ruot a. Dr. Elwin chun Shillong-ah office a nei  a, North East Frontier Agency (NEFA), tuta Arunachal state-a hnamhai chanchin research thaw phawt dingin a ta.  Dr. Elwin le Delhi-a an inhmu hnung chun, Shillonga inhmu a, sinthaw dân ding hril tlâng dingin an intiem a.  Amiruokchu, Dr. Elwin chun “NEFA ramah Bible chawi thei naw ti nih,” a ti tlat leiin, ni khat khawm sin a thaw hma chun, inbânna lekha a pêk a.  Assam Governor Jairamdas Doulatram-in nasatakin a thlova chu, a nuom chuong naw a, Pathien thu lei chauva hieng chen tlung phâk ka ni lei hin, “Bible ṭhang lo chun thlai dawng kûng pakhat khawm tluk naw ningah,” tiin a dawn a. Mak takin, Governor  ditsakna  chu a zuol sawt  ti ding a um lem a.

       India rama mipawimaw  le inhmelhrietna nei ta si, thaw ding nei lo va um mei mei nekin tiin a  khuo tieng a fe a, Phulpui a hang tlung chun Hmar milûn Pherzawla Pu Saia rawi le Sartuineka Pu Thanga rawi chun, Compounder K. Luoia hung ṭhuoiin Hmar political party thar indina ṭhuoi dingin an hung fiel ta a.  Chulaichun Hmar puon chi khat  a buotsai (designed), tulaia  Hmar puon ei ti tak  le in ang  deu si  a laisen chu a designed chu,   a sangnu Lalkhawl ân khawng tir chu a lo zo fel chau  a ni thu a hril bakah, a nu le pa’n a’n lo  phûtna  angin Bible inlet a lo ṭan ta thu dam February 26, 2015 nia a Bangla, Sielmat-a kan inpawlnaah chun  a  mi hril.

       Hmar milûnhai (Mirawnkai/Miinlar) thurawn chu ngaithlain, Party thar indin a, Hmar district nawr dinga bawzui phawt dingin, Parbungah, July 16--18, 1954 chun inkhawmpui an kova.  Lungruol takin Hmar National Congress (Indian National Congress le inhrepaw zing dingin)  ṭan ding chun July 17 chun an sukthlûk ta a.  Rochunga Pudaite chu President dingin an thlang nghâl  a.  Chu ni vek chun Ngurdinglien pain  Hmar party thar lawmna din  vawk chal sûm ruk a that a. Zantieng chun tlangvâl pahni lekha pawimaw deudeu phur hi an hung tlung a. An lekha hung chawilaia pakhatna chu, Indira Gandhi-in, inkhawmpuina a hlawtling ngei a beisei thu le India ram ta dinga hmangruo ṭha a hung ni zui pei a dit thu a hrilna a na.  A pahnina chu, Sapram thirhrui (Cable) Pu Tlangval hung thawn a na.  An zuktiem chun, “My friends and I will provide for intensive Bible training in Glasgow or London Stop Cable decision,” (Kei le ka ruolhaiin Bible fîp taka in chûkna dingin Glasgow amanih London amanih i fena iengkim hung tum kan tih. I thu tlûkna hung hril nghâl rawh) ti a na.  A lungril chu namênin a buoi ta a.  A lekhathawn dawng zâna a thuhrilna ding meu khawm midang inhlânin, inngaituonain hun a hmang ta lem a.Inkhawm an ṭin a, in an tlung hnunga zâl an hang rem chun, a in thei ta naw a. Zân dâr sawm pahni hnung chun Parbung le Taithu inkâra tu ṭawpa chun ṭawngṭaiin Pathien rawl a nghâk a. Chuongchun zîng nisa suok hma met chun, a na dârah, “GLASGOW! GLASGOW! GLASGOW!” tiin vawithum a hung inri a.  Chu chu, Pathien kona ni ngeia ringin, mi hrilsiet le dem khawm pawisa lo dingin Lalpa kuomah a ṭawngṭaia ân hlân hnungin, a khuo tieng a pan nawk a. 

Pathien tieng rawngbawlna tienga kal pen ta dinga thutlukna a nei ta leiin  Hmar National Congress President a nina-a inthawk chun ân bâna, a aiawtu  ding chun a tupa, Mr. J. Lungawi, B.A. (L) chu an thlang nawk ta lem  niin a hril.

       Ni khat chu lekhathawn pakhat a dawng nawk a, chu chu lekhathawn chu Governor Jairamdas Doultram-in Hmar National Congress indin a ninaa a Pu Rochunga Pudaite kuoma lawmpuina thu a  nih.

       Sawtnawte hnung chun Imphal tieng a pan a, passport a ngaituo a.  Pu Thangkhawpao Kipgen chun kâr khat sûngin passport chu a sukfel pêk a.  Passport a nghâk laiin Hmar Bible Translation Committee chu Dr. Thanglung rawiin an indin a na, ama chu Convener le Chief translator dingin an ruot a, New Testament revision thaw a, London-a sut nghâl dingin an rêl a.  Chuongchun, Lalpa ṭhuoina ngei chun August 24, 1954 chun KLM Super Constellation vuongna lien chun London panin Calcutta-a inthawkin a vuong suok ta a.  Glasgow a chun Greek le Hebrai ṭawng inchûkin Hmar ṭawnga Bible inlet chu a ṭan ta a.  Thuthlung hlui Zawlneihai lekhabu-hai chu ân let ṭan nghâl bawk a.

       A kum nawk chun, 1955 chun Billy Graham in All Scotland Crusade ropui deu a nei a. Chun Counselor-in a ṭhang a.  Billy Graham ân hmupui a, ama chun Wheaton College Graduate School of  Theology-a lût dingin a fiel a.  A ruolpa Dr. Bob Pierce founder of World Vision-in chu-chu a lo hriet chun a college kainaa sum seng popo tum dingin lekha a hung thawn nghâl a.  Wheaton a chun M.A. in Biblical Theology le B.D. course an chuk kawp a, Bible inlet a thaw zui zing bawk a.  Thuthlung Thar London-a sut dingin a siem fel a.

       Kum 1957 chun Pu Tlangval, Watkin R. Roberts, chun Indo-Burma Pioneer Mission (IBPM) Organzing Secretary ni dingin a ruot a.  Kum 1958 kum bul chun IBPM Board chu ṭha tak indinin, Illinois State-ah registration fel takin a thaw zova.  Ama ngei chu IBPM Executive Director ni dingin Mission Board chun an ruot a.  Pu Tlangval ei ram hung sir dingin rem a ruotpui a, mawphurna po po chu, Pu Tlangval chun a kutah ân nghat ta a.  Ama khawm, chu kum chun India ramah a hung suok a, Sielmat Christian High School hawng dingin ân buotsai a, College hung ni pei dingin rem a ruot a. Hmar biela skul tam tak hawng dingin remruotna a siem a.  Lal K. Luoia ram pêk Sielmat hmun chu Mission hmunpui ding chun suknghet a hung ni ta pei a. Hun a hung fe peia nuhmei nei tula an lang le inzawmin  Lalpa kuoma a hni ang ngeiin, ama thlawptu dingin, nuhmei hmêlṭha tak le lekha thiem thei tak Khawlien, Mizoram-a Nk. Lalrimawi chu Pathienin a pêka. Lawmna famkim le beiseina insang tak leh America ram tieng an pan nawk ta a.

       Kum 1960 chun Hmar rama education movement nei nasat ṭûla a hriet leiin, Northern Illinois University-ah  Master of Science in Education Administration degree la ding chun ân admit nawk a.  Chutaka a thesis ziek chu, Education of The Hmar People ti a ni a, hi thesis ziek hi lekhabua insuoin a hung um ta pei a.  Amiruokchu a rawngbawl nuom dân le tum dân le ei ram Kohran ṭhuoituhai ngaidân leh ân ang naw leiin, hotu nina inchu theitu an lo um ve ta leiin, ei rama a rawngbawlna chu laina taka mâksan a, khawvêl lien lema rawngbawl tumna a nei a.  Sienkhawm ama dittu le ngainatu tamtakin mâksan lul lo dinga nasataka an phût leiin, education le damdawiin tieng thaw zui pei a, Kohran tienga khawm a thei anganga ṭhangpui dingin a lungril a siem ta a.  IBP Mission khawm Partnership Mission Society tiin a thleng a.  A puma chalaitu ni lova, partner (thlawptu) chau ni dingin lampui a zawng ta  pei a.
       Kum 1970 kum khan Hmar ṭawngin Bible pumpui ân let zova.  A Bible inlet laia Lalpa kuoma a hril rawp, “Tukhawma Bible vawikhat bêk a tiem hma chun thi naw raw se,” tia a ngên hlak chu sukpuitlingna dingin, Bibles For The World chu a nuhmei, Lalrimawi leh an indin thar a. Khawvêl pumpuia Bible semdar ding chun ṭhang an lâk ṭan a.  Hmar Bible an sut bâkah, khawvêl ram bung 110 chuong lai a Bible 16,000,000 chuong an sem dar ta a. Bible lo hmutuhaia inthawk chun lekhathawn maktaduoi khat nêka tam, “Bible ka tiema inthawkin ka hringna sukdanglamin a um,” tina lekha an hmu ta bawk a.  Chuonghai chu infuina nia ngaiin  BILLION BIBLE CAMPAIGN a lo thaw ta bawk a nih..

       Rochunga Pudaite hin lekhabu khawm iemani zat a ziek ta a. Chanchin |ha Johan Thlirna a ziek hmasa tak a. Tlangchar Tuihnar le Tienami a ziek nawk a.  Sapṭawng chun The Greatest Book Ever Written, ti dâm, The Book That Set My People Free ti dâm, The Dime That Lasted Forever ti dâm a ziek ta a.   Hmar ṭawng le Lusei ṭawng Pasalthra Pasarihai le Lawmna Thurûk ti a ziek a.  Chun a chanchin hi lekhabu pathum, God’s Tribesman, by James & Marti Hefley, Beyond The Next Mountain by Mawii Pudaite ziek le Fire On The Hills  Joe Musser ziekhai chu sutin an um ta a.  Chun a chanchin hi lekhabu pawimaw deu deu, Jerusalem to Inrian Jaya: Biographical history of the Church ti a le, Heroes of the Christian Faith ti volume III a chun Mother Teresa le Billy Graham inkârah an ziek bawk. Ka hring nun ti lekhabu a chanchin tiem hlawkum tak a ziek bakah a dang dang khawm a ziek bawk.

       Hollywood-in a chanchin Cinema, Beyond The Next Mountain ti an insuo ta a.  Kum 1976 khan Cambridge University chun Men of Achievement award an pêk a.  Kum 1977 khan Malone University chun Doctor of Laws ( LL. D.) an pêk a. Kum 1980 khan WHO’s WHO IN AMERICA lai an inṭhangtir a. Manmasi Year Book Vol.I & II  Who’s Who a khawm a chanchin hi inchuon a ni bawk.  Kum 2000 khan Dallas Baptist University chun Doctor of Divinity(D. D.) degree an pêk bawk.


February  26-27, 2015 ni khan Sielmat,Tuithaphai a ma chengna  Bangla- ah National Institute of Design ( Autonomous Institute under the DIPP, Ministry of Commerce & Industry, Govt. of India  hnuoia Researcher pali hieng - Arnab Senapati, Amishi Vadagama, Samridhi Thapliyal le Didini Tochhawng hai chun an subject -(Documenting the textile Traditions of the North Eastern states of India: A composite Design Satudy of Fabrics, Looms & Tools, Users and Cultural Indicators for  IGNICA) le inzawmin Hmar hnam puon  chi hrang hrang khawn khawmin Pi Buonzamawi, Pi Lawmi Pudaite, May Rose le Hmar Art & Culture Society  Chairman, Upa (Dr.) Rosiem Pudaite inrawina hnuoiah  thlalakna ni hni sung nei a ni bakah, zanah Pu Zosanghlei Joute, Seceretary,  Dr. Rosiem Pudaite le Buonzamawi le Pi Lawmi Pudaite hai inrawina hnuoiah  Hmar puon hai le an chanchin  hieng researcher pali hai kuomah hin hrilna nei a ni bawk. Hi designer pali hai hin sunah thlalakna an nei  lai chun  ka tupa Rochunga Pudaite chu Pu Ramneihlun Pakhuongte chun  car-in hung phurin kei ni lai chun a hung ṭhang ve ta a. Kan thil thaw hai chu a chanchin  ka lo hrilfie-a, a phur em em a, kei khawm chun hun remchanga ngaiin zawna siemin  thil tam tak a mi hril a, hril vawng hman ni naw sienkhawm a tlawm a zawng chu hei tarlang ka tih. Hmar thangsuopuon a lo design dan khawm fel takin a mi hril a. kan hohlimna ah chun Pathiena inthawka hnam an vawi zie chu uor takin a  mi la hril mawl mawl bawk.

       March 28,2015 a Hmar Inpui-in Retreat, Bethel, Happy Heart-ah hmang a tum khawm khan ram le hnam hmangaitu a ni leiin hun hawng tawngtaina le thucha tawi hril ding le hmang dinga ditsak taka fiel  a ni angin a taksa hratnawna  haiderin hun a hmang a. Hi nia a thuhril lungrila thi thei lo chu “ Pathien ṭi tak le thuawi taka ei um  chun  khawvel hmun hrang hranga ei umnahai hi ei ram a ni  thei  vawng a nih”  a ti  hi a nih.

       A thu hril lai hin ka lungril chun hieng ang khawpa a hrat ta’k naw hnung khawma, hnam ṭhuoituhai fielna  chu inzain hun a la hung hmang indik  hin hnam a ngaina de aw ti a min ngaituotir a.

       Ngaituona invak vel chun, kum 1984 laia  Sielmat Christian High school-a  ama zara  kai thei chau ka nina dam kha ka lungrilah a hung inlang ta zut zut a, lungriemin a mi thlak hiel chu!

A thuhril ngai zing puma ka ngaituona invakvel chun, kan ngaituo lungsieta,  a hring nun sei tak la dam dingin ka nuom takzet a.  A naupa Rev. John Pudaite-in thuhril tawi a hmang zo chun Stage-a inthawka wheel Chair-a hmanga an pafa’n an tum  chun ka en vawng vawng a, ka lunginsiet em em a, hril inhawi lo nisien khawm kan ring hman hmain ka mittui a lo tla hiel chu tie…Ka thaw thei nisien chu tleirawl deua hei siem  ka nuom ngawt chu tie!.!!!

       Thutlangkawm

       Ka pieng thla October 10, 2015 nia a thi thu ka hriet lem chun, ka sikhliem a puor a, hlilhai takin ka um a nih. Sum le paia ralna ropui taka thaw nuom lang khawm ka ngirhmunin a zir naw leiin, ka thaw thei tawk pu Rochung a puola hla pkhat ka ziek suok ve te hi a nel.  Hi hla hi Pu James songrolal Songate’n mawi tak a thluok khawm a siem a, sak nuomtuhai ta dingin phal zing a nih.

       America a’nthawka a ruong Delhi a hung tlunga, Delhi-a Hmar mipui haiin inro taka an hung thlaliem hnungin, Imphal Airport-ah a ruong  chu HYA, Imphal Jt. Hqrs.-in lo tuok-in hunser tawite hlu taka hmang a ni khan, Conductor Pu Zorisang Pangote, Secretary,HYA,Imphal Jt.Hqrs khawm conduct hlei thei lovin a hnukin a ul hiel a ni kha.

       Khan gang khawpa mipui ngainat le inpam kha… a ziek thiem deuin hei ziek sien chu tiem inhawi ngawt a tih.
A vuinia HYA, Rengkai Branch haiin salute, Hmar Pasaltha inthlaliema an inthla hai, tribal hnam thuoitu pop o ti ding hiela sunna le inpamna thu an hung hril le ralna an thawhai khan, a damlaia thil tha a lo thaw rawn zie a suklangchiengin ka hriet. Ka tupa a ni leia kan pak a ni nawh a, a nina ka hril lang chau lem a nih. Inzawt ding chu a tam ie, hril seng ni naw nih. A hla ziek suoka um khi tiem inla hun el lem raw se.

Ama, Rochunga Pudaite hi mi tumru le tairei pei tak, mi huoisen, Pathiena inthawka mani chi le kuong ngaisak mi tak, Mosie ang ela a hnampui hai hmasawn dan ding ngaituona   neia thilthawa suklang hlak a nih.

Rochunga Pudaite hin khawvêl ram bung hrang hrang 100 nêka tam a sir ta a, khawvêl vawiza le sawmnga a vêl suok ta bawk a.  Nau pathum a nei a, chuonghai chu: Paul Rozarlien, Ph.D.;  Rev. John Lalnunsang le Mary Lalsangpui an nih.  A hringnun dinga Bible châng high school-a a thlang suok chu Rome 8:32:  “Ama naupa ngei khawm hla lova ei rênga aia petu chun, thil dang po po khawm a
thlawnin  a mi pek naw ding am a nih” ti hi a nih.
Manmasi Digest editor Timothy Z. Zote le Rev. Dr. Rochunga Pudaite

1.Buonlei chang dinga muol i liem ni’n,
Thlavaiin  zaleng nau kan ṭap;
Sim le hmar sak le thlanga mi,
Tin tlangmi’n pam thu hril hi,
Kan bang thei nawh ie.

### Hnam pasalṭha mihrang fam ni aw,
Zaleng ruol luoithli nulin;Taplai reng kan bang thei nawh,
Rauthla chawlna ti’n kan ko ruoi ruoi;
I chanchin biethu khuoi ang thlum hi,
Phungruol hrilhai ṭin zai rel thiem lo.

2.I dam lai hringnun kalsiem  kha aw,
I ta ding chauva  hring lova;
Rethei hranau riengvai ding a,
I hun i lo inhlan kha;
Malsawmna a’n chang.

3. A hnung i zui Krista ta ding a,
Ringuma  i  nun }’n hlan hin;
I sukchieng pa’n a kona che,
Hril seng lo i nun pui hin,
Salut kan pek che.

4.    Hnam ta dinga i thilṭha thawhai,
Ro ang chul   ni reng nei naw nih,
A hlutzie ni ang hung tharin;
Nghil ni um thei  a tim maw?
Thang le thar  tawnah.

(Timothy Z. Zote’n pu Rochunga Pudaite thina puola date 21.10.2015 nia a phuok a nih) (25.02.2017)

Read More
Subscribe to: Posts (Atom)
Powered by Blogger.