Pathien Inpuong Hun Chu Iengtik Hun Le Hmun Am?

- Tv. Ngurrivung

Mother Teresa kha rawng a bawl tir lai, khawvelin a hriet tak tak hma khan nau fahra chawmtu ding neinawhai tadingin Calutta khawpuiah kut a daw hlak a. Nunghak kut-le-ke kim threm thruom kut daw zel zul a um chu mi phat hin a ngaidan a ni naw hle ni’ng a tih. Mother Teresa’n kut adaw lai chun a kut a chun a chil a sak pek el a. Mother Teresa ruokchun, dawthei takin, ‘Hi hi ka chan ding nisien naufahra ka chawm hai tadingin’ tiin a kut a la daw nawk trawk trawk a nih.

Ka ngaituoa Mother Teresa khawm khan kut-le-ke kim thremthruom a kut hang daw chu mihriem nina taka chun inzak ve hle’ng a tih. Amiruokchu a kut dawna san kha a hriet chieng em a inzakna chang khawm a hrietnaw ning a tih.

Mother Teresa, mi thienghlim le ropui khawvelin a ngaisang hai leh hang inhrilkhi chi lem chu a ni nawa. Ei ram, Chanchintha Mansapui bangna ei ti, Tipaimukh biel ah MLA kan candidate-na le inzawm hin kut-le-ke kim ve si a, ruol-le-pai hai thrangpuina hang hni hi chu mihriem nina ngaituo chun inzakum ka ti ve khawp el. Amiruokchu ei hma zawn a thaw dinga um ei thaw a ni ve el a. Kei a tieng suong ding neinaw lang khawm, Pathienin hrilselna a mi pek a, ka thil thawna hai ah, ka kut-le-ke hmangin thei tawpin sin ka thaw ve hlak a, pawl 7 ka zoa  inthawk BA, MA ka chuk zo chen le LLB kan chukna a hai nu-le-pa, u-le-nau hai thrangpuina thrang thrak lovin ka kut a ka thaw suokin kan chawm puitling ve a nih.  Amiruokchu tuta election ding a hin chu ka thei tawpa ka thaw khawmin ka hratna le theinain a zo naw leiin Krista Thisen zara ka unauhai kuomah, inzak inphak khawm dawn lovin mi thrangpui dingin Pathien hmingin ka hung fiel cheu a nih.
Thei tawpa hnam tadinga ei penna a hin sum-le-pai iemani zat a lo ngai hlak a, ruol-le-pai lai thrangpuina hnia kut hang daw chu, iemani chang hin ruollai khawm ei meng ngamnaw vang hlak a nih. Iengpokhawm nisien kut ei daw nasan hi ei hriet chienga hnam tadinga rawng ei bawlna a hin thei tawp suoa thrang tlang dingin Pathien hmingin ei inngen tak zet.

Ei ram ei hnam in harsatna a tuok mek a inthawka ei suok theina dingin Pathien inpuongna thlakin ei hnam mipui hai hin Pathien ei bel am aw! “Mi fel tak kan nih” tia, Josefa kuomah a unauha’n an hril khan, Josefa kha an puong nawh a. Chun an pawisa hai a let hniin an hung chawi a, rim inhnik le khuoizu hai dam an hungchawi khawm khan an puong chuong le! Amiruokchu “I KUOMAH IENGAM HRIL TANG KAN TI LEH? IENG AM HRIL KAN TI A? IENGTIN AM IN HRILVENG TANG KAN TI LEH?” an hang ti zet khan chu, atira inthawka lo hre rantu/ hrezingtu,  an Unaupa Josefa, kha an puong chau anih.
Ei ram le hnam in harsatna a tuok mek a inthawka mi sansuok theitu ding chu Lalpa hnuoi le van siem tu chau hi a nih. Amiruokchu, mani felna, Pastor le Kohran upa ei nina hai suong a Pathien ei dawr sung hin chu ei ram le hnam damna dingin Pathien hi ei ni ah inpuong tak tak ngai naw ni a. Chun, sum-le-pai hausakna, ei nei rothil hai suonga Pathien ei dawr sung hin chun ei ram le hnam damna dingin ei niah Pathien in puong tak tak ngai bawk naw nih. Amiruokchu, “Lalpa i kuomah iengam hril tang kan ti leh?” ti a, inngaitlawm taka lungril le titakzeta

Pathien hma bul ah ei bawk khup chun Ami hai, a siehlaw Hmar nauhai damna dingin Lalpa chu inpuong ngei a tih.
Unauhai, Pathien inpuongna thlak ni dingin “I KUOMAH IENGAM HRIL TANG KAN TI LEH? IENG AM HRIL KAN TI A? IENGTIN AM IN HRILVENG TANG KAN TI LEH?” ti a, bawk khupa Pathien chibai buk thei seng dingin Lalpa’n mi thangpui seng raw se. Amen!