Pherzawl District - God's Gift District

(14th December,2016)

(Chairman le Secretary, Pherzawl District Demand Committee remtinain hieng ang hin mipui hriet dingin Timothy Z. Zote, Public Relations, Pherzawl District Demand Committee chun thusuok siem a nih).

Pherzawl District date 8th December, 2016 nia Manipur Sawrkar ngirlai Cabinet in  District 7  a siem thar laiah Pherzawl District khawm a thang hi, Pu O Ibobi Singh, Chief Minister, Manipur le a thawpui Cabinet zar, Pathien zar,  le Dr. Chaltonlien Amo’n tulai hnaia thei tawka a  thanglakna  zar lieu lieu niin ei hrieta chuleiin, Pherzawl District biel  mipui aiin committee chun chawimawina insang tak an hlan a nih.

Chun, whatsapp,electronic mail, media, fethlenga lawmpuina thu hriltu le thawntuhai po po kuomah media hmangin lawm thu ei hril bawk.

Chun, Pherzawl District huom sungah hin Manmasi thla Zo nauhai – Simte, Paite, Zou, Gangte, Vaiphei, Thadou le Hmar lungruol taka ei cheng tlang pei committee chun  a nuom takzet a nih.

Pherzawl District hi tu hnam ta a ni nawh a, a sunga cheng hnam tin ta a ni a, a neitu indiktak ei ni seng  a nih. Hmsawnna lampui ei hrawnaa inhrietthiemtuona tha tak neia kal pen pei din committee chun a nuom takzet a nih.

Chun, Pherzawl District hi a biel mipui ta ding chun Pathien  Thilthlawnpek  nia ei hriet leiin GOD GIFT  DISTRICT ei ti hiel a nih. Pathien-in inlalna le ropuina chang sien. Ram roreltu le a sunga sawrkar sin thawtu, department head le ram roreltuhai, a sunga cheng hnam um  popo mi entawn tlak ni dingin mani hmazawn sengah taima taka thaw seng  din ei i ngen takzet bawk a nih.

Chun, Date ni 16th  December, 2016 khin Pherzawlah,  Pherzawl District chu Pu O. Ibobi Singh, Chief Minister, Manipur chun a hawng ding a ni a, chuleiin, lawmtu mi tuel khawm mani remchang ang peia fe din fiel le inhriettir  ei  ni bawk.

Chun, Pherzawl District le inzawma ngaidan tha  le thurawn tha nei hai chun iengtiklai khawm  committee kuomah hung pe pei din ei inngen takzet bawk a nih.