Mizoram-HPC(D) inbiekna ra hmu kar mipuiin ei lo nghakhla taluo el am?

-LRS Puruolte

Mizoram sawrkar le HPC (D) inbiekna fe mek hi mi tam tak ngaiven a hlaw a, HPC (D) thlawptu annawleh Hmar mipui le anni thlawptu hai chauh nilovin Mizoram mipui le a sunga cheng pawl tum tum hai ngaiven khawm a hlaw tak zet. Thuvuongva tam tak khawm la hung suok pei dingin a'nlang. In ringzo intuona le inringhla intuona hai chu tuhin a ieng am a buk a rik lem a? ti indawnna dawn ding nisienla chu a dawn intak hun lai tak ni mei a tih!

Hi inbiekna hin ieng am hung ra suok a ta? ti hi indawnna lientak a nih. A dawnna hi hun hung fe peiin a la hung hril ding a nih. Social media tum tum, Chanchinbu, Facebook, WhatsApp, Khawlai titi, Taptebul titina haia hmun hluo lientu tak khawm a nih.

Mizoram-HPC (D) inbiekna ra hmu kar mipuiin ei lo nghakhla taluo el am? ti khawm hih, hi chungchang thu a indawnna pawimaw tak chu a hung ni tah a nih. Naupang chun thil an lo hmawhla hlak a, iemani tak hawn ngei ngei dingin mi an lo beisei nghal hlak. Chuongang deu chun mipui hin a ra hmu hi ei lo tum inrang taluo nisien a hawi!

In Unauna, Insuikhawm hai hi a țha ti naw pakhat khawm ei um naw a, amiruokchu In Unauna, Insuikhawm hai hi a taka a um theina ding chun hmalak dan indik le lampui indik hraw a ngai a nih. Chu ding chun tuta Mizoram-HPC (D) inbiekna hi a ni am leh? ti chu mani sie-le-țha hrietna hmanga lo enfel thei a nih.

Mizoram a Hmar hai hi an harsatna ieng am a ni a? ti ngaisak nuom lova Mizoram sawrkar in ama le a thlawptuhai hmanga hi inbiekna hi a buotsai a, a hming mei mei a a thawpui a lo ni vei chun hmatieng ah hlawtlingna a um tak tak chuong ding am? ti chu sawrkar pakhat, India rama Kristien State umsun a insal ngam ngat Mizoram hin a ngaituo chik hle a ngai a nih.

Hi Mizoram-HPC (D) inbiekna hin ra țha, ra ditum, mitin a tu tieng tieng khawm damna le lawmna hung intlun mawl sienla nuom a um. Inbiekna hi Inhlemna a ni pal vei chun a khawhnunga thil ditumlo a tlung khawm inlau um tak a nih. Chuleiin mimal, mipui le kohran khawmin hi inbiekna hi țawngțainaa ei hriet a, ei Pathien kuoma ei intlun rawn nuom a um tak zet.

Lung inuoi takin lo thlir phawt chi a la ni hmel naw maw? Mizoram-HPC (D) inbiekna ra hmu kar mipuiin ei lo nghakhla taluo el am?