HPC-D le Mizoram sorkar Inbiekna: Thlirtu Ngaidan (Analysis)

- S. Hmar, Contributor
 
1.  State Government in ama state boundary sung le ama jurisdiction sung na na na chu, a nuom phawt chun, 6th Schedule neka provision tha lem a siem thei niin ka hriet.  Amiruokchu, chu chu an thaw nuom na ding san ieng khawm a um nawh (Vana ra anih).  Chuleiin ADC (6th Schedule) neka thalem chu a um theinaw ti el inla tha lem a tih.

2.  Chanchin ka lo hriet dan chun, ADC (6th Schedule) mi pek chu an nuom naw hul huola. Nisienlakhawm, Sinlung Hills District Council hnuoia mipui/hnam ta dinga improved provision tha tak tak (hnawl dinga inpam um tak tak khawm ani thei) an mi tiem ani awm.

3.  A chunga points no. 2 hi ei nuom chun ei pawm thei.  Ei lo pawm ding ani chun, “ACT” a pass ni ngei raw seh.  Chun, “Kum 3 dan or kum 5 dan or kum 10 dana (whatever) “ACT” passed a um chu review nei ni hlak raw seh” ti provision khawm a ACT a hin thangsa ngei sien.  Chu chu khela chun SHDC demarcation/boundary hi official taka sukchieng or sukfel ni ngei ngei raw seh.

4.  Points No. 2 anga agreement ei lo sign ani chun, 6th Schedule iengtik khawm ei hmu ring a um ta nawh (Underground thar ei indina tha thara thang ei lak ani ngat naw chun).  Asanchu, Underground activity le inthatna, etc., hai hi a ram mipui khawmin an nghawk ta bek beka, mipui (YMA) khawma inremna siem dingin Sawrkar nasatakin a nawr hrim anih; Sawrkarin ami lunginsieta ami ngaisak hrim hrim lei ani nawh; a mipui (YMA) in an nawr nasat lei ani deu tak niin an lang.  Amiruokchu, ei theinghil lo ding chu, mipui/YMA in Sawrkar kuoma “Hmar hai demand hi sukpuitling pek la, an hni hni pe el rawh, inrem takin um tang ei tiu” ati naw hrim hrim. A thudik chu, YMA hin SHDC 6th schedule a hlangkai ding hi 100% a opposed zinga, amiruokchu buoina le inremnawna hi a nghawk bek bek ta leiin sawrkar hin kawng iengtin takin mani ngaituo sienla, inremna hi siem hrim hrim ta raw seh ti hi an dit lem cho anih.

5.  Points No. 4 hi ngun taka ei ngaituo chun, tuta offer/intiemna an mi pek hai popo hi la hnawl hri inla a tha lem ka ring.  Asan chu, 6th schedule mi pe nuom naw hle hai sienkhawm, lo thei loa anmi pekna hun a la hung tlung ngei ding anih (hun chu a la lak met el thei).  Chuleiin, inhmaw naw inla a thatak ka ring.  Chu el khela chun, 6th Schedule chu Indian Constitution hnuoia provision ana, state in ieng kawng kawng khawmin a thleng dang lam thei naw hrim hrim.  6th schedule hnuoia provision/offer um hai hi chu khawvel tawp chen khawma  State sawrkar (a tu tu khawmin) in a tawk chang theilo le thleng dang lam thei lo ding hrim hrim anih.  Chun, point No. 1a ei tarlang ang khin, 6th schedule neka tha iengkhawm a um nawh.

6.  6th Schedule nilo State (Mizoram sawrkar) in Provision tha tak tak ACT a passed ngeia ami pek khawm ni sien, ama siem ani tlat leiin, iengtik lai khawm or an nuom hun hunah assembly member (MLAs) 2/3 majority support hmanga thleng danglam thei ani ding anih.  Chu chu dit a um nawh.

7.  Amiruokchu, ei tlangvalhaiin {HPC(D) sipai hai} ralthuom chelek le ramhnuoia khawsa kan nghawk taluo bek bek an tah, inremna siempui mama tang ei tiu ei ti ani ruok chun, hril thei iengkhawm ei nei nawh.  Chuong ani chun, Offer anmi pek ang ang chu ei pawm phawt (at least for the time bieng) mama chu a ngai ding anih.

8.  Points No. 2 le No. 7 anga ei che ding ani ro ro chun Bills (proposed act) hai lai “Hmar language is also a mizo language and in every aspects Hmar language will also be considered as Mizo language” ti hi thangsa ngei ngei sienla thang a tih, chun passed ni ngei bawk raw seh.  Chu chun, mizorama Hmar tawng hmanghai ta dingin a ram neitu nina le thawvengna le zalenna nasa tak a pek ngei ding anih.  Chu khela chun, sawrkar sin tam tak (a bik takin bank jobs le a dang dang) chu local tawng tiem le ziekthei hi compulsary eligibility criteria ani hlaka, chuleiin hi a chunga language bill hi passed ani ve vei chun, Hmar tawng thiem lei ringawtin Mizoramah bank jobs (Public sector) haia sin Hmar mi tamtakin an hmu pha ding anih.  Tuchen hin, khawlai hmun hmunah khawm local languages options a “Hmar language” hi ala um ve nawh.  Hieng – mizo, nagamese, khasi, garo, bodo, Manipuri, etc., hai a uma; ei ni Hmarhai thiem chi iengkhawm a um nawh.  Hi lei hin, eini mi tamtakin Bank jobs hmu harsa ei ti pha, a exam harsa ei ti lei hrim hrim nilovin; asan chu, exam lo passed inla khawm interview hunah local language exam (viva voce) a um hlak.

A HPC-D cadre at an undisclosed location stands guard somewhere in the Mizoram-Manipur border.

9.  Chun, chanchin ka hriet danin, Mizoram sawrkar palai haiin HPC (D) palai hai kawla – tienlaia inthawka Mizo inhnik hmasa chu Hmar hai anni zie dam, Mizo Union le MNF hun laia a huoi huoi le an pe zo zo chu Hmar mi anni zat zat zie dam, Mizoram in statehood a hmu hnunga sawrkarin Hmar hai an betray/ensan leia hieng hnam thila buoina popo hung suok ani ziet dam, Mizoram sawrkarin Hmar chunga suksuol nasatak a nei zie dam le an sir (regret) zie dam, etc. etc. ramtin an hril a ni awma. Chuong an tawngbau tha hai popo chu Mizoram mipui po po hriet dingin “Press Release” thaw ngei raw seh.  Chun, Mizoram mipui annaw le Mizorama ei unau danghai popo mi hmu dan le en dan hung danglam a ta; Kakhawk annawleh ra tha (fruit) tam tak an suo ngei ring a um.  Asan chu, Mizoram mipui hin (Mizo speaking Hmar hai chenin) Hmar – Hmar tawng hmanghai chu a kawi hrim hrim, in lak bing tum hrim hrim anga an mi hmu leiin a nih.