Lawm Puma Lalpa Rongbawl

By Pu Zarzolien Keivom, Noida.

Ni khat chu ka ning a’ntel khop el a, ka hun liem ta hnunghai ka ngaituo kir neu neu a. Chu lai zing chun ka naupang laia inthoka voisun chena hun ka lo hmang liem tah po po chu a hmatiemin ka hmabulah a hung inphar duoiin ka hmu a. Thaw ding thaw loa thaw lo ding ka lo thaw lem tam tak ka hang hmu chun ka hun liem tahai ko kir thei ni sien ka nuom hlie hlie a.. Chuong ang chu lo ni lem sien ti ding ruok hin a sip el si a. Pathien kona ngei changa unau Meiteihai laia rong ka bawl ve lai dam sinema en ang ela ka hang en chun lawm puma Lalpa rong ka lo bawl nawzie ka hmu a, phut thar nawk thei ni sien ti ka nuom ngawi ngawi el a. Chu chu lo thei ta hrim khom ni sien, ka ngirhmun le ka tha khoma a tlin ta nawin ka hriet a, poitinain ka sip ta treu lem a. Ka ningintel luotin ka sahal a, hnuoi ka en leh ka bei a dong a, van ka en leh a’nsang bok si.

Chuonga beidong taka kan ngaithlep el lai chun ka na bula mi hung beruktu um ang elin rawl innem dieiin, ‘‘Ka naupa lawm puma ka rong i bawl theina dingin ram lien duoi el ka pek zing che an nawm’ a hung ti a. Kei chun, ‘‘Lalpa khawlai am ie?’’ tia ka hang indon chun, “I nauhai le i tu le tehai kha i hmu naw maw? Lawm puma ka rong i bawl theina dingin i nuhmei khom natna khirkhan tak takhai tuok hlak sien khom ka sukdam pei a ni kha. In venga i ruol tlakpuihai kha hang en ta! Nanga anga hrisel le hrat an um der le. I ta dingin ka naupa nei sun ka pek che a. Chu bak chu an le! I pi le puhai thranga inthoka in la nei ngai lo rothil khom tam tak ka pek sa che an naw? Damsawtna khom ka kuta um a nih, ningtelna ding san hrim i nei le” a mi hang ti zet chun ka lawm bok, kan zak bok a. Ka mamaw po po Lalpan a mi pek naw hrim a um nawh ti ka hang hriet suok zet chun,

“Lalpa lungawi kum thu puong a,

Pathien phuba lak ding thu hril a,

Lusunhai thlamuong ding dam,

Ziona purdohai hnem a,

Vut neka par thri inhlitir lem a,

Sunna neka hlimna hriek nal a,

Ngui muchukna thlarau neka,

Inpakna silfen pe lem dingin,

Lalpan ama chawimawina dinga,

Felna saisaw thing a phun an nih” (Isai 61:2&3)

ti Isaiin a lo hril ang el khan, kei khom Lalpan ama chawimawi a, lawm puma a rong bawl dinga Krista thisena intlan ka lo ni zing a nih ti ka hang hriet suok nawk pei a, ka ningtelna po po chu voi le khatin a hung re ta duok el a nih.

“Hi tlanga kher naw khom Jerusalem tlanga kher naw khom…….” tia Isun Samari nu kuoma a hril ang el khan, ram thim tia ei hriet lar hmun le ram chauh hi ringtuhain rong ei bawlna ding nin an lang nawh. Chuong nek hmana poimaw hmasa lem chu mani insung seng hi ni lemin an lang. Mathai 5 :16 ei tiem chun , “chuongchun thil thra in thawhai chu min hmung an ta, in Pa vana mi chawimawi thei an tih” ti ei hmuh. Pastor Thangngurin “Ringtu laia suolna lei khom hin ei Lalpa hming an hril pawi zo ie” a lo ti mathlawnlo ang khan, a sukdiktu chu Pathien ringtu intihai ma hi ei ni nawk pei bok, a poi khop el. Pieng infuk lo nun a hlim thei naw a, an rongbawlna khomin Pathien hming a hril pawi hlak. Nu le pahai hi mani insung sengah Pathien rongbawltu ropui tak ei nih ti hi ei inhriet chieng zuol a poimaw tak zet a nih.

Ei upa deu deu a, inchuk ding ei hau deu deu. Tu le te ei hung nei pei a, rongbawlna ding a pung nawk deu deu. Tita 2:2 a chun, “Putarhai chu insum thei, inzaum, inthunun thei, ringna indik chel, hmangaina nei mi le mi dawthei ni dingin infui rawh” tiin Paula chun Timothy a hril a nih. Putarhai chu mizie le nungchanga Lalpa rongbawltu an ni ding a ni chuh. Insum thei ti ringot nek chun iengkima insum thei nihai sien chu inza an va um zuol awm deh! Tulai chu ringna chi hran hran a tam ta a, mi piengthar indik tak ti nekin ringna indik chel tlat mi ti hin a kawk fuk lemin poi a tawk tlawm tak awm ie. Hmangaina nei mi le mi dawthei ti khom hi Krista Isu lungril ang put mi ti inla suol naw tak a tih ring a um. Filipi 2:6-8 ei hmu ang hin. Kei a ziektu ngei khom hi putar pawla zel ve thei ka ni ta a, inchuk ding ka la hauin rongbawlna ding ka hau char char ngei ie!

Pitarhai khom lawm puma Lapa rong bawlna ding an hau ve khop el. Chet danah mi inzaum ni ding dam, mi hrilsiet ching lo ding dam, uoiin he mi ni lo ding dam le thil thra inchuktir ching ding dam an nih. Pitar mi dem ching deu, koham le hnukinrawl, zawlro hril ching deu le khel hril hmang deu dam hi chu inza an um nuom naw awm khop el, Pitarhai chun nupui tebophai chu an pasalhai le an nauhai hmangai a, mani invong thienghlim ding le insung khawsaka inhmang rim ding dama infuitu an ni ding a nih. Chun ngilnei taka um ding le an pasalhai thu awi dam inchuktir ding an nih. Pitarhai chu nungchang le chet dana mawi tinreng kengkawa anni neka naupang lemhai chu thil thra tinreng thaw dinga kawkhmu chu Pathien rama an rongbawlna a nih. Nupa kara hmangaina sukdeta insomdawl tuohai khom hi ringtuhai thaw ding hrim a nih.

Thralai inchuk mekhai khomin Lal rama ei rongbawl ve nahai hi ei hriet chieng ding a nih. Ruol lai inzel thei naw chang dam um hlak a tih. Mi threnkhatin piengthar lo ang hiela ngaia thingpui le bei anga an hme chang che khom um hlak a tih. In ngaisie el ngai naw rawh. Tirko Paula khom a hang piengthar zet khan chu ama hmaa ringtu lo ni tahai lai khom a fe el bik le. Arabia thlalerah a khat chauin Pathien thlarau thienghlimin an trening tir a ni kha. Chuleiin a rongbawlna khom kha tirko danghai nekin a ropuiin a turu bik a, ram khom a lak lien reng a nih. Thralai nang khom Pathienin a rama ding le hnam ta dinga an trening tir lai che a nih ti theinghil naw la, Arabia thlalera trening i nih ti inhre zingin lawm pumin Lalpa rong bawl lem rawh.

Ar that dan chi khat chau ni nghal lo, Kohran rama rongbawlhai chau hi Lalpa rongbawltu an ni bik nawh, sorkar sin le kompani, a dang danga sinthawhai khom hi Pathien rongbawltu misawnari vong ei ni leiin mani sin sengah thafan tak le ringum taka thaw dingin Lalpan a mi dit a nih. Daniel khom kha kum sawmsari lai lal hrang hrang Nebukadnezzar hai, Belsazar hai, Daria hai le Kura hai hnuoiah ngirhmun poimaw tak chelin sin a thaw a nih. Kohran thruoitu threnkhatin lawm puma Lalpa rong bawl aruongin lungawi lona le chier inthluokna ding an zong hlak leiin Setanin remchanga lain Pathien kohranhai hi kei darin pawl dang dang an dinpui hlak. Chu chu mi threnkhatin remchanga lain nuorna ding zongin pawl dang zuonin ei invir buoi nuk nuk zing el chu an ta hih. Timothe 2:4 a chun, Sipai chu a hotu suklawm dingin khawvel thil dangah a’n kei buoi ngai nawh, a ti a. Tu lai ringtu, Krista sipai intihai hin kop le kai ei hau hle hlak niin an lang. Ei miziehai hi bansanin Hmar nauhai hin lungruol takin, pawl bansanin, lawm pumin Lalpa rong bawl tlang zai rel thei inla chu, Pathien lawm a ta, eini khom lawm bok ei ta, ei ram ei hnamin hma sawn a ta, Pathien ram khom lien duok duok a tih.

Ram po pohai,

Lalpa chawimawiin hlim takin khek ro,

Lawm pumin Lalpa rong bawl unla,

Hlasak pumin a hmaah hung ro. (Sam 100)

KEIVOM RUN (Greater Noida)

2 February 2015.