INPUI: Hmar News & Info

March 24, 2010 nia Hmar Inpui Region inthlangna result chu a hnuoia ang hi a nih.

(A) HMARRAM REGION
President : Pu Laltholien, Rawvakawt
Secretary : Pu Lalsiemlien Joute, Sipuikawn
Fin. Secy : Pu Remnalal, Pherzawl
Treasurer : Pu Ramneilien, Lungthulien

(B) VANGAI REGION
President : Pu Lalhmingthang, Tuisen
Secretary : Pu Zairemkung, Kangreng
Fin. Secy. : Pu Thangluoi, Ankhasuo
Treasurer : Pu Remruot, Ankhasuo

(C) JIRIBAM REGION
President : Pu Zoramlien, Tuisuolien
Secretary : Pu Joel W. Thomas, B. Huonveng
Fin. Secy. : Pu C. Lalthatlien, Gilgal
Treasurer : Pu Lallawmthang, B. Huonveng

(D) BARAK VALLEY REGION
President : Pu T. Sangkhum, Lalpani
Secretary Jt. : Lalsiemmawi

(E) N.C.HILLS & KARBI ANGLONG REGION
President : Upa P.L.Hranngul, Haflong
Secretary : Pu Vanremsiem Varte
Fin. Secy. : Pu DArrova Darngawn
Treasurer : Upa H.L. Sanga Neingaite

Imphal le Shillong Region inthlangna ruok chu hun remchang hmasa taka nei dinga remruot a nih.

Hmar Inpui General Headquarters Executive Meeting a tumlina chu March 29, 2010 ni khan nei a ni a, an thu relhai chu hieng a hnuoia hai hi an nih.

1. NETV a Hmar Programme mumal taka nei dingin hma hrat taka lak mek a ni a; Pu L.B.Sinata thangin NETV intivithmupui nawk vat tum a nih.

2. Assam University a Hmar tawng undergraduate Level chena upgrade thawna dingin Rs. 5,000 pek a nih.

3. HYA General Headquarters in Office bawlna dinga ei ni laia Fund Raising thaw a tum chu lawmum a ti a, mi tlawmngaihai lai thlawlawm dawl an tum chu H.I. chun a phal pek.

4. TUMTUS (Tuiruong Vadung Multipurpose Tribal Upliftment Society) sung buoina chungchangah Hmar Inpui palaihai hmalakna ngaithlak a nih a, Hmar Inpui thutlukna an pawm thei ve ve ding a ni leiin Executive in lo bawzui peitu dingin mi pawimaw a ruot pek.

5. Hmar Inpui Barak Valley Region in General Hqrts. Hmar Inpuia Saisel Jhumland thubuoi rel pek dinga a hung intlun hi ngun taka Hmar Inpui Gen. Hqrts Executive Committee in a ngaituo hnungin hi ram hi ram le hnam ta dinga hmun pawimawtak a lo nizie hrietchieng a ni leiin Hmar Inpui Barak Valley Region thuoituhai ngenna hung siem angin a hmun ngeiah fe a, sukfel dingin thutlukna siem a nih. Chu hma po chu tuta Headman ni laizing Pu Zahmuok Khawzawl hi Headman ni zing a tih. Tukhawma a Headman nina inchupui lo dingin Hmar Inpui Gen. Hqrts Executive Committee chun a rel.

Src: Hmasawnna Thar

New Delhi, March 20, 2010: March 18 zan khan Jawaharlal Nehru University (JNU), New Delhi ah NC Hills tienga Indigenous Peoples Forum (IPF) thruoituhai le Delhi khawpuia inchuklai pawl hai, hieng Hmar Students' Association (HSA), Zeliangrong Students Union Delhi (ZSUD) le Kuki Students Organisation Delhi (KSOD) hai chu an inhmukhawm a.

Indigenous Peoples Forum (IPF) thil nor chungchang thu hrilin, fekhawm hai chun NC Hills hming thleng ding thu le inzomin Delhi ah Rally nei ngei nisien thra a ti leiin Delhi Joint Action Committee on NC Hills ti chu indin nghal a nih. Hi Committee hin Rally nei ding chungchang coordinate a tih.

By David Buhril

Khawvel mihriem inthrang le hmasawn peiin a phut vena leia ram inchuna leh innawrna hung suokin kum 2003 khan NC Hills-a Dimasahai leh ei lo indo a. Ei ram hluo le nei sun sun hi ei nei po po a ni ang bawkin, mi dotuhai khawm chu chu an ngirhmun a lo ni ve zing a. Chu lei tak chun 2005 kum khan Dimasa leh Karbi hai chu an indo bawk a. Tawpintai a nei thei nawh an ti ang khan 2009 kum khan Zeme Naga leh Dimasa hai inkarah indona a suok nawk a nih. Inremna dawkan dang danga inthawkin inremna ei lo siem ve taa chu, ram inchuna le innawrna chu vawisun chen hin a la tawp chuong nawh. Eini rawi hlak chu “Ei Ram” ei ti theina hmunhaia inthawkin “compensation” tlawma zawng ei hmu thei a ni phawt chun ei ram rausan el dinga inpei pawl ei pung pei lai zingin, mihai chu an pasalthrahai leh an nei po po sengin, ram san ding leh zauh dingin thrang an khaw thar zing lem si.

October 2, 2009 khan DHD (J) helpawl zahnih neka tam chu an ralthuom leh sawrkar kutah an inpek a. Chu ruol ruol chun ei ram del sunga mi, indona leia khuo iemani zat ei lo suoksan le hluo nawk dinga hma ei lak zing laiin, NC Hills pumpui chu a hming chauh ni loin a rorelna khawl chen khawm suklien le thlak danglam tumin Dimasahai chun hma an lak a. NC Hills chu “Dima Hasao Raji” tia thlak dinga thrang an hung khaw el khelah “Dima Hasao Raji” chu Autonomous Council a hlangkai dingin an nawr sa bawk a nih.

DHD (J) pawlin silai an intung le inzawmin an ngenna chu bawzui dingin Assam sawrkar chun September 19, 2009 khan DP Goala keihruoina hnuoiah, hnam danghai tu khawm rawn loin, NC Hills buoina ching fel dingin Group of Minister’s Committee an indin a. Hi committee a hin minister dang pathum Khorsing Engti, Himanta Biswa Sarma, Rockybul Hussain hai chu member-in an thrang sa bawk.

Group of Minister’s (GoM) Committee chun an sin chu tranin February 5, 2010 khan NC Hills chungchanga “recommendation” him lo deu deu an hung siem suok ta a. Chuong “recommendation” hai chu vawisun hin ei bi chieng a ngai takzet. Ei bi chieng hnungah thutlukna thar le thrang khaw dan thar ei rel ve naw chun thisen le hringna hlu tak tak ei lo chan tahai kha a thlawnin a luong ral ding a nih. Khawvela hnam changkang hmasahai hi indona kara lungvar thar puta hung changkang ve pei an ni ang bawkin, eini khomin indona ei tuok ve kha a trangkai zawnga hmang ei inchuk hi a trul ve tlat a nih.

Group of Minister’s Committee Recommendation:

GoM Committee chun DHD (J) pawl thurawt chu sukpuitling tumin “NC Hills chu Dima Hasao District ti ni rawse” tiin an recommend a. “Dima Hasao District” chu Autonomous Council-a inthruoi dingin an riruong bawk a. Hmar, Kuki le Zeme hai ruok chu Dima Hasao District hnuoiah “Development Council” indin pek dingin an riruong bawk. “Dima Hasao District” indin chu NSCN hai thil ngiet le tum “Greater Nagalim” sukhlamzuina ni thei dingin an hril mawi bawk a nih.

Chun, “Dima Hasao District” indin chungchangah Hmar, Kuki le Zeme hai chu nuor ngei an ta, amiruokchu sawrkar tha hmanga sukmit thei ning a tih” tiin Committee recommendation- ah an tarlang. Dimasa trong chu Dimasa khuoa hai “vernacular” in primary school chen hmang ding a ni el khelah Dimasa trong chu Autonomous Council huom sungah “mother tongue” a hlangkai ding chenin an rawt a nih. Council sunga sawrkar sin ruok hrim hrim chu thiemna (qualification/ merit) ni loin a mihriem tam dan zawnga (population pattern) sem le pek dingin an recommend bawk. Chu chauh chu ni loin, Council-a sawrkar sin chelhai chu lo thi ta hai sien khawm an sin chu mi dang ta dinga inhawng loin an tu le te hai ta ding chena inthlasawngpek pei ni rawse tiin an belsa bawk.

A chunga tarlanga um po khi recommendation tlawmte an siem laia langsar biek deuhai chu an nih. NC Hills-a Hmar People’s Union, Kuki Inpi, Zeme Council, le a dang dang haiin NC Hills hming thlak chu vawi tam tak an dit naw thu tarlang tah hai sien khawm GoM Committee chun Dimasa-hai nek hmanin Dimasa hai ta dingin thrahnem an ngaipui lem am a ni ding ti thei khawp hielin Dimasa hai hmakhuo an ngaipui letling lem ta a. A san ding awm chu dap inthuk rak ngai loin a hung inlang ta a.

Tu lai hnai el khan NC Hills ta dinga sawrkar-in budget Rs. 1000 Crore a siempek chu a bo vong el leiin a san ding National Investigation Agency (NIA) chun a suizui mek a. NIA chun sum tam tak bo chu a’n hmang an nawzie le fakruk leia bo a ni lemzie tlang hrietah a hung phawr lang ta a. Dimasa helpawl le minister threnkhat thrangruolin an chawkchawrawi a nizie chu a hung sui suok bok a nih. GoM Committee Chairman DP Goala ti lo po minister 3 dang hai chu faruka intum an ni a. Vawisun chen hin Rs. 1000 Crore inhmang chu rel fel a la ni nawh. Chuleiin, indikna leh an mawphurna chen theinghila Dimasa-hai thil hni sukpuitling dinga hma an lak chu thilmak a ni nawh.

GoM Committee Recommendation hi ei bi chieng chun “Autonomous Council” nek hmanin “Communal Council” an indin am tum lemzie chu a chieng. Hnam tam tak karah hnam pakhat chauh chawi sang rak dinga an put rakna san khom hmu threl ruol a ni nawh. Dimasa-hai ropui relna Autonomous Council hnuoiah sawrkar sin hai chu “population pattern” hmanga sem a ni nawk lem chun thimtham hnuoia bei hlek zawng chu hadam lem a tih. Chuong karah, ei socio-economic ngirhmun hai chen sukderthawng a, hnam danghai sirde tuma hma an lakna hi tu lai hnai thil el khawm a ni ta nawh. An tum lei hrim am a nih, an pathienin a thrangpui lei am a nih, an hmalaknahai chu mita hmu thei khawpin a hung fie pei a. Chanchinthra kum zakhat lawnpui tahai mit hlak chu an thim hrat deuh deuh bawk si. Dar leh khuong ri inkal nuka inkhawmpui tumtriek ta lo urlawk a, gospel meiser insit bak thaw ding nei ta lo angin ei chawlawl ta am a ni ding? Ran, inchuklai le thralaiin ei thawhla. A threnin inthawina thienghlim sunzawmin “Ram le hnam ta dinga bunghei trongtraina” dam an la thaw zui pei bok. Chu po poa chun a tak ngeia ra hlimum insuo thei thilthaw a thrang am? Darbenthek inri mei mei am ei ni lem?

Thaw Trulhai:

Ar that dan chi khat chauh a um nawh ti angin, hnama ei dam khawsuokna thil ding lem chu kong hrang hrang ei hriet rawn a trul tah. GoM Committee le an thurawt chu thriek hmasa phawt a trul. Fakrukna leia indikna an kengkaw thei tak nawzie chu an thurawtah a chieng em em a, chu chu hi Committee phur thlukna dinga hmang letling lem ding a nih. Chu chu thaw loa an recommendation sukpuitlingtu ni palh hi inlau a um. Mi dang ei ringzo si naw a, eini le eini ei inringzo bawk si naw chun vawisun hin Assama Opposition Parties haiin Rs 1000 Crore fakruk le inzawma an khekpui luoi luoi lai hi a’n ling lai a ni leiin, ei zinga ding ngaituo malamin ei hmang trangkai ve a trul. Hi thil hi Party le pawl thu el a ni naw a, ei ta ding chun ei ram, ei thisen, ei hringna le ei hmakhuo, ei dam khawsuokna chabi a ni lem. Ka party kal zawng ni pal a tih tia ngaidan lo phan pawl um hlauh ei tih. Chu chu ruo ei hmang dan ding ni lem sien la, a thing hmang dan ding zawng lem chu mi dang, hnam dang, ngirhmun ei intrawmpui hai leh inlungkhat hi a ni ding a nih. ‘Kan indo laiin an mi thrangpui nawh’ tia ei pawi ei lak kir vawng chun makhata pawi inhnel chu thil inhawi tak ni naw nih. Ei kut le ke hai chu Chanchinthrain kum zakhat a thruoi ta si chun, mi va ringzo khawm ei inchuk ruol ruolin eini le eini ei inringzo lem chu makmaw a nih.

NSCN hai “Greater Nagalim” thriekna dinga Dimasahai an suklien tumna karah hnawchepa ei um ding chu ei inphal a thieng nawh. Chuleichun, sem sem, dam dam policy ei rawt a trul. Hril nikhuoa, NC Hills-a kher chu a sa se hmasa taka nia ei inhril vung thei si chun, sem sem, dam dam rawtna thua chu ei huoisen a trul zuol. Eini puol bika Autonomous Council nei chu thil inphalama ei ngai a ni chun, Autonomous Council pahnih bek indin rawtpui chu ei hun tawngin a phut tah: pakhat Dimasa ta ding an dit dit hming chawiin, pakhat dang chu Hmar, Kuki, Zeme, Karbi le mi dang dang hai intrawm ding NC Hills hming bawk putin.

Ei vawisun ni hi a pawimaw ruol ruolin thutlukna fumfe lem leh ei hnam lamlawn dan ding sat a hun tah. Ram chu a hun a tlung ve ta leia pieng el a ni ngai nawh. Bubel hem neka uluk lema hem a trul a nih. A thli hrang leh a tui infawn hun hmang thiem tuhai hamthratna a ni lem hlak. Tru bawl ei ni si naw leiin thrang la hung thar pei ding hai chenin zalen tak le huoisen taka “Kan Ram” tia an inthlasawng ve pei ding ei ngaituo a hun tah. Tu hi a nih hun thra chu; tuhi a nih hun lawmum chuh- ti kha an naw mani?

By Pu L.Keivom* Inpui Columnist

If we abide by the principles taught by the Bible,

our country will go on prospering.

-Daniel Webster (1782-1852)

Centenary Darthlalang 1-2 a khan Gospel zara hamthratna le malsawmna ei dong dan le kohran sunga buoina a hung suok hnunga Arthatzawl pawlitiks le Coleman Factor-in a mi nghong buoi dan iemani chen ei bi ta a. Tu hin ei thuring le inchuktirna le chuonghai chu ei khawsak phung le khawtlang nun le hoihera rong an insuo dan a thren chauh hang bi vak ei tih.

Thuring le inzirtirna

Hnam tinin an ngaituo le suongtuo phak tawk sengin, anni neka thil thaw thei lem umin an ring a, chu chu tlon le biek lungawi tumin an inthawi hlak. Chuong ang ringna le thilthaw ei hril changa trongkam ei hmang chu ‘Sakhuo’ ti a nih. Ei pi le puhai khomin hnuoi le van siemtu um dingin an ring a, chu chu hming hrang hrangin an ko a. Chuong laia ei hriet lar deu chu Khawzing, Khuonu-Khuopa, Khuovang, Vana Pa, Pathien le a dang dang an nih. Chun, hri le natna le vangduoina chi hrang hrang intlun theitu umin an ring bok a, chuonghai chu dannaranin thlarau thra loah an ngai a, a hmingah ‘Huoi’ an tih. Ei pi le puhai khan thing le lung bul be angin ei hril hlak a, sienkhom an biek tak chu tuta ‘Pathien’ tia ei ko tah hi a nih. Huoi chi hrang hrang, an chunga harsatna siemtu nia an hriethai chu tlon lungawi tumin an kuomah an inthawi hlak a, sienkhom Pathien ang chun an biek ngai nawh.

‘Ramhuoi biek’ ti trongkam hi kristien ei ni hnunga pipu sakhuo betuhai hrilna dinga trongkam ei ser thar a nih. Tu lai tronga hril chun, ‘ramhuoi biek’ umzie chu ei hma sukkuokna dinga thuneitu amanih mi dâltu ei suklungawi ang hi a nih. Chu chu ‘thambiek’ amanih ‘thamtlon’ ti ding ni awm tak a nih. Inthamna hi ramhuoi biekna chi khat a nih. Thamna latu chu ramhuoi chi khat a nih. Hla phuok thiem Rokunga chun, “Chanchin Thrain kan ramah, ramhuai a um bo ta” a lo ti a, uong takin thimna lal ei sakkhum hlak. Ama hlak lawmin a’n nui ver ver si. Ieng leiin am? Ramhuoi hnot boa ei inngai tah leiin vantirko thuom lem inbelin eini lai ngampa takin an khawsa a, ei pulpit chen lemchangna zawlah ei inchangtir tah a nih. Tien laia ei huoi neihai kha chu arkhong khoma thawi lungawi thei an ni a, tu laia ei huoi kolhai ruok hi chu Singa, Nuoia, Duoia le Awna vong an ni tah leiin a sing, nuoi, maktaduoi le tlukledingawn zawnga inthawi naw chun an kut a chàng ta nawh.

Chun, ei pi le puhai khan thil thieng lo nia an ngai, puithuna (superstition) tam tak an nei a. Chuong thil thieng lohai chu an thaw chun an chungah thil thra lo hung tlung ngei dingin an ring. Hieng puithunaa an ngai threnkhat hi chu an mawlna lei dam a ni laiin, chik taka ei sui chun, a tam lem hi thil thra lo an thaw ding vengna hmangruo poimaw a nih. Thaw thieng lo, thil thra lo an thaw chun a nghong amanih a kakhawk, Sanskrit tronga a ‘pâp’ an ti chuh tuor dinga inngaina an nei leiin, chuong thil thaw laka chun kut an intim hlak. Hieng lei hin ei pi le puhai kha kristien ei ni hma daih khan kristien thra lem an lo ni a nih. Chu inzirtirna chu kristien hmasahai khom khan lungrilah an la pai zing leiin Pathien thu awina tieng an la lak run hle a, Pathienni bawsiet khom Mosie hun laia Sabat (Chawlni) bawsiet ang tlukin an ngai a, an inser thienghlim hrim a nih.

Ringtu hmasahaiin Pathien an inza dan, tri dan le a thu an hriet sun sun an nuna a taka an zawm dan le Centenary lawm phak, kristien intihaiin Pathien ei tri dan le a thu ei zawm dan hi ei centenary darthlalanga hin enkhi inla, a zie le rong indang hlei tah hleng a tih. Hi hin zawna tam tak a cho suok laiin thlûr hni chauin hang bi tlâng ei tih. Thuring le zirtirna thuhmun, Baibul pangngai tho hmang sihai lai ieng leia chuong ang danglamna chu a um thei am a na? Thutak takna le thudik indikna chu thre nawi a, son hmang thei a ni? Paula trongkam takin, Krista chu phel hni phel thuma thrè dar a, mani lung tluk zawng senga rong le zierang tum tum inputtir thei a ni?

Ringtu hmasahai kuoma khan mawl takin Chanchin Thra, thlarau sandamna thu an lo hril a, ‘Pathien thu awi ta ro’ tiin an fiel a. Awia pomtu poin hming an pek a, ramhuoi tlon lungawina dinga a kuoma an inthawi hlak chu an bansan a, ‘Pathien thu awi’ mi, Krista Isu hnung zuitu, kristien an hung ni tah a nih. An biek Pathien chu kha hma khoma an lo biek, sienkhom an hriet chieng lo Pathien tho kha a nih. Hi ngirhmun hi chieng takin Pastor Thangngur chun Hmar tronga hla a phuok hmasa takah hieng ang hin a lo hril a:

Sandamtu hi ka hriet hma chun,

Mi dang Pathien ka lo sawn a;

A chanchin thra ka hang tiem a,

Ka Pa, ka’n hmangsan khah a nih.

Pathien thu awi, ringtu, kristien, thlarau suol ‘huoi’ hrang hrang chunga thuneitu Iengkim LALPA chu Pathiena nei mi an ni tak leiin an mawl dan le hriet phak tawk ang peiin ringum tak le thrahnemngai takin a thu inchuktira an um chu an zawm a, bawsiet an inlau a, an lo bawsiet palh a ni khomin an lungril a sun a, Pathien hremna tuor dinga an inring tlat leiin a hmaah kûnin ngaidam an inhni mol mol hlak. Khaw threnkhata lem chu nuhmei-pasal inngai-melna leia uire an tri leiin, chawibiek inkhawmah nuhmei le pasal inhnung sonin, bang khing tieng ve ve nghain an thrung hiel hlak a nih. Mi huon le loa thlai le thei ra hrim hrim a neitu phalna hni hmasa zet lo chun an lak ngai nawh. Miin hmu naw hai sien khom Pathienin a hmu zing a nih ti an ring leiin, arûka thil thra lo le indik lo thaw an nuom chang le thaw theina ding hun remchang an hmu khomin, Pathien inzàna le trìna leiin, kut an intìm hlak. Hi hi kristien ei hung ni hma khoma an zepui ditum laia pakhat chu a lo ni ve hrim hrim.

Kristien ei hung ni sawt deu deu a, Pathien trina le inzàna pung deu deu ding ni awm tak, ieng leia a letlinga thil a hung inher am ning a ta? Pathien thu awi le zawm nuom lo, Pathien trina nei lo, hremhmun chauh tri ringtu ei tam em em hi ieng lei am ning a ta? A san lien tak pahnih a um thei a, chu chu a nih ei bi nuom tak chuh.

Pakhatna, pipu huna ramhuoi tlon lungawi tuma an inthawi changa dawha hmanga thiempuin hlèm lungawi a tumna lungrilin a mi thruoi lei a ni thei. Ran thata ramhuoi kuoma an inthawi changin, fak tling lo a sa thra nawna lai lai thiempuin a at thlak a, chu chu ramhuoi ta dingin a’n hlàn a, a sa thratna lai po ama fak dingin a hawn hlak. Chu chun ramhuoi chu nuom nuoma hlèm lungawi thei dingin an inring ti a kawk. Ringtu intihai lai hin chuong ang thawthanga Pathien ngai pawl ei tam khop el. Pathien kuoma thilpek ei inhlân changin ei thil nei laia hlu tak nekin ei dit ta lo le hmang ta lo, ei hmunhnok laia mi phal takin ei pek a, thil hlua ei ngai ruok chu ei pek phal naw tlangpui. Ei lungril tempula Laltak ni dingin Isu ei fiel a, sienkhom ei hmang nuomna tak chu nuom nuoma tirkat a nih. Vengtu (Guard) sin, damnaw enkol (doctor) sin, malsawmna, hlawtlingna le hmingthangna tinrenga mi vurtu sin thaw dingin ei dit a; ei nuom zawng thil thaw ei tum pha, entirnan thaw lo hlaw le thamna ei lak ding pha amanih, ei hma tham kuok ei tum chang amanih ruok chu hnoksaka ei ngai leiin ei hnot hmang dai hlak. Ei Pathien ngai dan le hmu dan hi a fuk naw a hoi khop el.

Pahnina, piengtharna le inzoma sandamna bo thei lo thu ei inchuktir danah thil fel hlel a um niin a’n lang. Pipu huna pielral kai theina um sun chu in le rama thangsuo a nih. Chuong thangsuohai chun ieng ang thil khom thaw hai sien, an thangsuona a bo thei naw a, pielral an chàn thei bok nawh. Kristien ei ni hnunga thangsuo ngirhmun hung thlaktu chu ‘piengtharna’ ei ti hi a nih. Hi hi kum 1960 vela inthoka hung inlâr tran chauh a nih. Tuia le thlaraua pieng ei ti tak hi Johan 3: 1-21 a Isu le Nikodem inbieknaa inthoka hung suok a ni lai zingin, chieng taka a umzie hrilfiena ziek a ni naw leiin hril dan a saisa nuoi a nih. Lunginsietna zara a thlawna thlarau sandamna Pathienin a Naupa Isu Krista hmanga a hung buotsai ringtu le pomtu taphot chun chatuon hringna nei dingin ei inzirtir a, chuonghai chu ‘piengthar’ tiin ei hril. Sandamna chu chatuon dai, bo hmang thei ta lo dinga inzirtir pawl ei um a, chuonghai laia mi chu eini rawi a tam lem hi ei nih. Roman Catholics, Pentecostal le kohran threnkhat ruok chun sandamna hi bo thei dingin an inzirtir thung.

Piengtharna chu thangsuona, pielral kotsuo lut theina le chatuona chu hmuna cheng theina tiket se thei lo le bo thei loa ei ngai leiin kristien inti taphotin ei hnot ngar ngar chu piengtharna a nih. “A ram le a felna zong hmasa ro” ti Isun a lo hril chu ngai poimawin beiruol, crusade le kemping hrang hrang ei buotsai a, kanseling theitawpa thawin inhril piengthar ei tum a. Beiruol ripawt ei ngaithlak taphot a hlawsam a um ngai nawh. A hlawtlingzie ei ripawt rawn po leh a thruoituhai lallukhum sa zuol sot dingin ei ngai a, anni khom chuong ang chun an inngai bok. Pulpita inthokin do dan thiempa Setan chu bawhla an insam khum ut ut a, ama hlak chu thuom dang daih inbela ke chinginlirin eini lai a thrung a, a lo innui ver ver si.

A san iem ning a ta? Pathien thu zawm si loa piengtharna hmaithinghawng inbel, ei hmai kawr hang hawk inla, chalah Nambar 666 chuong thrut si ding ei tamzie a hriet chieng lei a nih. Sandamna chu bo thei ta lo dinga ei inzirtir leiin, piengtharna hmangruo hmanga chu sandamna chu chang taa ei inngai hnung chun suol ieng khom thaw inla, ei thlarau chu him tah tho tho dinga inngaina ei nei leiin ei lung tlukna tieng zawng zawng ei kut le kein a zui a, piengtharna hmaithinghawngin Pathien hlem ei tum a, suol ieng ang thaw khom intìmna hlek ei nei ta nawh. Gospel Centenary hmangtuhai lai hin a thua ringtu, a taka ruok chu Pathien thu awi pei lo, lemchang, mani le mani inhlèm fawm, Pathien hming sâla Setan kawmandaw ei inzi khup lei a nih. Pathien thu am Setan thu lem ei zawm? ti zawna hi lungril takin mani seng indon inla, ei sungrila sie le thra hrietna indik, khêl hril thei lo mi donna chu ngaithla nuom loin a bau ei hippek inhmaw deuh seng ka ring. A ni taka Gospel Centenary ei hmang tlang thei naw dam hi ei ngirhmun indik tak hriltu a nih.

Chuleiin, Gospel Centenary hmangtuhaiin ei thlir non makmawa ka ngai chu ei Pathien thu hriet dan le inzirtir dan threnkhat hi a nih. Tuia le thlaraua pieng umzie tak hi ei hriet chieng am? Chu chu chang thlanga hmanga sermon thlak ei hriet tah hlak am? Ka fena taphota mi ka titipuinaa inthoka ka hmu dan chun mi tam lemin a umzie ei hriet chieng naw a, ngaituo khom ei ngaituo sin naw bok. Ei lung tluk zawngin sermon ropui tak tak ei rem a, a umzie tak ieng am a nih ti ngaituo loin, naupang laia Baibul chang ei baihat tah sa ei hril pur pur a, Pathien thu hre em emah ei inngai a, chuong ang chun mi khomin an mi ngai bok. Pathien thutak hrietna tieng ruok chu A AW B level ei la khel naw tlangpui niin a’n lang bok si. Pathien ram (kingdom of God) le van ram (kingdom of heaven) umzie hre chieng lo le hre hrang lo deuh vong ei nih. Ei Baibula inlet dik lo, Pathien thu le inkal hulhuol ni si, ei pom zam mei mei dam hi Pathien thutak hriet tuma ei bi chieng ngai nawzie hriltu, darthlalang fie tak chu a nih. Inkhawm zata “I ram hung tlung raw se” tituhai lai hin a umzie tak hre fie chu 10% khom ei ni ka ring nawh.

“Ringna” ei hril dan le pom dan khom hi a fel hlel khop el. Chu chun piengthar thu ei hril hi nasa takin a kakhawk a, piengthar tehlem ei tam èm ém san khom hi chu ra suok chu a nih. A san bul inthuk taka ei bi chun Baibul inlet dik loa inthoka suok niin a’n lang. Sienkhom, ei thiempuhai lai ngei khom chuong ang thil chu chik taka bi pei ei vang. Lemchang inhoi ei ti lem tlangpui. Pathien thutak hrietna, zawmna le taknaa inthlung ni si lo, lemdernaa thuom le lungnona thruoi thlarau chi tum tum donga mani rîl rem zawng ang anga Pathien thu thlekpui le her kawi thiem mi hih piengthar indik, thlarau mi inkhinaah ei hmang inrim hle. Iengkim hretu Pathien ruok chun a mi hmu tlang vong a, ei kawrongzie khom a hriet fai kel a nih. A thu zawm si loa lemchanga hlèm kawi ei tum hi mani le mani inhlem chauh ei ni lem. Mani inhlema taimak insuo hi Gospel Centenary ei tlung hiel hnung hin chu bansan tum tang ei tiu.

=============
[*Editor's Note: INPUI columnist Pu Keivom is a retired Indian Foreign Service officer, respected Hmar Mizo litterateur and author of 'Zoram Khawvel' series. This article is dated February 28, 2010, Imphal].