INPUI: Hmar News & Info

Ramthienhlim Varte, Shillong

Tarik Ni 7,April 30 AD a Kross lera Lal Isu khengbet a um chuh a thi tak tak a ni ti sipai haiin an enfie hnungin zantieng Dar 5:00pm  velin a ruong chu an lak thlak a, hun an tepter ta em leiin thawdan pangai khawma thaw hman lovin Joseph, Arimathai khuoa mi chun Bawrsap Pilat kuomah Isu ruong chu a hni in an lak thlak a, hmawsarum tak meuvin thuktheinawna damdawi a hungchawi Alawi le Mura an ti chau chu an nal sawk sawka puonzai in hmiin an tuom a, thlan lungker sunga an inzaltir ta a.


A thlan lungker sinna lung dawmsawn mei mei theilo khawpa rik ruong danghai sinna lungphek ang mei mei ni lo chun an sin  a, vengtuhai hmu ngeiin tha taka char de’n midanghai thawdan baka Rome sawrkar seal an tet khum a nih. A ruong vengtu dinga ruothai kha Juda sipai a thonawk ding inlau dawp dawp vawng an na, inrawitu ding chun Bawrsap Pilatin a mi ringzo tak Sipai za hotu Petronius a ruot ti a ni nghe nghe.Hienglai a Rome sipaihai inhremdan  chuh– Indona hmuna tlansie chu Sipai hotu lientak General in a kut ngeiin chemin a sathlum ding; Duty laia inlusu chu rawla namthlak ding ti a nih.Chuleiin hi zana thlan vengtuhai hi an inlusu hman chu ring a um nawh. An hotupa rawiin rawla namthlak chu an hmaa dawkan a ni tlat leiin.

Tarik Ni 9,April 30 AD (Pathienni) zingkar inhma deuvin Mari Magdalin le Mari dang chu Isu ruong zalna thlan chuh ti le inthin dawr dawr pumin an va en dawk dawk a, a hril ang ngei khan a lo tho tak tak a, a thonawk thu chuh  Vana inthawk Vantirko hung tumin an kuomah ‘Ti naw ro, Isu an hemde kha in zawng a ni ti ka hriet, hitaka hin  a um ta nawh, a hril ang ngeiin a tho nawk tah, a zalna hi hei en ta hman ro’ tiin. A tuomna puon chau chu an va hmu a nih. A thonawk thu an hriet phingleh an lawm taluo a, a thuoihruoi Jerusalema umhai le mi dang dang a lainatuhai kuomah an hril ta pei a. A thonawk thu chu Jerusalem khawpui sunga chau ni lovin Juda ram, Samari le  Galilee-a hai an thangsuok vawng nghal a nih. A thonawk naw sa thukhel hril ni ta hai sien chu thukhel chun nikhat khawm dai naw ni a, an chung khawm ava hei rik awm ngei de. Rome sipaihai le Juda mipui haiin Lal Isu an sawisak neka nasa lemin an thaw awm si a. Thlan vengtu sipai haiin kan inlusu kar a thuoihruoi haiin a ruong an lo hung inruk hmang an ti ngam hi a mak bek bek el chu a nih. Chuonga inlusu chu rawla namthlak ding an ni chu teh, an nam thlak ti ruokchu ei hmu si naw a, hotuhai le inthuruol vawng an ni ti a chieng. A reng rengin an inkar chun an rutu chuh a thuoihruoihai an nih ti iengtinam an hriet thei, an lo inruk suok lo ni reng sienla a ruong an siena chu iengtinam an zawngsuok naw ding .Chuleiin, a hrillawk ang ngeiin  mithi laia inthawk a tho nawk ta a nih.          
                                                                                     
Ka hei belsa met ei tih. Isu tuomna puon hi a tak tak hmu theiin Italy ram Turin khawpui Biekin pakhat a an la sie tha a, a hming Shroud of Turin  (Isu tuomna puon) an tih. Europe rama mithiem tam takin SHROUD OF TURIN RESEARCH PROJECT tiin a tak tak a ni am tak tak naw an suina a chun Isu tuomna puona hin mihriem thisen pawimaw tak tak hieng- Hemochromogen, Serum Albumen hai an hmusuok a; hi puon tuomna a hin thildang tamtak an lang a nih. An vuokna be an hmudan chun  hnungtieng nekin hmatieng a tam lem a, vuokna be hmun zakhat vel hmu a nih. Hruihruola vuoka hrem ding chun vawi sawmli bak vuok awilo a nih.

Chuongchun, a thuoihruoihai hlak arte a puiin a thisan ang elin an lo indar vawngta a, a thenkhat Galili dil tieng an nga manna hmuna dam an lo um ta. Amiruokchu, a damlaia hril angin a thonawk hnunga a thuoihruoihai inhmupui na dinga a lo ruotpek Galili ram hmun pakhat a chun thuoihruoi sawm le pakhat hai kuomah an lar a, thahnemngai taka a sinthaw (mission) sunzawm dingin a hril a, ‘Hnuoi le van thuneina popo ka kuomah pek a ni tah; Fe unla, hnamtin lai chanchintha hi hril un la, Pa le naupa le thlarau thienghlim hmingin baptis un la, thu ka pek po po cheu pawm dingin inchuktir ro. Chun, ngaita u, kei kumkhuo’n khawvel tawp chenin in kuomah um pei ka ti’ tiin.

Chun, a lo hrillawk ang ngeiin khawvela Ni 40 hmun hrang hranga inlarin a hun tiem a tlung phingleh a thuoihruoi mitlawmtehai chuh thuoiin Olive tlangah  an mit hmu ngeiin vana lak hmangin a um ta a nih.Van tienga Lal Isu thuoia a um a inthawk thlarau thienghlim hungtlung hma si ni 10 (sawm) sung  chun khawvel hi awptu bova um a nih an tih. Lal Isun thlarau thienghlim hungtlung ding lo nghak ro a ti ang khan, Pentikos ni (Isu thi a inthawk Ni sawmnga) a hungtlung chun Jerusalem pindan chunghnung taka chun thli angin thlarau thienghlim chu a hungtlung ta phut el a; an rengin thlarauvin an sip a, inthinna thlarau an chang a, tawng hrietlo hmangin an thilhril inhrepaw thei siin pathien thlarau thienghlim  chuh an chunga a fu ta a nih. Chuh, Juda Jerusalem a um haiin an hriet phingleh makti em emin mipui an hung pungkhawm a, ‘hienghai hih Galili ram mi an ni naw’m a ni, iengleia an piengpui tawngang ela tawng dang dang hmanghai hi inhrepaw thei am a ni ta leh’  tiin. Chutaka inthawk Krista chanchintha thilsiem tinreng kuoma puongsuok dinga hmangaina lungril put a, iengkim Krista hminga tuor huomin huoisenna thlarauvin a hei inthuom zet chun Krista hminga thi khawm an cho et et el a nih. Tirko Peter, Johan le thuoihruoi iemani zat hai chun huoisen takin Krista chanchintha chu an puongsuok ta pei a, thlarau thienghlim thilthawtheina neiin zeng, mitdel, kebai le dang danghai sukdam theina le thilmak thawtheina an chang bawk a “Insuol sim un la, Insuol ngaidamna dingin Krista hmingin Baptisma chang ro “ tiin Krista chanchintha chu an puongdar pei tah a nih.

Chuongang peiin, chawl hadam hman lovin an invak dara khawvel hmun hrang hrangah chanchintha puongdarin, an hringna Krista tading an inhlana- Andria chuh Russia ram a, Bartholomai le Simon chu Iran ram a, Philip chu Turkey ram a, Jakop Spain ram a, Hmangai Johan chu Asia Minor ram a, Marka chu Aigupta ram a, Mathai chu Ethiopia ram a, Peter chu Italy  ram a (“Ka Lalpa hemde anga hemde chu ka phu naw, a letling zawng mi hemde ro” tiin a hringna an hlan tah a nih), Thoma Didum chu India ram a, chuongangin Krista chanchintha chu vawisun chen hin puongdarin a um a; Chu ni missionary lungril ei ti chuh. Chuleiin 60 AD vela khan chuh khawvel hmun hrang hrangah hi chanchintha hi an dar suok nghal reng a, khawvel sakhuo laia pawimaw tak Kristien sakhuo (Sakhuonaa Krista hnungzuitu) chu a hungni nghal reng a nih. Krista hi tho naw nisienla hieng po po hi a tlungthei naw ding a nih. Chuleiin:

                 Thlana inthawk a tho nawk ta, Sandamtu Laltak chuh; 
                 Thlan thima inthawk hungsuokin, Khawvel suol le thina a hne zo ta.
                 A tho nawk ta, Inpak ro, sandamtu a tho nawk ta. 

tiin hla’n ei sak dep dep thei ta a nih. Pathienni (Sunday) kuhi Krista thonawkni a ni leia khawvel pumin ei inser, Hindu kulmutna hmun India ram tak ngiel a khawm hril buoi um der lovin sawrkar sin le thil dang danghai chawl sanin ei inser bawk a ni hi.

            Chu chanchintha chu mingohai zarin ei ni lai a hungtlung ve a, ei lawm hle. Taksa le thlarauva malsawmna tam tak dawngin ei pi le puhai khawsakna ngaituo chun vawisun hin chu changkang tak ei ni tah. Chuleiin, eini khawm missionary lungril putin Lal rawngbawl ei tiu.  Missionary lungril indik tak nei hai chuh  pawlah an buoi ngai nawh a, Lal Krista a thonawk anga ropui takin ei la tho ve ding a nih ti an hriet chieng tlat leiin Kohran rawngbawl lovin Lal Krista rawng an bawl a, malsawmna tam tak an dawng hlak. Tho nawk nauhai ei ni si a. 

Lalhuolhim F. Tusing, Saikot

“Bukna an hang siem a, 
Zion kulpui sungah; Tling lovin an ngai hram hram,
Ro felin an rel nuom nawh, 
Ei Lalpa chunga hin”
Rev. Thangngur

Judahai rorelna khawl insangtak chu Sanhedrin ti a ni a. Hi thumal umzie hi ngaidan inthieng tamtak hril theiin um sienkhawm chuong ngaidanhai hrillang chu ei thil tumtak an naw leiin a tawi zawngin hieng hin hang hril lem ei tih. Sanhedrin ti hi Greek tawnga inthawka laksuok, chu umzie chu “dan-le-dun kengkaw dinga inthung khawm” ti a nih.

Sanhedrin ti thumal hi Thuthlung Hlui huna khan inlang naw de sienkhawm Judahai Dan Bu Talmud le Thuthlung Thara hai hmun tamtaka hmu dingin a um. Ei hril ta angin hi pawl hin Judahai dan-le-dun kengkawna thuah hmun pawimawtak a hluoin; khawtlang le sawrkar thil inrelbawlna el khelah sakhuona thil chena ding khawma thutlukna siemtu chu Sanhedrin hi a nih.

Hi pawl in keithuoi dan tlangpui a chun—thiempu laltak chu President niin, member 71 um an ta; chutaka member ding chun thiempuhai, Pharisaihai le Lekhaziektuhai an ni ding a nih (Sanhedrin 1:6). Anni hin indiktakin ro rel an ta, Judahai chunga thubuoi le hlabuoi um hrim hrim chu hi rorelna khawlpui Sanhedrin hin a ngaituo hlak ding a nih.

Ei Lalpa Isu Krista Ro Rel Peka a Um Dan:

1.     Sanhedrin dan a chun zanah ro an rel ding an nawh, zanah inman khawm phal ani bawk nawh (Sanhedrin 4:1; Mishna 7). Ei Lalpa Isu Krista man dinga an inthawk tum ruok khan chu “khawnvarhai le meiserhai” chawiin an dan nei lai zing khawm pawisa zo lovin zanah an inthawk ani kha (Jn. 18: 3; Matt. 27:1; Jn. 19:14; Mk. 14:72). Isu man dinga zana an inthawk dawkna le zana ro anrel khan dan hre lo le thiem lo an ni nawh; dan tienga chun mithiem filawr ngat an nih. Juda roreltuhai chun ei Lalpa Isu Krista chungah rorelna indik an pek nuom nawh. Ei Lalpa ta ding chun zanmu intuo ngaina reng a um ta nawh, chu zan ngei chu a ta dingin zan lungngai thlak an chang ta lem a nih.

2.     Judahai dan a chun “heka um pa chu an hekna hmufie a ni hmakhat chu mi indik a ngai a nih” (Fimate, Thina Rapthlak, 8). Chanchintha Johan ziek chun hieng hin a lo hril a, “Chun ama chu an sukhlum theina dingin thiempu lalhai, upahai le roreltuhai po po chun Isu khela hekna an zawnga. Nisienlakhawm an hmu si nawh…” (Matt. 26:59-60). Sanhedrin rorelna hin Isu chunga thina khawp hekna an hmu nawh ti chu hmai ruol lovin hmu theiin a um. Hieng anga hekna indik lo le thiemnaw inchangtirna khawp tling lo hekna hi Juda dan chun a phal nawh (S. Mendelsohn, The Criminal Jurisprudence of the Ancient Hebrews, 274). Juda roreltuhaiin Isu thiem nawna an hmu nawh, sienkhawm indiknaw taka rorelna tawp zai an rel chuong nawh. Ro fel le indik nekin hretu tehlem an insiem ta lem a. Judahai Rabbanic dan a chun “I chipuihai lai khelthu hrilin in vak vel ruoi ding an nawh; I tuolbawm hringna thuah a ni naw zawngin I thang ding an nawh” (Lev. 18:16) ti hretu chu anni ngei hi an ni si a.


3.     Judahai dan a chun hrepuitu/hektu pahni neka tlawm lo an um ngei ding a nih. Hi thu hi Mosie dan ei en chun chiengtakin an lang, “Hretu pahni amanih, pathum amanih bauva inthawka thi tlak chu sukhlum ding a nih, hretu pakhat cho bauva inthawk chun sukhlum ding an nawh” (Deut. 17: 6). Chun, chuong mi pahni hrepuitu/hektuhai chu an thu a bula inthawk a tawp chenin an hmu‟n an ang ngei ding a nih. Chuongang chu an um naw chun hekna hi rorelna khawlpuiah bawzui tlakah ngai a ni ngai nawh. Rorelna hi fimkhur le indik taka kengkaw hi an tum tlat hlak a nih. Isu chunga an rorelna a ruok hin chu a thina ding khawp hekna an hmu nawh. Chuongsa khawm chun, “an sukhlum theina dingin thiempu lalhai le roreltuhai po po chun ama hekna an zawnga, an hmu si naw a” (Mk. 14:55). A tawpah “hretu tehlem mi pahni an hung suok a—“hi mipa hin „hi temple kuta bawl hi thiek ka ta, ni thum sungin a dang, kuta bawl lo, bawl ka tih,‟ a ti an ta. Nisienlakhawm chuong khawm chun an
hekna chu anmil thei chuong nawh” (Mk. 14: 58-59; Matt. 26:60). Isu Krista chunga an rorel dan en hin Juda roreltuhai hin thiemnaw an chang hle. Hieng ang rau thina khawp an rel ding a ni hin chu, Isu an man hma khan hektu an lo um dai ding an tah.

4.     Sanhedrin dan a chun a hranpaa roreltuhai hmaa hrilpuitu (Ukil/attorney) ei ti ang hi a ngai ve hran nawa. Hektu um an ta, chuong heknahai chu Sanhedrin member-hai chun a hma lawkin felfaitakin ngaithlang an ta; heka umpa humhim chu an thiltum a ni lem hlak ding a nih (D.A. Carlson, The Gospel According to John, 584). Chun, thi dinga an lo rel a ni khawma an relna hun a inthawk nikhat dang bek hun an la keisei hlak ding a nih. Hi sung hin thiemnaw chang dinga an rel khumpa thatna dinga thuthar dam a la um khiet takin ti nghak a la ni hlak ding a nih (Mishna 8). Isu Krista chunga ruok hin chu chuongang hun chu pek a ni ve nawh. An rorel zo le inruolin action an lak zawm nghal a nih.

5.     Sanhedrin sin pawimaw tak el chu dan-le-dun hmanga inremna le indikna kengkaw a nih. Amiruokchu, Isu Krista an manna le thiemnaw an inchangtirnaah ruok hin chu inremna le indikna an hnawt nawh; chu nek hman chun an thiltum chu thiemnaw inchangtir le hremna pek chu a nih (Giovanni Rosadi, The Trial of Jesus, 114).

Sanhedrin lukhaitu thiempu Caiapha tawngbau ngeiin “mipui aia mi pakhat thi a tha” ti rawtna a siemna hin a sukchieng hle (Jn. 11:50; 18:14). Juda roreltu, abiktakin Caiapha hin thutlukna a siem suol ngei de! A rorelna indik naw zie hi khawvel hmun tinah puongdar le sukdarin a la um pei ding a ni sia.

6.     Gathsemani a Isu Krista mana a um zo char khan, Judahai rorelna khawlpui Sanhedrin thiempu laltak keithuoina hnuoia thuoi lovin, thiempu Anna (Caiapha tarpupa) kuomah thuoiin a um lem. Thiempu Anna chu A.D. 6na lai vel khan thiempu laltak chu a lo ni ngei dea, amiruokchu kum sawt rak lo hnung a chun hlip pek a nih. Isu Krista chunga ro an relna a hin thiempu laltak nina a inthawka chawl (pension/ex-high priest) tah Anna hin ieng am mawpurna a la neia. Caiapha tarpupa a ni lei el hin a ina rorelna nei ding a ni nawh (Jn. 18:12-14, 24). Chuongang bawk chun, Caiapha khawm thiempu laltak a ni lei el khan a ina rorelna kha a nei ding an nawh (Matt. 26:57). Juda rorelna kawlpui Sanhedrin hmaah an lang hmain Isu kha preliminary trail tum hni lai a lo tuok hman a nih. Hi hi rorelna indik lo a nih: (i). Hieng po po hi zana tlung vawng a nih—Sanhedrin danah zana rorel phal an nawh, chun, Sabbath tawmin hieng ang rorelna hi an nei ding an nawh (Mishna 7). (ii). Sanhedrin danah member fe khawm (quorum) 32 bek an ni ding a nih. (iii). Juda danah rorellai hin kutthlak phal an nawh. (Chandler, The Trial of Jesus. Vol. 1, 228 ).

7.     Sanherin pawlhai hi thina khawp meu ro an nei hin zan hunah thutlukna an siem ding a ni nawh (Mishna 7). Thiempu Caiapha le a thawpuihai hin Isu thina ding zan huna thutlukna an siem hi an thaw suol hle. Anleh, Thiempu laltak Caiapha le a rorelpuihai hin dan chu an hriet naw am ning a ta? Nilove, dan thua chun mi naran chung le dan hre mi vawng an nih. Hieng roreltuhai hin Isu damna ding an zawng nawa, a thina ding an ngaituo lem a nih. Hi ngei khawm hin Sanhedrin dan chu a kal a nih—thina ding khawp rau thutlukna an lak hin kaltu an um ngei ding a nih, kaltu um lova an renga an inlungruol seng a ni chun an rorelna chu an diknawah ngaiin an la rel tha nawk ding a nih.

8.     Judahaiin Isu Krista an hekna bulpuitak chu “Pathien hming a hrilsiet” ti a nia (Mk. 14:64). Chuonganga Pathien hming hrilsiet an lo um a ni chun an dan ang dungzuiin “lunga deng hlum” ding a nih (Misnah 7:5). Amiruokchu, an danin Isu thina ding khawp iengkhawm thaw thei an nei nawh ti an hriet leiin an hekna hmasa chu her danglamin Rom sawrkar ta dinga mi ti um “lala insal” angin an hril ta lem a (Jn. 18: 31-37; Lk. 23: 1-5). Hi taka hin Juda hotuhai le roreltuhai chun ro fel an zawng naw zie le Isu thina ding hi a hmaa inthawka phierruk a lo ni ngei an ta ti chu hriet theiin a um.


9.     Bawrsap Pilate chun Juda hotuhai le roreltuhaiin rorelna indik an dit nawh ti le, Isu thina ding chau anih an dit ti chu a hriet chieng hle (Mk. 15:10; Matt. 27:18). Nisienlakhawm, a thina ding khawp rau suolna iengkhawm a hmu naw a, Pilate chun Isu insuoktir chu a nuom a (Lk. 23:14; 20). Isu chu chuonganga mifel ni si chu iengleia Pilate khan Kros-ah hemde dinga a peksuok el am a na? “Hi mifel thisen chunga hin kan thieng” (Matt. 27:25) ti sienlakhawm, thina nunrawng le rapthlak intlungtirtu le thu insuotu chu Bawrsap Pilate ngei a ni meu si a. Juda hotuhai le roreltuhai ang bawk khan, Rom Bawrsap Pilate ngei khawm hin thutlukna a siem suol ve el chu an naw maw!


Krista pasaltha Rev. Thangngurin hlaa a lo phuok “Bukna an hang siem a, Zion kulpui sungah; tling lovin an ngai hram hram, ro felin an rel nuom nawh, ei Lalpa chunga hin” ti hi a va‟n dik ngei de! Ei Lalpa Isu Krista chunga

Juda hotuhai le roreltuhai rorelna anga rorelna tirdakum le nunrawng hi khawvel rorelna a hin um nawk thei a tim! A thina ding khawp suolna iengkhawm an hmu nawh, Rom Bawrsap Pilate khawmin iengkhawm a suksuolna a hmu bawk nawh. Sienkhawm tling lovin an ngai hram hram, ro felin anrel nuom nawh. A va na ngei de maw ei Lalpa chunga an rorel dan chu.

Eini misuolhai ta dinga sandamna kawt hawnga a um theina dingin Isu Krista suolna neilo chun hieng po po hi a fethleng a tul si a. Chu zara chun einihai chu thiemchangin ei um tah. Tirko Peter chun hienghin a lo ziek a, “Suol tiengahai thi tain felna tienga ei hring theina dingin, ama ngeiin a taksain thinga khan ei suolhai a phur a, ama vuokna vuolhai chun sakdamin in um tah” (I Pet. 2: 24).

Einihai sandama ei um theina dingin suolna hrim hrim nei lo chu misuola intumin, thiem nawna hrim hrim nei naw chu thiemnaw inchangtirin—hming sietna po po, hrilsietna po po chu eini leiin Krista chun a lo phur a. Hmangaina leia ei ta dinga hung inpe Isu Krista chu iengtin am I ngai a, iengtin am rul let veng i ta?