Kum 32 Hnunga Delhi Hmar Hmelhmang
 |
| Mr & Mrs R.Tawna Khawbung. |
~ R. Tawna Khawbung
“Ei piengpui ei Nu tawng ngei,
Khuonu mi lo ruotpek;
Ei ram le hnam chawisangtu,
Mani tawng a lo nih” T.Khuma
Kum 1983 a Delhi kan umlai ei tawng hmang sungkuo 3 chau an uma a pathumna chu parawl a la ni nawk nghal. Inchuklaihai leh kan rengin mi 30 tlinglo deu kan uma Mizo serviceah kan van khawm hlaka, tuolsung upa/local committee memberah pakhat bêk thang ve inla chu thlangam deu ding einia kan ti hlaka. Ei officer lien Pu L. B. Sinate le Pu H.Thangkhuma, khanglai huna dinga tlangmi Delhia bukhuor hmasa pawl vantlang mita khawm awm le challanghai chu awm mitipui kan ring hlaka chu secreat ballot hmanga ditthlangnaah chu pen hmawrin a hmelhriet naw tlat. Mimal chu ieng pawla khawm tlatlum le hlutsak hlaw umthei ngai a nih, amiruokchu a pumpui(hnam) huopa ding ruokchun Jerusalem puonzar ân thler naw tlat. Hriltaka chun kum 2014 a the 76th NEICC Biennial Assembly Sielmata a um khan tuk khat chu Mizorama inthawka palaihai Sielmat vengsaka inthawk rorêlna hmun Biekin pan in an hung thla daldala, thingsaisuo deihlimah a falin kan lo ngira, anni laia pa lien le insang duongkai tha puot chun “e khai motor pawh tlem a zawng chu an park ve tat hi maw le” ti ta naw nim; anni laia mi dang chun “an hmunpui pakhat a ni ve hi” tiin a dawna; motor tlawm le tam kha an hnikna tak an nawha, a lungrila a thilpâi phawrna hmangruoa a hmang chau lem a nih. Hi thu inhriltirtu lungril vet hi a nih dit umlo chu. Kha pastor tak kha chu aw a beramhai chu lungsiet an um ngei. Hril talaklaw, la hei thursa nawk met ei tih. Hnam anga uma tawng nei ei la nuom pei ding chun ei mindset thenkhat thleng tulin anlang. Ei lungril that lei am, annawleh ei lungrilin a phâk naw lei tu phût le thawluina thang derlovin Biekin le lêngkhawmnaah mani tawng nilo malzai, hlapawl le mipuiin sak ei uor deu deu amanih ti theiin a uma; Pathien le kar thil a ni chun ti leiin to ei insiek chu a nia. Theidaah la em nawng anta, hril a hlaw ta em leiin hei hrilsuok lawlawng ei tih. Rev. Runremthang le famtah Pu Buonglienkung hai hla thenkhat lem chu tawng danga sak lâr hmasak dam an nia; music album ei siem thenkhat hlak a zawr inhawina ei ngaituo leiam, mi tawng ei thunsa tawk tawk nawk ta peia; hi khawm hi Pathien ram lienna ding hmangruo ani chun tiin ei ral thlira. Tu tawng khawm ei dovin ei kal nawha; mani tawng humhal le suklâr a pawimaw ti thu el a nih(hi thu hi Hmar Christian Musical Society khawma a ngaimaw thu Advent Krismas-2014 an huoihawt tumin a lo puonglang tah). Mani tawng humhal nawna hmun le tawng himna hmuna mihai hnama an chieng dan inangnawnaa inthawk ruok chun hril sei ngailovin tawng le hnam an tingmat dan inkhi thei a nih. Thil pakhat ei theinghil derlo ding a um; lawm tha ei pêk zozai hi lawmtha rulna ei hmu lêt ve hlak am?, lo ngaituo zawm ve el rawh. Inlawm lawma thaw hi an hawia, ei ngei bawk; amiruokchu, one way traffic ngawta hun hmang ruokchu nghawk hun a um tei hlak. Hnam hum ding chun thisen suok le hringna chen chân ngam ei tam; tawng hum ding hin teh ieng chenam ei inhuoma? Tawng a dam chun hnam a dam ti a nih. Literature/MIL ei tia, ei khukpui rakrak hi communal thil an nawha, hnam humhalna a nih. Amiruokchu, MIL ei nei ei lawm vieu e tilo chun Sikul khuokirna tiemsa lovin College kai hai MIL class a inthung nuom chu tlawmte chau an nih. Pu T. Khuma’n “Sing mi chang theina dinga pawimaw chu tawng tin thiem; biethu hril, zaihla sakna’n mani tawng a pawimaw” a lo ti hi chiktakin hei bi vengveng ta. Pastor Thangngur theology mawl kha alo inril a nih.
Delhi bawkah zuk kir nawk inla; iengtikam mani tawng ngeia lal tawngtai thum haka ei hril ve ding hun nghakhlatakin duthu kan sam hlaka. Kan la tlawm bawka Dr. Rochunga Pudaite-in in rengin hung unla 5 star-ah zanbu fakpui ka ti cheu a tia; hi tum hin chanchinbu hming ding kan hriltlanga ‘Delhi Thurawn’ ti hi kan sukthluk a nih. Thangtharhai hung sunzawm ding thil pakhat bêk ei thaw a tul a nih tiin DELHI THURAWN hi stencil paper hmanga sut tan a nih. Editorial board hmasatakhai chu Editor-Ruolkhumlien Buhril, Joint Editors- R.Tawna Khawbung & O. Rosanga Luopui, News Editors- Albert Thangthasiem Nungate & Henlienthang Thanglet, Circulation manager- C.Thant Khobung; Office: N-19 Mukherji Nagar, Delhi-110009. Chun, Vol.1 Issue no-1 chu Mimtukthla 1983 khan insuo tan a nia, phêk sawma sa a nih. Khanglai hun daia inthawk khan South Korea hai le hin ei lo inngaina tan nisien a hawi. Nk. Hye Ran Kim kum 18 a upa Miranda House a kai tulaia an film starhai ang thova duongkai tha le nal, ngo buong phat kha eini lai a thla a ngam emem a, a hawna umkhawm châng tuonga hai riek vein ei fakfak a faka, changal hme hai khawm a fak ve vawng a nih. A khawtieng thliinam a lên hmang, ei cheltâng sawng naw chu a ni kha.
Ka sangpa naunu pasalnei le inzawma Delhi fe kan nia. An inneini (April 11, 2015) khan ei thaw dan hlak angin laibung le ka sangpa (L) Lalringai ruolhai man kan infaktirhai man kan sema, ruoi kan buotsai bawka; mi 100 tlinglo deuvin kan kîl. Pathien zarin India khawpui Delhia khawm ei lo thahnem ve ta leiin Laibung, Far le tulete popo ko kim vawng kan nuoma chu Quartera thilthaw kan ni leiin a remchang nawa, kan fiel vawng naw leiin kan inthiemnaw khawp el; an mi hrietthiemna ka ngen nghal bawk a nih.
Chun, April 12, 2015 khan Delhi Hmar Christian Fellowship-ah kan van khawma, lunghlui ânlênga, ka lawm bawk leiin hi thu tawite le thlalak hi ka hung tlangzar ve tawp a nih. A zatve dethaw kha chu kan umlaia la pieng lo an ni ka ring. Ruolhlui iemani zat ruokchu hna hlui an lo til zo tah. Ka aihnaphapui a hnunga Delhi lut nawk tuta ka fe huna lolaumhai chu ka Pu Ruolkhumlien Buhril IAS, Pu C.Thant Khobung le Pi Lalremsiem an nih. Thalai daya an hmang ani leiin thalaiin inkhawm an thuoia, Tv. Lalmuonthang Khawbung chu a keihruoitu a nih. Hnam puon le hnam thuom an inbel tawla, en ân hawiin mit a tlai hle. Vêng tieng inkhawmpui fe ei insawn rumrum el. Anni laia inkhawm an hawinasantak chu hnam lungril fîm an pâia, inhmangaina buruokin a tuoma, inkhawm boruok a zânga, hlasak a hringa, thlarau a zalêna; vêng tieng anga hun bituk umlo nisien chu rivaival khawm tla hman ding a nih. Mahipalpur vêngbukin hlapawl an saka, vêngbuk pakhat ding chun tam ka ti kher el. Thuhriltu Pi Lalremsiem in khawvel huopa rawngbawl dinga Lalpa bêlruothai ei nih ti a lungrila sipliem a bunthlak chun mi a hne hle. Inrieng le chitea bul intan nisienkhawm tuhin hmel hriet le hrietlo chibai senglohai mani tawng ngeia hla sak dupdup le Delhi tawngtakah hang chawibiek tlang chu mi nêkin ka lawmna ânsang ka ring. Ka bula thunghai ka hei ena, ka dawt charah Pu John H. Ruolngul, chun Pastor Ramhlunsanga(Sangte) le Pu H.K.Kawllienthang; officer lien le rawngbawltuhai; chun ka vawitieng tlar ralah Pu Benjamin Khawbung sumdawngtu hlawting le a dangdang; a thlamuongum hlak khawp el. Thawlawm inhlantu dinga ditsakna an min hlan kha lawmum ka tih. Ka thawlawm inhlana chu a la tamtak. Pu Herbert Lalsanglur-in thawlawm zât a puonga; Pathienni thawlawm chêng sing chuong, sawmapakhat nuoi khat chuong le buiding thawlawm sing tamfet, a rengin cheng nuoi hni chuong a nih. DHCF hin Bible inchuk mi 4 an tir taa; missionary khawm thahnemfet an chawm thu ka hrieta lawmum ka tih. Khang hun le tu hun paltu ta ding chun lawmna ding a tam. Thlangamtaka, chawngpunina changa inkhawmna ding kan invai laite kha….. Lalpa mi thuoi dan hi mita hmutuhai chun ropui kan ti naw thei nawh. Vengbuk Bible study an nei hlaka, R.K.Puram vengbuk Bible studyah kan nupa in kan va thanga, an Sunday school inchuklai Thilthawhai 5:1-16 kan hriltlang. Naupang le thalai khawm an thanga, tanna hun dam an pek hlak. Veng tienga HCLF prokram siem PSS ah Marka ei inchuk kha an ni chun Thilthawhai an inchuk ve thung.
Inkhawm tinah Pi Lalremsiemin a birth day a lawma theitui le bei chihni kan dawma, ruol tha le mi ditsaktu mi ngaina mi chibai nuom haiin an mi bawr laihlaih leiin bei fakna ding le chibaina ding kut an dai naw leiin ka tuhai fak dingin ka bei chawi ka peka, theitui ruokchu thawluinain ka dawn zo hram. Delhi Thurawn zawrna ka hei hnaia, a man ka pêk an phal ngainawa chu tutum chu ka Pu Lalliensung Amaw in keiin ka pekpêk ding a nih a tia, an mi ngaihlutna hai ka lawm takzet. Mi an tam leiin ka sunghai phone hmangin ka zawnga; drivertupa chun car kawtkhar hawngsain a mi lo nghak tawp. Delhi Hmar Christian Fellowship Lalpa thlarau thuoinaa Krista ditdan angtaka rawngbawl pei dingin ditsakna kan hlan.
April 20, 2015Sielmat
