Delhi Hmar Welfare Association condemns Rev. Ramchuoilo Varte

DELHI HMAR WELFARE ASSOCIATION 

Bethesda Social Service Centre, K-14/14, Mahipalpur, New Delhi-110037

THIEMNAW INCHANGNA 

February 17, 2013 zan hin Delhi khawtlang ṭhuoitu le adviser hai inhmu khawmin, Hmar hnathlakhai inpumkhatna sukdar tum zawnga boruok dang dang inleng an dawnghai le Delhi-a nu le pahaiin an biek ngun tak le thurawn an pek rawn, Rev. Ramchuoilo Varte chungchang thu ngunthluk taka ngaituo a ni hnungin hieng ang hin thuthlukna siem a nih:

1. December 16, 2013 zantieng HCFD inkhawm ṭin khan Delhi-a pawl tum tum HCFD, DHWA le HSA aiwhaiin Rev. Ramchuoilo Varte chu hmaiintawn ngeiin an inbiek puiin, Delhi-a Hmar nauhai lai kohran pawl bik hming chawia a hrana Hmar ṭawnga chawibiek inkhawm nei an remti naw thu mipuiin kut phar meua May, 2007-a an lo puong ta thu le Hmar ṭawnga a hrana inkhawm a um chun a ṭha naw tieng nasa takin a kakhawk a nei thei dingzie thu an hril a. Ama hi ICI Assembly thurel a hmuna sukpuitling dinga dande a ni leiin, chu chu thaw lo hram dinga hril le ngen a ni a. |awngbau el bakah HCFD a inthawkin ngenna lekha le HSA tienga inthawkin pawlhrana inkhawm an ditnawzie thusuok an siem chu a copy pek a nih.

2. Delhi tlanga hnam ṭhuoituhai chun Rev. Ramchuoilo Varte chu kohran rawngbawltu a nina angin khawtlang hriselna ding le Pathien ram lienna dinga lungruol taka thawpui an lo inbeisei laiin, a naw tieng daiin, “Tu kum sung chu ṭan la ni hri naw nih” tiin a lo dawn a, (tukum sung a ti hin chawlkar hni chau a um tah) fe khawmhai makti a tling. HSA thusuok siem le DHCF lekha pek chu sirsana hmangin Headquarters tienga hotuhai kuoma ziek ngeia Delhi tlanga Hmar hnathlakhai dit dan chu lo intlun dinga an tiemna khawm sukpuitling dinga hma lak nekin inpumkhatna sukdar tum zawngin ṭhang a lak lem nia hriet a ni leiin a pawi takzet.

3. December 22, 2012 hin Delhi Hmar Welfare Association, Hmar Christian Fellowship Delhi, Hmar Students Association, Jt. Hqrts N. Delhi Executive members le khawtlang nu le pa hai inko khawmin Delhi-ah Hmar ṭawng hmang kohran pawl dang hrim hrimin a hrana chawibiek inkhawm nei an remti naw thu Joint Declaration-cum-Resolution tlak a ni a. Hi huna hin Rev. Ramchuoilo Varte khawm ṭhang zing siin nu le pa hai thuthlukna iengmalo a ngai a, a letling zawng hma a lak ta lem el hi a pawi takzet. 

4. Khawtlang ṭhuoitu Val Upa, Pastor le mimal tam takin Delhi le a sevela Hmar nauhai inunauana suksiet zawnga hma la lo dinga a chengna In ngeia a vel a vela an ngennahai popo khawm Rev. Ramchuoilo Varte-in a zawm nuomnawnaa inthawk hin Delhi le a sevela Hmar nauhai ienga khawm a ngai nawzie a suklang.

5. ICI Kohranin 100 days chain prayer program a siem kha tulaia Delhi boruok enin Delhi tlanga ding chun lo zawm ve kha thil ṭha tak ni dingin an lang naw a. Kha hma kum 15 liem taa inthawk khan thla tin hnam ta dinga ṭawngṭai khawvar an lo thaw ta hlak anga, renga ṭhang tlang dan ding prayer topic le ṭhuoitu, hun changtu ding hai sukdanglam si lovin remruot pui a ni a. Sienkhawm zawm nuom lovin, ICI kohran mi tlawmte fiel bik nei a, ama tum dan hmasak anga program a fe thlengpui hin inlakhranna chi ṭha naw takin in rasuok tirtuah hi prayer programme hi a hmang ni a ngai theiin a um a, a pawi takzet.

6. Khawtlang mipui, nunghak tlangvalhai ngaidan lakkhawmna dinga platform siemin January 24, 2013 khan Darrang vuo-in mipui kokhawm a ni a. Remchangnawna leia hung thei nawhaiin awlsam taka inhriettirna an hung pekna ding Mobile number mipui hrieta tlangzar a ni bawk. Hi zan hin Delhi le a se vel, Haryana, UP haia inthawk Hmar nau pungkhawm mi 425 fe khawm a ni a, mi 134 dangin an hung thei naw ding thu inhriettirna Text SMS in an hung thawn bawk. Hi zan hin Rev. Ramchuoilo Varte a hung naw a, inhriettirna iengkhawm a hung pek bawk nawna hin khawtlang inṭhuoidan iengmaloa a ngaizie a suklang.

7. Thudik chanve hmangin HCFD/DHWA ṭhuoitu ṭhenkhat a biek lawr hlak ha idem a um takzet a, ṭhuoitu hai lai inhriettiem nawna intlungtir tuma ṭhang a lakna hi a hriselnaw a thil tirdakum le tibaium tak a nih.

8. Rev. Ramchuoilo Varte chengna hmuna Pastors, Val-Upa le DHWA ṭhuoituhaiin vel tam tak an inbiekpui ta hlak leiin Feb. 7, 2013 zan khan DHWA Executive member hai le inbie tlang dinga ko lem a ni ta a. Sienkhawm, “Kei chu hotu (ICI hotulienhai) nei ka ni leiin, ka hotu haiin ‘fe naw rawh’ an tih” tia suonlam siemin inbiek tlang dinga konaa hin a hung nuom nawh. Khawtlang ṭhuoitu chun a member mi tukhawm khawtlang inrelbawl dan thuah inbiekpui dinga a ko hi thil thaw awm lo niin a ngainaw a, a thaw ding hrim thaw a nih; A letlinga ṭhang lak khawm thilthaw dan indik niin a ngai naw bawk. Rev. Ramchuoilo Varte le a sawrtuhai inkar thu chu DHWA thuneina puotieng a ni leiin DHWA chun a thuneina puotieng kut rawl a tum naw a, a rawl ngai naw bawk. Nisienlakhawm a thuneina sunga khawtlang le hnam inthuruolna le inthununa thil suksethei dinga a ngai thil le chuong ang thil hung thaw tuma a hriet taphawt chu zil le a theina po poa do tlat a tum a nih.

9. Ṭawngbau a inbiekpui a nuom ta sinaw leiin February 9, 2013 khan DHWA chun, “ thilthaw le inphu a kut a tlaknawna san ding iem a um ti lekha I hmu a inthawk a karkhat sung ziek ngeia hung inhrilfie dinga inhriettir I nih” tiin lekha a pek ta lem a. Sienkhawm hril ding a hrietnaw lei am, khawtlang ro inrelna iengah a ngainaw lei am, annawle lulul an suo ve hrim hrim lei, vawisun chen hin Rev. Ramchuoilo Varte a inthawkin inhrilfiena lekha hmu a la ni naw zing. Hienglai zing hin ICI hotulien haiin DHWA Chairman/Secretary kuoma lekha hung thawnin hi khawtlang ro inrelnaa hin an hung inrawl.

Pathien rawngbawltu, thlarau tienga mi chawm hlaktu Rev. Ramchuoilo Varte hi taksa ram taka khawm beramhai entawn tlak a inzatuona a kengkaw ei beisei lai zing lulul insuoa a um hi a ṭha naw in pawi a ti takzet. Hmar nau ringtu Kristien inngei diel diela um tlangna hmunah inṭhedarna chi the a, suk dar tuma ṭhang a lakna dam, khawtlang ṭhuoitu hai inzana neilo a nungchang mawi naw tak ansuona dam, ṭhang la hung thar peihai ta dinga hri ṭha naw tak thedar tuma hma a lakna hi dem a um takzet. Chuleiin Delhi khawtlang Hmar nauhai hin Rev. Ramchuoilo Varte hi thiemnaw kan inchang a nih ti mitin hriet dingin kan puong. Pathien phaw a hmanga Hmar nau inpumkhatna suk dar ding zawnga a hmalakna taphawtah Delhi le a se vel a um Hmar nau tukhawmin lo zawm lo dinga inhriettir a nih.

Delhi le a sevela Hmar nauhai aiawin,

Sd/-

C.Thant Khawbung 

Chairman, DHWA 

Sd/-

Lalchungsiem Thlawngate

Secretary, DHWA