Father's Day

By Ramthienghlim Varte

Tukum 2016 sunghin Pathienni vawi 47 ei nei thei chauva. Pathienni programme a thang ngei ngei chi hieng - Palm Sunday, Easter Sunday, Father’ day, Mother’s day, Thalai day, Children’s day, Penticost day, Tlaithar lawm, Buthar lawm, CKTP Conference, Assembly le dang   dang Pathienni ni 15 vel hi a hluobit a. Chung kar laka chun hotu lien prgramme le mithi lei damin ei hei thul nawk hlak bawk leiin Sunday School programme ei lo duong lawkhai  duthusama ei hmang thei naw chang  a tam em em. Chuleiin, tuta Day pawimaw tak PAHAI NI hmang ding khawm hi a hlu em leiin kumkhat sunga Pathienni vawikhat kei heka ei hmang a ni ti hi hrea umzie le thiltum indik tak anga hmang tangkai dingin dit a um khawp el.

            Ms. Sanora Smart Dodd kum 16 mi a ni chauvin vangduoithlak takin a nu’n a thisan a, an ni hi unau 6 an nih. A pa Mr W. Jackson Smart lo sinthawmi (Farmer) kawppui dangkhawm zawng lovin hmangai taka a enkawl puitling vawng hi a ngaituo Nuhai ni ( Mother’s day) ei hmang hlak anga pahai chawimawina ni siema inser an phu hlie hlie’n a hriet a. Chuleiin apa piengchampha June Ni 5,1910 hi a pa hrietzingna ding Pahai Ni (Father’s Day) dinga puong dingin Knox Presbyterian Church Pastor (Dr) Conrad Bluhm le YMCA thuoituhai inhmupuiin thurawn a siem a. Insung, khawtlang le Kohrana PA hlutna hi chawimawi an phu hle a ni ti hi an ngaituo’n phuisui le zalen deuva hmang le inser dingin June thla Pathienni 19,1919 (Pathienni vawithumna) khan a hmasatakna dingin Father’s day chu an lo hmang tan tah a. Chu ni chun Pa ala damhai kuomah Rose par an inhlan a. PA nei tan aw hai ruok chuh Rose par var an inhlan vet hung a. Sungkuo, Kohran le khawtlanga pahai hlutna le an tangkaina thuhai hrilin ursun takin hmang a nih.

            Kum 1924-a Calvin Coolidge US president a hung ni khan Father’s day hi sawrkar hrietpui ngeia ram pumhuopa inser a nuom thu a hung puongsuok a, US Congress chun a pawmpui el thei naw leiin, kum 1926 khan New York khawpuiah National Father’s Day Committee indinin Nuhai Ni ang bawka hmangve dingin thu an sukthluk ta a. US Congress khawmin a hung pawm tah a nih. Chu ang chun khawvela hung indar lien peiin vawisuna eini hai chen khawmin kum tinin June Pathienni vawi thumna hi Father’s day tiin ei hung inser ta pei a.

            Sungkuo, Kohran le khawtlanga Pahai tangkaina, hlutna le pawimawna suklang a, pa haiin PA an ni ang taka insung, Kohran le khawtlang enkawl chun insung inhawi, Kohran hring le khuo-le-tui tha an hung ni ngei hlak ti inhriet tir hi a  thiltum tak chuh nih.

            Ei khawtlang le Kohran danah PA rorelna hnuoia um ei ni leiin pheikhai inruol tak le tluong taka  ei fe theina ding chun Nu nekin PA ngirhmun a pawimaw lem. Nuhmei Lu chuh Pasal, Pasal Lu chuh KRISTA ti a ni tlat si a.

Insungah PA ngirhmun pawimawna hi ei hriet seng a, duthusamin PA chuh alo fel zo naw deu a ni palh khawmin kum khata PA chawimawina Ni kohranin a buotsai vawi khat chau hi inza takin NU le nau haiin chawimawi tum ei tiu.

“FATHER’S DAY HMANGTU PO PO FATHER’S DAY CHIBAI”