INPUI: Hmar News & Info

                   
Lala Khobung, Aizawl
           
Kum 1978 khan Imphal a inthok in Churachandpur pan a Bus a ka chuong lai lam lakah papui pakhat hi a hung lut ve a. A hunglut le in ruol hin in ringdeu hin Halleluiah,Halleluiah  unauhai in damtlang maw Halleluiah a hungti a. Kei chun zu rui or mi ang lo ka lo sawn a. Passenger  thren khat khom chun ka nga idan ang chun an ngai ve.

Ka bul a throng pa chun zu rui le invet a ni naw zie a mi hril phing leh  tu ta hma a ka nu’n a mihril, ka pa H.K.Buonga, Pu Lalngai, Pu Dokhawlal Gangte hai meitei ramah Pathienthu hri ding a an fe malam in in pakhat an hei sir malam a  in ah an hei lu ta Pathienthu hril a fe ding an ni thu an hang hril chun,in neitupa chun a lo lawm luo tin an tleng ve la, a rawl tawp tawp in HALLELUIAH ti in an vel sie  zak el a, bang a chun a lawn a, tlungpuma in thok chun in ring deu hin Halleluiah Buonga Buonga Lalnngai Lalngai,Dokhawlal Lal Lal Lal, Halleluiah a hung ti el ta a, ti thu a mihril khah ka hrietsuok a, ka nu’n a mihril  pa ngei khah a nih ti ka ring nghet ta a.

Mi’n thrungna an in ken a chuh a thrung nuom noh. A hlim em em el a,Haleliah,Halelah ti in a so hin a so bor bor el a. Bus conductor in chuong man (bahara) a hei khon lai chun “khapa khah ke iin a chuong man pe’ng ka tih” ka hei tih a. Ka ti ang bok chun mi dang khom a an hung ti ve. Conductor chun “ama hi chuh chuong man kan lak ngai noh” a hung ti el ta a.

           Ka bula thrungpa chun hipa chan chin hi a lo hriet khop el a chuh a hming tak a hriet noh, Halleluiah ti bak hi chuh. Hi hih mi tin in an hriet dan le an ko dan a nih .A mi hril dan chun Mr.Halleluiah hih mi piengthar indik tak a nih a, halleluiah ti hih a piengthar a inthok a mi’n an ko le hriet dan a nih .

A piengthar a inthok khan ieng lai khom a a hlim em em zing a, voikhat khom a lung a sen ta ngai noh .A lungsen na ding awm a tong ding a ni hin chuh in rang deu hin Halleluiah a ti khal vat hlak a, lungsen ta lovin hlim tak in a um nawk el hlak. A piengthar le hlim a inthok hin chuh tu poi khom a tawk in a hril ngai noh a, chu ang bok in tukhom in a poi an hril in an tawk ngai noh. A hung hrisel ta em em el a, a damnaw khom  hih hriet ding a um ta noh.  Phai lo nei hlak a nih a, Lawi hmang a lo a kei lai khom hin hlim em em hin Halleluiah Lalpa chuh inpakin um raw seh,Halleluiah…titi,eerr, Halleluiah a ti zing hlak.Voikhat chu Dar-bel a ring in rek, Meitei hai in tui chawina a an hmang hlak hih a hung in chawk thar a.In a hung  tlung chuh a naunu hin a lo lawm em em el a, in rang deu hin tui chawi ding in a suok nghal el a.

A hung tlung chuh a bel khah an sang deu lei in a lu chung a a darbel in chuon khan kotkhar lu chung a tau a, a bel chuh a tlaper bui el ta a. A naunu hlak chun hal an lau le iin  an phalam taluo el a. Apa chun in rang deu hin Halleluiah Lalpa chuh inpak in um raw seh, bawinu nang in suk na naw maw, kei a thiemnaw a nih Halleluiah a hei ti vat el chuh naunu hal in lau dor dor a um khom chuh hlim tak in a hung um ve tah. Ami hril pei dan chun Mr.Halleluiah hih a piengthar a in thok chun a hrisel a,a taima em em e la, an sung fak khop a thaw dok a, mi thil ieng khom an hnar noh a, mi thil ieng khom a bat noh a, a thil khom tukhom in an bat noh. Mr.Halleluiah ang vong hih ni thei in la chuh khawvel hih a va hang in hoi awm de aw.
..

Lala Khobung, Aizawl.

Parṭhri in awr tir hih in chawimawina a nih.

Khuol ṭha le chawimawi tlaka ngai hai hei in awr tir chang hin mi tamtak chun thawdan ding renga ngai in meiling in awrtir ang zie zang in  in rang taka  hlip in an hnungzuitu hai an pek hlak.


Hi thil hung in tranna hi, ka hriet dan chun, ei Prime Minister famtah Pi Indira Gandhi a inthok a nih. Ama khah par rim ngaitheilo (allergy) nei a ni lei in an in awrtir lai vel khan inthuok lovin an rang thei ang taka la suok in an siehmang pek hlak. A rim a hiplut vai chun a hnar sung tieng  hung inza  in insim in a zui a, a hnuk  hung  ping in hritlang in a zui a, a rawl a hung suok thei ta ngai nawh.

Ka ngaidan chun, parṭhri hi mi’n uluk le poisa hiel senga an lo siem, ngaina le ditsak taka an lo in awrtir a ni lei in a thei hram chun function  sung bek hi chuh awr ni hlak sien, a lo tam deu ani chun a thren la suok in  an hma table a sie ni sien. Function zo phat khom maksan el lovin ngaina taka chawipei ni sien chuh a lo buotsai le lo in awrtir tu hai ta ding khoma man hla ngei a tih.

Chun par le  a thren chu vairam tienga inthoka ready made dam an nih a. Assamese hai thawdan in ei hnam puon maflar a siem hai dam hih in battir el ta hlak in la, chu chuh ngai in la nei ve el ei tih.